ئەمە بڵاوبكەوە
FaceBook  Twitter  

ئامادەكردن: فەرمان حوسێن

 ئەمەیخوارەوە بەشێك لەو هەڵوێستانەی مەكتەبی سیاسی حزبی شیوعی كوردستان، كە لەمەڕ رووداوەكانی ساڵی (2019)دا هەبوو لە جیهان و عێراق و كوردستان روویداوە و هەڵوێستی خۆی راگەیاندوە.

 نەبەردی خەڵكی شێلادزێ دژ بە هێرشەكانی سوپای توركیا

رێكەوتی 2019/1/6حزبی شیوعی کوردستان، بەیاننامەیەكی بڵاوكردەوە تیایدا هاتبوو: ئەم ڕەوشە کە هاوکاتە لەگەڵ دەستدرێژییەکانی سوپای تورکیا و بەردەوامبوونی قوربانی خەڵکی سڤیل وایکرد کە دوای شەهید بوونی ژمارەیەک لە ڕۆڵەکانی دەڤەری شێلادزێ لە ئاکامی بۆردومانی فڕۆکەکانی تورکیا، جەماوەری تێکۆشەری ئەم دەڤەرە لە نەبەردییەکی تێکۆشەرانەدا پەلاماری بارەگای سوپای تورکیا کە لەم دەڤەرە بنیاتی ناوە، بدەن و دەست بەسەر چەندین تانک و ئۆتۆمبیلی سەربازی سوپای تورکیا بگرن و سەربازە دیلەکانیش تەسلیمی هێزی ئاسایشی حکومەتی هەرێمی کوردستان بکەن.

 5ی ئادار رەتكردنەوەی دیكتاتۆریەت بوو

رێكەوتی 2019/3/5حزبی شیوعی کوردستان، بەیاننامەیەكی بڵاوكردەوە تیایدا هاتبوو: خەباتی جەماوەری و ئازادیخوازی گەلی كوردستان، بەهەموو پێكهاتەكانییەوە، لە5ـی ئاداری 1991 بەپیشتیوانی بەرەی كوردستانی، لەدژی زوڵم‌و ستەمی رژێمی بەعس‌و سەدامییەكانی عێراق ، راپەڕینی مێژوویی خۆی بەرپاكرد، كە حزبیشمان، حزبی شیوعی،  رۆڵی سەرەكی‌و پڕ لەشانازی لەم نێوانەدا بەردەكەوێت و توانی بە قورساییەوە بەشدار بێت لە ئازادكرنی تەواوی ناوچەكانی ژێر دەسەڵاتی رژێمی پێشوو.

 وەزیری دەرەوەی تورکیا

رێكەوتی2019/3/30حزبی شیوعی کوردستان، بەیاننامەیەكی بڵاوكردەوە تیایدا هاتبوو: وەزیری دەرەوەی تورکیا بەوپەری نابەرپرسانە لە میانەی تێروانینێکی سواوو شۆڤینیانەوە جارێکی تر بەو ووتە ناهاوسەنگەیەوە کە شاری کەرکوک شارێکی تورکمانیە دەبێتەوە خوڵقێنەری زەمینەی ئاژاوە و فیتنەی تێکبەردانی نەتەوەکانی ئەو شارە

 ساڵڕۆژی تاوانی ئەنفال

رێكەوتی2019/4/14حزبی شیوعی کوردستان، بەیاننامەیەكی بڵاوكردەوە تیایدا هاتبوو: لەم ڕۆژە خەمناکەدا داواكارین حکومەتی ناوەندی بەغدا بەڕەسمی و بەبێ دوو دڵی داوای لێبوردنی فەرمی لە خەڵکی كوردستان و قوربانی ئەو تاوانه درندایە بکات و هەرچی زووە قەرەبووی مادی و مەعنەوی کەس و کارەکانیان بکرێتەوە، وه‌ پێویسته به زترین كات کار لەسەر گەراندنەوەی رووفاتی قوربانیان بکرێتەوە.

رۆژی جیهانی كرێكاران

رێكەوتی 2019/5/1 حزبی شیوعی کوردستان، بەیاننامەیەكی بڵاوكردەوە تیایدا هاتبوو: تێکۆشانی چینایەتی لە کوردستاندا لە تێکۆشانی نیشتمانی گەلەکەمان دانابڕێت، و هەردەم کرێکاران و ڕەنجدەرانی بیروبازوو، و تەواوی زەحمەتکێشانی گەلەکەمان لە ریزی پێشەوەی داکۆکیکردن لە کوردستان بوونە، و قوربانییان لەم پێناوەدا داوە، و زۆر بە ڕوونی و ڕاشکاوی لە پێناوی مافی چارەنووسی گەلی کوردستان لە سەنگەری بەرەنگاریدا بوونە، و سازشیان لە سەر مافە ڕەواکانی گەل نەکردووە.

  بارگرژی نێوان ئێران و ئەمریكا

رێكەوتی 2019/5/18 حزبی شیوعی کوردستان، بەیاننامەیەكی بڵاوكردەوە تیایدا هاتبوو: پیادەكردنی سزا ئابورییەكانی سەر ئێران و هەرەشەكانی هەردوولا بۆ هەڵگیرساندنی شەری سەربازی بە پلەی یەكەم خەڵكی هەژارو كرێكارانی بیرو بازو باجی دەدەن، و رێگا لە گۆرانكارییەكان لە سەر بنەمای ئیرادەی گەلان دەگرێت، لە كاتێكدا بنەمای شەرو ململانێكانی وڵاتانی سەرمایەداری رۆژئاوا و وڵاتانی رۆژهەڵاتی ناوەراست پەیوەندی بە گۆرانكاری بە ئاراستەی ژیانێكی باشتر بۆ خەڵكی زەحمەتكێش و بزوتنەوەی رزگاری خوازی نیشتمانییەوە نیە، بەڵكو لە لای وڵاتانی رۆژئاوا مەبەست لێی دۆزینەوەی بازاری تازە و بابەتی وزە و زیادكردنی خەرجی سەربازییە لە چوارچێوەی ئابوری جەنگ و پێنەكردنی قەیرانەكانی سیستەمی سەرمایەداری.

 ناوچە جێناكۆكەكان

رێكەوتی 2019/5/20 حزبی شیوعی کوردستان، بەیاننامەیەكی بڵاوكردەوە تیایدا هاتبوو: لە دوای ئەو بارودۆخە ئەمنی و سەربازیەی پاش ئۆكتۆبەری ١٦ ی ٢٠١٧ بە درێژایی سنورەكانی ناوچە جێناكۆكەكان دروست بووە، ڕۆژ لە دوای ڕۆژ ستەم و سەركوت و ملهوڕی دژ بە كوردستانیانی سڤیل بە گشتی و جوتیاران و گوندنشینەكان دەچیتە ئاستی مەترسیدارتر.

خەرجكردنی مووچەی فەرمانبەرانی هەرێم

رێكەوتی 5/28/ 2019 حزبی شیوعی کوردستان، بەیاننامەیەكی بڵاوكردەوە تیایدا هاتبوو: جارێكی تر دووپاتی دەكەینەوە كە دەبێت حكوومەتی هەرێم پابەند بێت بە خەرجكردنی مووچەی فەرمانبەرانی هەرێمی كوردستان و تەسفیەی حیساباتی دارایی خۆی لەگەڵ حكومەتی فیدراڵی بكات ناكرێت پاش هەموو ئەو ساڵانە لە سەپاندنی زۆرملێیانەی پاشەوكەتی مووچە و بەتایبەت پاش بڕیاری هەڵوەشاندنەوەی پاشەكەوتی مووچە، جارێكی تر حكوومەتی هەرێم دەست بۆ مووچەی فەرمانبەران ببات، كە ئەوەی ئێستا هەستی پێدەكرێت سەپاندنەوەی ستەمی پاشەكەوتی مووچەیە، بەڵام بە جۆرێكی تر.

 جینۆسایدی ئێزیدییەكان

رێكەوتی 8/3/ 2019 بە بۆنەی كارەساتی جینۆسایدی ئێزیدییەكان لە شنگال،حزبی شیوعی كوردستان بەیاننامەیەكی بڵاوكردەوە،لەو بەیاننامەیەدا حزبی شیوعی كوردستان وەك یەكەمین حزبی سیاسی لە عێراق و كوردستاندا راشكاوانە رایگەیاندووە(پێویستە كۆمەڵگای نێودەوڵەتی دان بنێت بە كارەساتی ئێزیدییەكان لە شنگال وەك جینۆسایدی و تاوانباران و ئەنجامدەرانی جینۆسایدەكە لە دادگایەكی نێودەوڵەتیدا دادگایی بكرێن).

 زیندانیانی سیاسی

 رێكەوتی 2019/8/28 حزبی شیوعی کوردستان، بەیاننامەیەكی بڵاوكردەوە تیایدا هاتبوو، یاسای تایبه‌ت به‌ بواری زیندانیانی سیاسی له‌هه‌رێمی كوردستان هەموار بكرێته‌وە بۆ ئەوەی زیندانینانی سیاسی له‌ هەرێمی كوردستان ئیمتیازاته‌كانیان كه‌متر نه‌بێت له‌وه‌ی له‌ به‌غدا هه‌یه‌.

  پشگیری كردن لە كۆپیشاندانەكانی خەڵكی عێراق

ررێكەوتی 2019/10/3 حزبی شیوعی کوردستان، بەیاننامەیەكی بڵاوكردەوە تیایدا هاتبوو: ئێمە لە حزبی شیوعی كوردستان - عێراق پشگیری تەواوی خۆپیشاندانە هێمنانەكانی خەڵكی عێراق دەكەین و داوا لە دەسەڵاتی بەغدا دەكەین هەرچی زووە وەڵامی داواكاریەكانیان بداتەوەو چیدی بە توندی بەرپەرچی خەڵكی زەحمەتكێش و برسی بەڕێگەی نادیموكراتیانە نەدرێتەوە، هەروا حزبی شیوعی كوردستان هەموو بەرپرسیاریەتێك لە پاراستنی گیانی خۆپیشاندەران دەخاتە ئەستۆی حكومەتی عێراق و دەسەڵاتە خۆجێیەكان.

 بە پەلاماردانی کوردستانی ڕۆژئاوا لە لایەن تورکیاوە

رێكەوتی 2019/10/9 حزبی شیوعی کوردستان، بەیاننامەیەكی بڵاوكردەوە تیایدا هاتبوو: ئێمە لەحزبی شیوعی کوردستان ئەم سیاسەتە شەڕانگێزی و داگیرکارییەی تورکیا بەتوندی مەحکوم دەکەین و داوا لەنەتەوەیەکگرتووەکان و تەواوی داکۆکیکارانی مافی مرۆڤ دەکەین لەسەرئاستی جیهان وناوچەکە ڕێگانەدەن تورکیا ئەم لەشکرکێشی و سیاسەتە دوژمنکاریەی جێبەجێ بکات کەدژی هەموو یاسا نێودەوڵەتییەکان و مافی گەلان و مرۆڤە بەگشتی، و دەبێتە ھۆی ئەنجامدانی کارەساتێکی مرۆیی لە رۆژئاوا، جگە لەوەی رێگا بۆ سەرھەڵدانی داعش و میلیشیا تیرۆریستییەکانی دیکە خۆش دەکات.

دەسگیركردنی سكرتێری كۆمیتەی ناوەندی حزبی شیوعی كوردستانی باكور

 رێكەوتی 2019/10/19حزبی شیوعی کوردستان، بەیاننامەیەكی بڵاوكردەوە تیایدا هاتبوو: سنان فتیورك سكرتێری كۆمیتەی ناوەندی حزبی شیوعی كوردستانی باكور لەسەر ڕەت كردنەوەی لەشكركێشی داگیركەرانەی توركیا بە ناو كانی ئاشتی بۆ سەر كوردستانی رۆژاوا، لە نێو ماڵەكەی خۆیدا لە ئامەد دەسگیر كرا.

 کۆبوونەوەی ژمارەیەک هێز و قەوارەی سیاسی لە ئەنجوومەنی نوێنەرانی عێراق لەنێویاندا هەندێک هێزی کوردستانی

 رێكەوتی 2019/11/20 لەبارەی کۆبوونەوەی ژمارەیەک هێز و قەوارەی سیاسی لە ئەنجوومەنی نوێنەرانی عێراق لەنێویاندا هەندێک هێزی کوردستانی، مەکتەبی سیاسی حزبی شیوعی کوردستان ڕاگەیەندراوێکی بڵاوکردوە کە تیایدا هاتبوو، ژمارەیەک هێز و قەوارەی سیاسی لە ئەنجوومەنی نوێنەرانی عێراق لەنێویاندا چەند هێزێکی کوردستانی لەسەر بەیاننامەیەکی سیاسی ڕێککەوتن کە چەند ڕێکارێکی بەناوی چاکسازی لەخۆدەگرێت و مۆڵەتی تا کۆتایی ساڵی 2019 دەدات بە سەرۆک وەزیرانی عێراق بۆ جێبەجێکردنی ئەوانەی کە ئەو هێزانە پێیان وایە چاکسازییە، لەکاتێکدا کە ئازارەکانی جەماوەری پەراوێزخراو کەڵەکە بووە و بەدەست بەرزبوونەوەی ڕێژەی هەژاری و نەبوونی دەرفەتی کار و کەمی داهات و نەبوونی بیمەکانی کۆمەڵایەتی و تەندرستی و سەرکوتکردنی دەنگی سیاسی دەناڵێنێت...تد).

 حزبمان وێڕای ڕەتكردنەوەی ڕەفتاری نادیموكراسیانەی ڕژێمی توركیا لە هەمان كاتدا داوای دەكات بەپەلەی هاوڕێ‌ سنان فتیورك و ئەو سەدان كەسایەتییە سیاسییەی لە ناوخۆی توركیادا لەسەر رەتكردنەوەی سیاسەتی شەرانگیزانەی دوڵەتی توركیا دەسگیر كراون، ئازاد بكرێن.

 ڕژاندنی خوێنی لاوانی گەلی عێراق

ررێكەوتی 2019/12/7 حزبی شیوعی کوردستان، بەیاننامەیەكی بڵاوكردەوە تیایدا هاتبوو: ئەو تاوانەی کە میلیشیا تایفییەکان لە ناوچەی سنەک و گۆڕەپانی خەلانی ڕوویاندا بەشێکی دیکەیە لە تاوانە قێزەوەنەکانیان لە ڕژاندنی خوێنی زیاتری هاووڵاتییانی مەدەنی کە جگە لە ڕاگەیاندنی ئیفلاسی سیاسییانە هیچی دیکە نییە.

ئێمە لە حزبی شیوعی کوردستان بە توندی سەرکۆنەی ئەو ڕێکارە سەرکوتکەرە قێزەوەنانە دەکەین کە حزب و میلیشیا تایفییەکان و دەسەڵاتی فەرمانڕەوا ئەنجامی دەدەن، ئیدانەی توندی ڕژاندنی خوێنی لاوانی گەلی عێراق دەکەین.

 

 

چالاکی حزبی