ئەمە بڵاوبكەوە
FaceBook  Twitter  

 

گرتنا چالاكڤانێن دەڤەرێ‌ ئەگەر ب ئاراستەیا هەمان سیاسەتا ترساندنا بالەفرێن توركیا بیت رەفتارەكا زێدە خرابە دەسهەلات پەیرەۆدكەت ..!

كومیتا پارێزگەها دهۆك یا حزبا شیوعی یا كوردستانی د جڤینا خوە یا ئیرۆ دە، رەۆشا دەڤەرێ‌ و بویەرێن ڤان چەند رۆژێن بوری ل دێرەلوك و شێلادزێ‌ نرخاندن و هەلویستێن خوە پێكئینان، دەمەكە هەست بهندێ‌ دهێتەكرن، كو رۆژ ب رۆژ هێرەشێن توركیا پتر یێ‌ نێزی جهێن ئاكنجیبوونا خەلكێ‌ دەڤەرێ‌ دبن، ئێدی ژیانا خەلكێ‌ یا كەڤتیە بن مەترسیان، پێشبینیا ئەنجامدانا تراژیدیێن نەخوازراو لێدهێتەكرن.

هاوەلاتیێن دڤان چەند رۆژان دە شەهیدبووی، خەلكێ‌ دەڤەرێ‌ زێدە ئێشاند،تورەبوون گەهشتە وان ئاستان ب ئیرادەك مەزن د خوەپیشاندانەكا رەوا دە، مەسیجەكا بەرخوەدانێ‌ ئاراستەی دەولەتا توركیا بكەن، كو ئێدی ئەو لهەمبەری هێرەشێن وان بێدەنگ نابن..!

گرتنا چالاكڤان و خوەپیشاندەرێن دەڤەرێ‌، ئەگەر ب ئاراستەیا هەمان سیاسەتا ترساندنا بالەفرێن توركیا بیت، رەفتارەكا زێدە خرابە دەسهەلات پەیرەۆ دكەت، ئەڤە د ناڤەرۆكا خوەدا نەلوژیكە، چونكە لجها پێكئینانا گڤاشتنان لسەر خەلكێ‌ ستەم لێكری، فەرە هەول و بزاڤێن خوە خستبانە كاری، ب هەماهەنگی دگەل بەغدا سنور بو زێدەگاڤیێن هوڤانە یێن توركیا وێنەكربان.

میزاجێن گرتنا ئوفیسێن كەنالێن راگەهاندنێ‌ و دەستەسەركرنا چالاكڤان و خوەپیشاندەران، دیاردەكا كرێت و نەشارستانییە، د هەمان دەم داژی پێلێنانەكا بەرچاڤە د بیاڤێن ئازادیا رادەربرینێ‌ دە، ئەڤ سیاسەتە ب چ ئاوایان خزمەتا دوزا رەوایا گەلێ‌ مەناكەت، فەرە ئەڤ رەۆشە بداوی بێت، هەموو چالاكڤان و خوەپیشاندەر سەربەست بهێنە ئازادكرن.

حزبا شیوعی یا كوردستان - كومیتا پارێزگەها دهۆك

28/01/2019

 

چالاکی حزبی