ئەم هەواڵە بڵاوبكەوە
FaceBook  Twitter  

ناوی نووسەر: ئەسعەد جەباری

نووسەر لە پێشەكی كتێبە كەیدا

دوای كۆچی دوایی هاوڕێی تێكۆشەری رێگای رزگاری كوردستان و عیراق هاوڕێ "عەزیز محەمەد"، سكرتێری پێشووی حزبی شیوعی عیراق، كەوتمە بیركردنەوە ئاخۆ بۆچی تاكو ئێستا ئەو تێكۆشەرە خەباتگێڕە یاداشتەكانی خۆی نەنوسیوەتەوە تاكو هاوڕێیان و هەڤاڵانی حزبەكەی لەلایەك و تێكۆشەرو رۆشنبیرانیش بزانن وێستگەكانی ژیانی ئەو شۆڕسوارە بەو هەموو هەورازو نشێوە چۆن بووەو گەیشتوەبەچی، بەڵام ئەوەی جێگەی خۆشحاڵی ئێمە بوو ئەوەبوو كە كاتی خۆی دیدارێكی ناوبراو هەبوو بەزمانی عەرەبی لەلایەن بەڕێز رۆژنامەنووس "تەوفیق ئەلتەمیمی"یەوە وەكو نامیلكەیەك ئامادەی كردبوو لەشێوەی دیدار لەگەڵ تێكۆشەرانی حزبی شیوعی، بەشێكیانی تەرخان كردبوو بۆ دیدارێك لەگەڵ هاوڕێ "عەزیز محەمەد"، ئەوەی دەبینرێ ئەم دیدارە هیچی كەمتر نیە لەنووسینەوەی یاداشت بەجۆرێك كە پرسیارەكان و وەڵامەكانی هێندە ووردو درشتە كە رۆژنامەنووسی بەتوانا توانیویەتی ئەو تێكۆشەرە بێنێتە قسەو لەزۆر بابەتی گرنگ و هەستیار قسە بكات.

كاتی خۆی ئەم دیدارە بەچەند بەشێك ئێمە وەرمانگێڕایە سەر زمانی كوردی و بڵاومانكردەوە لەرۆژنامەی ئازیزی "كوردستانی نوێ" وەكو وەفایەك بۆ ئەو خەباتگێڕە، هەر لەو سەروبەندەشدا من هەمان دیدارم ئاڕاستەی راگەیاندنی هاوڕێیانی حزبی شیوعی كوردستان كرد تاكو بیكەن بەنامیلەكەیەكی سەربەخۆو ئەرشیفبكرێ لەپای ماندووبون و تواناو خەباتی ئەو كەڵە تێكۆشەرە لەكتێبخانەكانی كوردستان وەك سەرچاوەیەكی مێژووی سوودی هەبێت بۆ ئێستاو پاشەڕۆژ، بەداخەوە داواكەی ئێمە دواخرا لەكاتێكدا هاوڕێی تێكۆشەر هێشتا لەژیاندا بوو!.

بانگەوازێكم كرد لەئەكاونتی خۆمەوە لەفەیسبوك وەكو نیگەرانیەك بۆچی برادەرانی راگەیاندنی حزبی شیوعی نەهاتن بەدەم داواكاریەكەمانەوە لەكاتی خۆی، هەر پاش یەك رۆژ "دەزگای رۆشنبیری  هەژار موكریانی" لەهەڵەبجەی شەهید، ئامادەیی خۆیان دەربڕی بۆ لەچاپدانی ئەم نامیلكەیە!، ئیتر منیش زۆرم پێخۆشبوو كە هاتن بەدەم داواكاریەكەمانەوە، ئەوەبوو تەواوی ۆردی بابەتەكەم بۆ ناردن بەمەبەستی ئەوەی كە لەچلەی یادی خوالێخۆشبوو ئامادەی بكەن وەكو چاپكردن و بڵاویبكەنەوە لەوبۆنەیەدا!، تەنها 2رۆژی مابوو بۆ چلەكەی ئەوەبوو پەیوەندیم كرد بەبەرپرسی ئەو كتێبخانەیەو پێم ووتن بەڕێز چیتان كرد بۆ نامیلكەكە؟، لەوەڵامدا زۆر زۆر نیگەرانی كردم كە ئەو نامیلكەیە لەچاپ نادەن بەبیانووی ئەوەی كە ئەم نامیلكەیە هیچ نیەو بایەتێكی كاڵوكرچە بەگۆتەی لێژنەی هەڵسەنگاندنی كتێبخانەكەیان!، بۆیە لەچاپی نادەن!!، منیش زۆر بەڕاشكاوانە سەرزەنشتم كردن و ووتم لێژنەكەتان فڕی بەخزمەتكردنەوە نیەو خوێنەوارنین، ئەو بابەتە وەرگێڕانەو پێشتر بڵاوبوەتەوە، بۆیە چەند قسەیەكم بەلێژنەكەیان ووتن!.

دوای ئەوەی كە نیگەران بووم لەوەی كە كەس چاپی ناكات، هاوڕێی خۆشەویستم كاك ئاكۆ غەریب بەڕێوەبەری مۆزەخانەی نیشتمانی ئەمنەسوورەكە پێی ووتم نیگەران مەبە ئەم كتێبەشت بۆ لەچاپ دەدەین، ئیتر زۆر دڵخۆش بووم، لێرەوە زۆر زۆر سوپاسی دەكەم كە هەمیشە هاوكارمان بووە، هەروەها سوپاسی تەواوی ستافی مۆزەخانەی نیشتمانیی ئەمنە سوورەكە دەكەم، هیوای سەركەوتنیان بۆ دەخوازم، هیوادارم نموونەیان زۆربێت.

دەمەوێ لەكۆتاییدا ئاماژە بۆئەوە بكەم كە دەقی وەرگێڕانەكە لەژمارەكانی ( 6872، 6878، 6890 )ی رۆژنامەی "كوردستانی نوێ" بڵاوبوونەوە بەسوپاسەوە.

  • 1