ئەم هەواڵە بڵاوبكەوە
FaceBook  Twitter  

محەمەد مشیر

تەمەنم بەرگێكی سپی پۆشیوە

بەنیازە بچێتە سەفەرێكی دوور 

خۆشم نازانم دەگەڕێتەوە یان نا؟!

تاڵە سپییەكانی سەرم 

بێڕەنگتر لە جاران دەچنەوە

"بریا" بە بیری نایەتەوە

لە زستانێكی دامەن سپی هاتۆتە دنیاوە

زستانێك لە تاڵە سپییەكانی سەرم دەچێ‌

سەرم تۆراوە و ئاشت نابێتەوە!

سەفەر بۆ من بەهارێكی هەمیشەییە

من لەوێدا..

لە بەر سێبەری كەزییەكانی ئاو 

ئاوێتەی مۆمە سووتاوەكان دەبمەوە

لە ژێر تاڤگەكانی تیشكی هەتاو

بە لەشێكی بێڕەنگتر لە ئاو

خۆم لە ئاو هەڵدەكێشمەوە

سەفەر..

وازم لێناهێنێ‌ سەفەر

لە نێو سەفەردا سەفەر دەكەم

بۆ كوێ‌ دەچم ئەو لە دوامە..

من لەو تێر نابم و 

ئەویش هەموو شەوێ‌..

ختوكەی حەزە تێرنەبووەكانم دەدا 

لە نێو سەفەردا سەفەرم كرد

هێندە گەڕام تا خۆمم دۆزییەوە

بەڵام ئەفسوس زۆر هاوڕێم ونكرد!

(گەڕان) و (ونكردن)...

لە سەفەرە هەمیشەییەكەی مندا

دوو لەتی پرتەقاڵێكن

تا (ون) نەكەی (هیچ) نادۆزیتەوە

دەشێ‌ ونكردنیش لە سەفەردا دۆزینەوەیەكی نوێ‌ بێ‌!

لە نێو سەفەردا سەفەر دەكەم

دەچمە بەرزاییەكانی قەندیل

سۆراخی مێلاقە سوورەكانی ئەوێ‌ دەكەم 

پرسە بۆ رێواس و رەنووە بەفرەكان دادەنێم

دەگەڕێمەوە گۆڕستانەكەی (حوجران)!؟ 

تێر تێر بۆنی گوڵە سوور و شینەكان دەكەم 

لە دوا وێستگەی سەفەری ناو سەفەرەكەمدا

خیوەتێك لای چەپی گۆڕستانەكە هەڵدەدەم و..

پرسە بۆ خۆم دادەنێم!!