ئەم هەواڵە بڵاوبكەوە
FaceBook  Twitter  

باوكم لە نەوەی قەتێ‌ بوو

لە كێڵگەكاندا دەژیاو

لە دەشتاییەكاندا مردووە

جل و بەرگی لە كاغەز بوو

دڵی لە نوور

كە دەستت لەدەستی دەنا

پەنجەكانی لەناو لەپت دەتوانەوە

دایكیشم لە شارێكی دوور

براكانم هێندێ‌ لە دەریاو بناران

هێندێكیشیان لە تەمتومانی كەناران

خوشكەكانیشم لە باكوور

ماڵێكمان هەبوو لە ترۆپكی چیا

ماڵێكیشمان لە دارستان

هەندێكمان لە ناو ڕەشماڵان لە دایك بووین

هەندێكیشمان لە گۆڕستان

جاری وابووە 

سپێدە نانمان لە كوێستان خواردووە

ئێوارە لە گەرمیاندا بارو بارگەمان خستووە

باوكم هێندە سەیری ئاسمانی كردبوو

هەموو ئەستێرەكانی دەناسی

هێندەی دەشتاییی بڕی بوو

هەموو گوڵە گەنمەكان

لە پێشوازییا دەوەستان

هێندە بە ناو دارستانەكاندا ڕەت ببوو

قسەی لەگەڵ هەموو بایەكان كردبوو

هێندە بارانی بەسەردا باری بوو

ڕەنگی بارانی گرتبوو

هە میشە كتێبێكی لە بەر باخەڵیا دەنا

لە هەر شوێنێ‌ لەسەر هەر بەردو كانییێ‌

لە هەر لێوارو بنارێ‌

دەگەیشتینە هەر تاولییێ‌

كتێبەكەی دەردەهێناو دەیخوێندەوە

دەچۆوە نێو نیشتمانی ئەبەدی خۆی

باوكم كە كتێبی دەبینی

هەموو دونیای لە بیر دەكرد

دواجار باوكم كتێب كوشتی

هەر بەكتێبەوە ناشتمان

بۆ هەر شوێنێ‌ بارمان دەكرد

ئێسك و پروسكەكانیشمان دەخستە ناو كیسەیەك

ئەو شارو شارمان پێدەكرد

لە شیرازەی هەر كتێبێ‌ 

حیكمەتێكی دەنووسییەوە

لەسەر هەموو لاپەڕەیەك پرسیارێكی داڕشتووە

باوكم بە بۆنی كتێبان

دەیزانی كەی هەور دێ‌ و باران دەبارێ‌

با لە كام لاوە هەڵدەكا

هەر بە بۆنی كتێبانیش

كۆچی خێلی ڕادەگرت و دەیزانی بەفر دادەكا

باوكم كتێب كووشتی ئەو رۆژەش كە شاردمانەوە

تەمتوومان بوو دوو كتێبمان كردە كێلی گۆڕەكەیو

بۆ یەكجاری دامانەوە دەست نیشتمان

ئێستاش ئەگەر ئەو درەختەی شیعر نەبێ‌

كە لەسەر گۆڕی شین بووە

كەس گۆڕەكەی ناناسێته‌وه‌

جار جار سەری هەڵدەگرت و

دەیدایە ناو ده‌شت و كێوان

بە هەفتەو بە مانگ ونده‌بوو

كاتێ‌ كە دەگەڕایەوە

توورەگەیێ‌ كتێبی لە گەڵ خۆی دەهێنایەوە

دایكم سەر لەبەری قورئانی لەبەر بوو

هێندەی ئەو كتێبە خوێندبۆوە

ڕەنگی ئاسمانی گرتبوو

دوا جار كە بینیم

لەسەر ئەو بەرماڵەی باوكم بەر لە سەد ساڵ

لە ماڵی خودای هێنا بوو

سەری بە قورئان كردبوو

دوا سورەتی دەخوێندەوە كە مردبوو

بە بیرم دێ‌ هەمیشە كتێبەكانی باوكمی ڕیز دەكردو

لە تۆز پاكی دەكردنەوە

هەمیشە دەیگوت

لە سای كتێبەكانی باوكتان من هەزار مناڵم هەیە

هەزار گەنجینەی قارون و هەزاران گەوهەرم هەیە

ئەویشمان وەك قەددیسێ‌ لە بخوور

لە ژێر درەختەكەی شیعر ناشت

ئێستاش بۆ هەر لایێ‌ دەچم

بۆ هەر وڵاتێ‌ سەر هەڵدەگرم

ئەو دوو گۆڕە وەك دوو ئاگر

وەك دوو دڵۆپێ‌ لە نوور

وەك دوو درەختێ‌ لە بخوور

لە گەڵما دێن.