ئەمە بڵاوبكەوە
FaceBook  Twitter  

هونەری شێوەكاری لەدیدی هونەرمەندان و رۆشنبیرانەوە جوانناسییەكان دەبیننەوە، بۆیە لەپێشانگاكانداو لەو شوێنانەی تابلۆیەكی هونەری دەبینرێ‌ سەرنجەكان لەوێدا كۆدەبنەوەو خەیاڵ دەگاتە ترۆپك و شوێن دەست و فڵچەی هونەرمەندەكە دەكەوێ‌، ئێمەش لەو روانگەوە دەڕوانینە ئاوێتەبوونی رەنگەكانی مامۆستا فەیسەڵا، ناشێ‌ كەباس لە هونەری شێوەكاری بكەین ئەو ناوە لەبیر بكرێ‌، لەم دیدارەمان لەگەڵ ئەو بەرێزە وێنەی نوێی شیعری و مانای نوێتری رەنگەكانمان دۆزییەوە، پانتاییەك لە داهێنان پێی گوتین ئێمەش دەتوانین تابلۆی وەك مۆنالیزامان هەبێ‌و تەواوی داهێنانەكان پیشانی ئەوانی دی بدەین..

دیمانە: هێرش مەغدید

-لە نێوان قوتابخانە هونەرییەكان، كامە قوتابخانە بە باش دەزانی بۆ ئەوەی بینەر چێژی زیاتری لێ‌ وەربگرێ‌؟

+ریالیزمی ئینتباعی جوانترین قوتابخانەیە بۆ من كە چێژی زیاتری لێ‌ دەبینم، بەڵام لە كارە هونەرییەكانم هەردەم لە هەوڵی ئەوە بوومە كە بەوپەڕی بە چێژتر بگەیەنمە بەرچاوی بینەر لەبەر ئەوەی ئینتباعی برتییە لە بەكارهێنانی رەنگ بەشێوەیەكی فیزیایی.. واتە جۆری تێكهەڵكێشی‌و تێكەڵكردنی رەنگەكان‌و رەنگدانەوەی بەشێوەی بەستنەوە بە هەموو فۆرمەكانی نێو تابلۆ.. مەبەستم، دەبێت شێوەكاری ناو تابلۆ بە رەنگ هاوبەشی لەگەڵا یەكتری دروست بكەن، بۆ نموونە ئەگەر مرۆڤێك بە جلێكی رەنگاورەنگ لە كاتی باران لە شەقام بڕوات یان چەند خانوویەكی رەنگاورەنگ لەسەر رووبارێك.. رەنگی سەرەكی جل‌و بەرگی مرۆڤەكان یان خانووەكان یان هەر تەنێكی تر لەناو ئاودا بە رەنگدانەوەی فۆرمەكان یەكتری دەبەستێتەوە.

-هەندێك پێیان وایە هەڵبژاردنی قوتابخانەیەكی تری هونەری لە بەرامبەر قوتابخانە ریالیزمەكان، هەڵاتنە لە واقیع، یان بە دیوێكی تر نەبوونی سەلیقەی هونەرمەندە تۆ چی دەڵێی لەو بارەیەوە؟

+بەڕای من ئەو تێبینییە هەموو هونەرمەندان ناگرێتەوە، بۆ نموونە ئەو هونەرمەندانەی كە بەشێوەیەكی ئەكادیمی هونەرییان خوێندووە تجروبەی هونەرییان زۆرە‌و یان لە دەرەوەی وڵات ژیاون، ئەمانە شێوازی گواستنەوەیان لە واقیع بۆ تەكنیك‌و نوێخوازی دروستترە، بەڵام زۆربەی زۆریشی ئەوانەی كە بەشێوەكی ئەكادیمی برەویان بە پێشكەوتنی خۆیان نەبینیوە، دەتوانم بڵێم ئەوانە زۆربەیان لە واقیع هەڵاتوون، ئەگەر هەڵنەهاتوون بۆچی لەسەر واقیع بازیان داوە، بێ‌ ئەوەی هیچ كەسێك رۆژێك تابلۆیەكی واقیعی ئەمانەی دیبێ‌. من لە وەڵامەكەم مەبەستم نییە لە كاری تەكنیك‌و نوێخوازی كەم بكەنەوە، من زۆر بە زەحمەتتری دادەنێم لە واقیعی، بۆ نموونە كارێكی (تجرید) یان رووتەڵەكی كە هیچ فۆرمێكی دیاریكراوی تیانییە، زۆرجار زەحمەتترە لە كارێكی واقیعی، چونكە كاری نوێخوازی دروست لە كارێكی هونەرمەندێكی بە ئەزموونی واقیعی ئەكادیمی زۆر پڕچێژی جوانترە لە كەسێكی تری بێ‌ ئەزموون، من لێرەدا نموونەیەكیش بۆ ئەم راستیە دەهێنمەوە زۆر جار سمپۆزیوم لەناو سروشت یان لەسەر شەقام ئەنجام دەدرێت دەبینین كەسەكە كەم ئەزموونەكان لە كاری ئەكادیمی واقیعی دەچن لەناو سمپۆزیوم كاری تجریدی دەكێشن، كە زۆر هەڵەیە چونكە سمپۆزیوم لایەنێكی كەشتیاری بەرامبەر بە جەماوەر دەبەخشێ‌، كەسی بەرامبەر حەز دەكات بزانێ‌ چۆن تۆ ئەم سروشتە بە شێوازی خۆت دەگوازییەوە ناو تابلۆ.. ئالێرەدا یەكسەر ئەم پرسیارە دروست دەبێ‌، كە ئەگەر سروشتەكەت نەگواستەوە دیارە لە واقیع هەڵدێیت.

-دەكرێت باسی شێوازی كاركردنی خۆتمان پێ‌ بڵێیت، بۆ نموونە بە چ ستایلێك كاردەكەیت‌و وە بە قابارەی چەند‌و وە چ كاتێك بۆ تۆ گونجاوە بۆ دروستكردنی تابلۆ؟ 

+من بەشێوەیەكی گشتی شێوازی ئەكادیمی واقیعی پەسەند دەكەم، بەڵام هەردەم بەشێوەیەكی شەفاف‌و بەكارهێنانی رەنگ بەشێوەیەكی فیزیایی، چونكە هەردەم هونەرمەندی سەركەوتوو لای من ئەو كەسەیە كە كەمترین رێژەی رەنگ بڕێژتە سەر خام جوانترین تابلۆی شەفاف‌و جوان دروست بكات، بەڵام ئەگەر زۆر رەنگ لەسەر یەكتری كەڵەكە بكات بێگومان بە تابلۆی سەركەوتووی نازانم ئەوە تەنها رای خۆمە. وەكات لای من زۆر گرنگ نەبووە، چونكە لە هەموو كاتەكان مامەڵەم لەگەڵا رەنگەكان كردووە.. شەو.. رۆژ.. زستان.. پایز.. هاوین..بەهار.. بەڵام شوێن لای من گرنگ بووە، وە ئەو شێوازە شەفافیەی كە باسمكرد زۆربەی بە رەنگی ئاوی‌و ئەكریلك‌و ئەنجامدانی پەسەندترە لای من بۆیە من لە ئێستادا زیاتر كاری ئاوی دەكەم.

- وەك ئاگادارین داوەتی یەكێك لە پێشانگا گەورەكانی لە دەرەوەی وڵات دەكرێت بە كورتی باسی ئەو گەشتە‌و بەرنامەی ئەو گەشتە بكەیت؟ 

+من لە دەرەوەی وڵات چالاكی زۆرم ئەنجامداوە، لە نێوان ساڵانی 2011 تاكو كۆتایی 2018 یان بڵێین تاكو ئێستا لە زۆربەشیان خۆم تیایدا ئامادەبوویمە لەوانە: * دوو پێشانگای رەنگی ئاوی لە مەغریب لە هەردوو شاری ئەغادیر‌و مەراكیش. *پێشانگاو سمپۆزیوم لە شاری براغ *پێشانگای رەنگی ئاوی جیهانی لە دوبەی. *پێشانگای رەنگی ئاوی جیهانی لە شاری براغ لە چیك. *سمپۆزیومی گروپی زیرفاس لە پاریس. *لە 25ی ئەم مانگە 25/4/2019 تاكو 5/5/2019 لە گەورەترین پێشانگای رەنگی ئاوی جیهانی IWS لە شاری فبریانوی ئیتاڵیا بەشدارم كە زیاتر لە 500 هونەرمەندی رەنگی ئاوی لە سەرانسەری جیهان روو لەم شارەی ئیتاڵیا دەكەن.