ئەمە بڵاوبكەوە
FaceBook  Twitter  

لەدرێژەی خۆپیشاندانە فراوانەكانی لە لوبنان، ڕۆژی یەكشەممە 20ی كانوونی دووەمی 2018 حزبی شیوعی لوبنانی بەهاوبەشی لەگەڵ هەندێك حزبی چەپ و سەندیكا و یەكێتی كرێكاران لە بەیروتی پایتەختی لوبنان خۆپیشاندانێكی جەماوەری فراوانیان ئەنجامدا بە بەشداری سەدان كەس لە خەڵكی ئەو وڵاتە كە تیایدا داوای پەلەكردن لە پێكهێنانی حكوومەت و چاكسازی لە سیستەمی هەڵبژاردن و كۆتاییهێنان بە دابەشكاری تایفی دەكرد. هەروەها جەختكردنەوەی لەڕاستكردنەوەی سیاسەتی ئابووری ئەو وڵاتە كە ڕووی لە داتەپین كردووە و چینێكی مشەخۆری سیاسی بازرگانی پێكهێناوە كە یاری بە ئێستا و داهاتووی ئەو وڵاتەوە دەكەن.

هەرچەندە كە دەسەڵاتدارنی لوبنان خوازیاربوون كە حزبی شیوعی خۆپیشاندانەكەی دوابخات بەهۆی ئەوەی كە لووتكەی ئابووری و پەرەپێدانی عەرەبی لەبەیروت لەهەمان كاتدا ئەنجام دەدرا، بەڵام ڕێكخەرانی خۆپیشاندانەكە مكووڕبوون لەسەر ئەنجامدانی و توانیان ئەنجامی بدەن لە ژێر دروشمی "هەموومان بۆ شەقام"، "ڕەتكردنەوەی سیاسەتی تاڵانی و تۆڵە و پەراوێزخستن".

حەنا غەریب ئەمینداری گشتی حزبی شیوعی لوبنانی بە ڕۆژنامەنووسانی ڕاگەیاندبوو: "خۆپیشاندانەكان بەردەوام دەبێت و ناوەستێت، تا دروستكردنی ڕەوتێكی میللی دژ بە دەسەڵاتی بێ دەسەڵات كە بۆتە هۆی هەژاركردنی گەلی لوبنان". هەروەها لەدرێژەی لێدوانەكەیدا غەریب گوتویەتی: "ئەو پارەیەی كە دەسەڵاتداران بۆی دەگەڕێن لەلای نەهەنگەكانی پارەیە نەك خەڵكی هەژار"! وەك پەرچدانەوەیەك بۆ زیادكردنی باجی دەرامەت و باجەكانی دیكە لەسەر هاووڵاتییان.

لەخۆپیشاندانەكەدا چەندین دروشم و لێدوان بەرانبەر بە نەهامەتییەكانی خەڵكی وڵاتانی عەرەبی و بەفیڕۆدانی سامانی نیشتمانی ئەو وڵاتانە خراونەتە ڕوو. هەروەها ڕەخنەی تووند لەدەسەڵاتدرانی ئەو وڵاتانە گیراوە كە ناتوانن خۆشگوزەرانی و پەرەپێدان دابین بكەن سەرباری ئەوەی كە سامان و سەروەتێكی ئێجگار زۆر لەبەردەستیاندایە.

شایەنی باسە، خۆپیشاندانەكانی حزبی شیوعی لوبنانی بەم دواییانە سەرنجی زۆری لەسەرە كە لەماوەیەكی كەمدا توانیویەتی زۆرترین خەڵك لەخۆی كۆبكاتەوە دژ بە سیاسەتی سیاسییەكانی لوینان كە گرفتی گەورەی هەیە و ناتوانێت حكوومەتی وڵاتەكەی پێكبهێنێت، هەروەها دژ بە سیاسەتی ئابووری ئەو وڵاتە كە خەڵكی وڵاتەكەی هەژار و سیاسییەكانی دەوڵەمەند كردووە.

 

 

چەپ وكرێكاری