ئەمە بڵاوبكەوە
FaceBook  Twitter  

هێشتا

لەگەرمیان 

چراکان شەو دەگرین

مانگ ئەستێرەکانی زەوی دەژمێرێ

ئاخر ،روناکی بەپێوە نێژرا

کەدێنە سەر باس 

رەنگی هەتاویش 

ڕۆژ لەئاسمانێ دێتە خوارەوە

بیابان دەگەڕێ

هەرگیز فەجر خۆی نادۆزێتەوە

هێشتاکە لەگەرمیان ئاگر بێکەسە

بڵێسەی ئێواران

لەدەستو پەنجەی کابان ونبووە

لەچاوەڕوانی خاوەنی خوێدا، 

سەگی بەردەرگا وەفا دەوەڕێ

هێشتا

لەگەرمیان

مردن لەسەر شان بای هەڵگرتووە

لەپرسەکاندا بەبێ چاوو ڕو

ئەنفال فاتیحا هەدیەدەکات و

قورئان دەخوێنێ

هێشتا لەگەرمیان ناڵەی بارانەو

باوکە رۆی ئاوە بەدوای شەپۆلدا

هێشتا لەگەرمیان.....

چارۆگەی دەستی درەختێکی پیر

مەرگی بەکۆمەڵ بیردەخاتەوە 

تەشتی نان دەڵێ کەڕوم هەڵێنا

کەس نەگەڕاوە بمکاتە نورردوو

سفرەی ژیانم بڕازێتەوە

دەنگی دیواردێ، دایە تۆ لەکوێی.

دەنگی دەرگادێ ، باوکە تۆلەکوێی

دەنگی پەنجەرە بەڕوی ئەنفالدا

خوایە تۆ لەکوێی؟!

چاوی سەبایە

زمانی یەکەمی خۆی ونکردووە

سیروان بگەڕێ دەریا بەدەریا.

ئەڵێن لەگەرمیان

بێدەنگی گەرمە

رێگا هەستاوە بەگـژ رێبواردا

کێڵگەی عوزر شۆر

بەدوای باراندا سکاڵایەتی

چاوساغی مەرگ شارەزای هەموو

کوچەو کۆڵانی ئەو شارانەیە

کاندیدی ژمارە(.......) و

زەمینی دۆڕاو 

هەرگیز پێکەوە ناچنە گۆرستان

هەرگیز پێکەوە ژیان هەوڵنادەن

هەرگیز پێکەوە نەمامی دەنگیان

بەدڵ ئاونادەن!

لەبیابانەکان

کاسەی سەر ئەدوێ

قـژ لەناو دەسماڵ .

گوارەو نقێم و بەندکو مۆری

تەسبیحو وێردوو

کاتژمێری خەوتو کران بەڕوماڵ

دەستێک زمانحاڵی 

هەموجەستەیەلەکاتی کوژتن

لەناو پەنجەکان هاوار هەڵدەڕژێ

خوداش بێدەنگی پەسندکردوە

گەرمیان ئیستاکەش گەرمی باوەڕە

کەچی دەمارێک

نەهات بەجوڵە لەهاودینەکان

هاوبەشی خەمبێ

زێبار بگەڕی دەریا بەدەریا

ونبوو رەگەزیان لەبیر کردووە!

بڕۆنە سەرچەم

سێبەری کچێک لەوێ کەوتووە

کە ڕایدەکێشن پێلاقە ئەدەن

بەکەمەریدا 

بەگژ شەهوەتی پۆستاڵی رەش و

نێچیری حەزی ئیسلامدا ئەچێ

دێن بەزۆرەملێ 

لەناو خۆیاندا هەراجی ئەکەن

هەتا تێر دەبن لەبێغیرەتی

ئینجا دەیکەنە خۆراکی بیابان

زێبار بگەڕێ دەریا بەدەریا

رەنگە شەپۆلێک بدۆزیتەوە

کەنداویش پڕە لەکەشتی نەگریس

ناوی خوادینن بەداوێنی پیس!

بڕۆنە سەر چەم

دوو هەشت پێکەوە گفتو گۆیانە

ئەنفال بەهەشت جار دەبەنە مێـژوو

لەجافەتیەوە دەست بێدەکەن و

هەتا بادینا دەرگا بەدەرگا

زەمی خوا دەکەن!

وای لەمن 

لە ئاگر فێر نەبووین

قۆناغ قۆناغ چەخماخە بدەین

مێژوو بەخوێن داگیرسێنین

هێشتا هەر ئێمە خاشاکین و

ئەوانیتر

لەبەر ئاگری خوێنمان گەرم دەبنەوە

ڕانەهاتین پێنوسەکانمان

بڵێسەی جاویدانی تۆمار بکەن

خودا خوێنەری هەتا سەرمان بێ

وای لەمن

لەهەڵم فێر نەبووین ئاو شی بکەینەوە

بەفیلتەری پاڵاوتندا نەبوینە باران

بۆیە هەر تەرمی وشک بەخاک دەسپێرین و

پرسەی سوور دەبەینە مزگەوتە

بێ دەسنوێژەکانی کوردایەتی

لەتەمومـژ فێر نەبووین

سەرما بکەینە سەهۆڵبەندان

ڤایرۆسە خۆماڵیەکان قڕ بکەین!

ئێمە لەهیچ فێر نە ووین !

خاک سەروەرە

بەڵام سەر لەخاكدا 

بیر کردنەوەی لەدەستداوە.

ئەڵێن ئاووو ئاوەدانی

بەڵام لافاو قاندڕی گیانەو

درەختی زیندوو

کەبەزمانی هەنار ئەدوێ

لەگەڵ تەرمە هەتاویەکان ڕائەدات و

بەتەوژمی هەورە تریشقە

خێرو شەر دەپێچیتەوە بۆ ناو دەریا.

ئەنفال لەچرکەساتی یەکەمدا

وای پێگوتین!

ئاگر ڕەمزی سەرکەوتنە

ئاگرو ئازادی هەردوکیان بەیەکەوە

ئاهە نگی ژیان ساز دەکەن و

ماڵبەماڵ پەیامی روناکی هەڵدەگرن

لەزەردەشتەوە ئاگر 

هاتە ناو باوەڕمان و هەتائیستاش

لەبڵێسە نەکەوتووە

بەڵام کاتێ بریسکەی شمشێر 

لە ناو ژاوەژاوی بتەکانی قورەیش دەرکەوت

لەنیمچە دوورگەیەکەوە

بە فتوحات هاتەناومان

ئەنفال گوتی دۆزەخ هەیە!

دیسانەوە لەمن ئەنفالستانە

لە نێوانی مێـژووی رەش و

دوبارە بونەوەیەکی رەشتردا

تە نیایی خەریکە بمان تەنێتەوە

ریسالەیەکیتری بێدەنگی هاتووە

دوانامە بۆسوڵتانێک

کوردبونمان لەخودا دەستێنێ

قڕانمان تاقیدەکاتەوە

ئاخر چتاوانێکم کردووە

لەسەر بێخاکی خاکمدا

لەنەبونی هەبونمدا

لەزانینی نەزانیمدا

چتاوانێکم کردووە

سبحانك

لا علم لنا

الا ما علمتنا!.