ئەم هەواڵە بڵاوبكەوە
FaceBook  Twitter  

ئاسۆ ده‌وڵه‌ت-ستۆكهۆڵم

ڕۆژی 24 ی حوزه‌یران له‌ شاری ستۆكهۆڵم كۆڕیادێك بۆ نوسه‌رو ڕاگه‌یاندنكارو تێكۆشه‌ر و هاوڕێ ی دێرینی حزبی شیوعی دانا جه‌لال به‌ڕێوه‌چوو كه‌ له‌ له‌لایه‌ن خانه‌واده‌و هاوڕێكانیه‌وه‌ ڕێكخرابوو بۆ ڕێزلێنان و یادكردنه‌وه‌ی ئه‌و كه‌سایه‌تییه‌ نیشتمانپه‌روه‌ره‌.

باسكردن له‌ هه‌ڵوێسته‌كانی دانا جه‌لال، گێڕانه‌وه‌ی یادگاری و به‌سه‌رهاته‌كانی له‌لایه‌ن خانه‌واده‌و هاوڕێكانییه‌وه‌ ده‌بوونه‌ هۆی به‌خشینی ئارامی به‌ ئاماده‌بووان.

له‌میانه‌ی لێدوانی هه‌ندێ له‌ به‌شداربووان بۆ كه‌ناڵی ئازادی ، به‌م شێوه‌یه‌ باسی دانا جه‌لال ده‌كرا:

هاوڕێ ئه‌حمه‌د ڕه‌جه‌ب :

له‌ده‌ستدانی مرۆڤێكی شیوعی خه‌ساره‌تێكی گه‌وره‌یه‌. دانا له‌خێزانێكی شیوعی یه‌ كه‌ چه‌ندین قوربانییان داوه‌، له‌ دوا دیدارم له‌گه‌ڵ كاكه‌ دانا ئه‌وه‌ی دووپاتده‌كرده‌وه‌ كه‌ ده‌یگووت من شیوعیم و ئاپۆچیم.

ئایشێ مسته‌فا :

حه‌مه‌ دانا زۆر به‌ی كات له‌ماڵی ئێمه‌ بوو ، ئه‌و كاته‌ی كاری نهێنی ده‌كرد له‌ حزبی شیوعی دا، مرۆڤێكی پاك و ڕاستگۆ بوو.

نه‌بیل تۆمی :

دانا جه‌لال شۆڕش بوو ، یه‌كسانی بوو، بۆیه‌ من به‌ هه‌ڵۆی كوردستان ناوی ده‌به‌م.

فایه‌ق سه‌عید :

من و دانا به‌یه‌كه‌وه‌ گه‌وره‌بووین و بووینه‌ نوسه‌ر به‌ڵام جیاوازییه‌كه‌مان ئه‌وه‌بوو كه‌ ئه‌و شۆڕشگێڕبوو، دانا دووباره‌ نابێته‌وه‌.

هه‌ڵاڵه‌ ڕافیع :

دانا جه‌لال كه‌سێك بوو به‌جیهانی بیری ده‌كرده‌وه‌، به‌ عه‌ره‌بی ده‌ینوسی و به‌كوردی قسه‌ی ده‌كرد، ڕاستگۆبوو له‌گه‌ڵ بیروباوه‌ڕی خۆیدا، كه‌سێك بوو بۆ خۆی نه‌ده‌ژیا به‌ڵكو بۆ ده‌وروبه‌رو هاوڕێكانی.

كۆڕیاده‌كه‌ نزیكه‌ی چوار كاتژمێری خایاند و چه‌ندین چالاكی جۆراوجۆری له‌خۆ گرتبوو وه‌ك خوێندنه‌وه‌ی شیعر و ووتنی حه‌یران و لاوانه‌وه‌ و به‌ خوێندنه‌وه‌ی هه‌ندێ له‌و ووتارانه‌ی له‌لایه‌ن نوسه‌ر و ڕۆشنبیرانه‌وه‌ بۆ كۆچی دوایی نوسه‌ر دانا جه‌لال نوسرابوو كۆتایی به‌ كۆڕیاده‌كه‌ هات.

  • 1