ئەم هەواڵە بڵاوبكەوە
FaceBook  Twitter  

غەمگین بۆڵی

 

ئەو بەردانەی نەشتەرگەری دڵنەرمبوونیان كردووە

ئەو ئوتۆمبێلانەی پەنچەرەكانیان پڕن لە روانین

سەگی فگوڕ و

كەری سەرخۆشیش

چووزانم!

هەموو ئەوانەم خستۆتە ناو شیعرەوە.

...

(ئەرێ هیچ هەڵەیەك هەیە؟)

خۆشحاڵم بەوەی...

شیعرم پڕە لەو بەردانەی بە كەڵكی هاوێشتن نایەن!

خۆشحاڵم بەوەی...

شەقامی پەیڤەكانم پڕن لە ئوتۆمبێلی رەنگاو ڕەنگ

خۆشحاڵم بەوەی...

حەپە حەپی سەگ، لە ناو خەیاڵەكانمدا رۆژە رێیەك دەرۆن!

خۆشحاڵم بەوەی...

كەرم، لە شێر خۆشتر دەوێت!

ژیانی من ئاوایە

خۆم ژیانی ئاوام ویستووە.

...

(ئەرێ‌ هیچ هەڵەیەك هەیە؟)

ئەم ژیانەی من : تەنیا بۆ مرۆڤەكان نییە!

ئەم ژیانەی من : تەنیا بۆ خۆشەویستەكان نییە!

ئەم ژیانە، بۆ هەموو ئەوانەیە كە ئەم ژیانەیان دەوێـت

ژیانی من بە بێ ئەوانە مردنێكی زیندووە!

ژیانی من پڕە لەو كچانەی رووباری ئومێدیان وشكی كردووە.

...

(ئەرێ هیچ هەڵەیە هەیە؟)

نازانم!

(بیریش دەكەمەوە هەر نازانم!)

ئەرێ ژیانی من كێشەی بۆ كێ دروستكردووە؟

با ژیانی من، وەك ژیانی من بێت

با ژیانی تۆ، وەك ژیانی من نەبێـت

با هەر كەس دونیای خۆی هەبێـت

با هەر كەس خۆی (خۆی) هەبێـت.

...

(ئەرێ‌ هیچ هەڵەیەك هەیە؟)

من هەم ژنی پیاوانەم خۆشدەوێت و

هەمیش پیاوی ژنانە!

من هەم تۆم خۆشدەوێت و

هەمیش ئەو ژنانەی رقیان لە مێردەكانیانە.

من هەم تۆم دەوێت و

هەمیش ئەو كچانەی رووبارەكانیان هاژەیان دێت، لە بێئومێدی!

من كێشەم لەگەڵ ژیانی هیچ كەسێكدا نییە،

من دەمەوێت ژیانی خۆم هەبێـت،

من دەوێت تۆم هەبێت ... تۆۆۆۆۆۆۆ...

...

(ئەرێ‌ هیچ هەڵەیەك هەیە؟)

تۆ بدوێ!

با ژاوە ژاوی ئەو دونیایە قۆڕە نەمێنێت

تۆ بدوێ!

با چۆلەكەكانی حەوشە بزانن

دونیا بەو هەموو قۆڕییەی خۆیەوە خراپ نابێت!

تۆ بدوێ!

با هەموو شتێك

وەك دڵم بە دەوری تۆدا

بخولێتەوە!

من بێزاربووم!

لەو چیرۆكانەی كە هەمیشە هەن

من بێتاقەت بووم!

لەو چیرۆكانەی كە دونیا قۆڕە و

پیاویش

پاڵەوانە

من بێز لەو چیرۆكە قۆڕانە دەكەمەوە

من رقم لە چیرۆكە قۆڕەكانی دونیایە

تكایە!

...

باسی چیرۆكی خۆتم بۆ بكە.

...

(ئەرێ‌ هیچ كێشەیەك هەیە، ئەگەر ژیانی من وەها بێت؟)

--------------