ئەم هەواڵە بڵاوبكەوە
FaceBook  Twitter  

غەمگین بۆڵی

باران بە خەیاڵی چاوت دەبارێت 

شۆستەكانیش بەیادی ڕووبارەكان

فۆتۆی ئاو دەگرن

گوڵەكانی حەوشە بەخەیاڵی شەونمەوە خۆیان تەڕ دەكەن

وەك ئاسمانی چاوەكانم سەربانی ماڵەكانیش

تەڕ

زستان 

لە پێناو ئەڤینی هەورەكانەوە دەكۆخێت 

بروسكەكان بە دەنگێكی گەورە سەرما بڵاودەكەنەوە 

مریشكەكان و كۆترەكان 

لە كۆڵیتەكانیاندا دووعا بۆ ئاسمان دەكەن 

خۆر بە سەلامەتی بگەڕێتەوە

منیش بێ تۆ 

تەزیوی ئەو شەقامانەم كە پڕن لە دەستی سارد 

هەڵدەلەرزم و 

چاوم خوناوی سوێر دەگرێت

هەڵدەلەرزم و 

بیر لە بەتانییە گوڵگوڵییەكەمان دەكەمەوە

بە یارمەتی گەرمایی دەستەكانت

دەتوانن دەست بۆ هەموو شتە مەحاڵەكان بەرن 

دەستەكانم

بێ دەستەكانت 

دەستەكانم غەمبار دەبن

حەز ناكەم لەناو كونی گیرفانەكانم بێنە دەرەوە.

"باران لە ژوورەكەم دەبارێت

من لەسەر شۆستەكاندا هەست بە سەرمای بێ ئەڤینی تۆ دەكەم

تێدەگەم 

پیاسەكردنی ژێر باران بەتەنیا

كارێكی چەند گەمژانەیە."

....

بەشێك لە شیعری (باران لە ژوورەكەم دەبارێت)