ئەمە بڵاوبكەوە
FaceBook  Twitter  

 

دنیای ئاوازو گۆرانی، دنیای جوانی و دووبارە عاشقبوونەوە‌و دووبارە لە دایك بوونەوەیە، بەو پێیەی مرۆڤ لە دوای لە دایك بوونی یەكەم جار‌و دوای عاشق بوون جارێكی تر دەتوانێ‌ خۆی لەنێو دونیایەكی ئەفسوناوی تردا بدۆزێتەوە‌و خۆی بەرپرس بێت لەو ژیانە تایبەتییەتی كە هەڵیدەبژێرێ‌، گۆرانی‌و مۆسیقا دوو عاشقی یەكترین‌و لەنێو جیهانی ئاوازدا لە یەكتركردنیان زەحمەتە، بۆ ئەو دیدارە گفتوگۆیەكی كورت لەگەڵا هونەرمەندێكی بە سەلیقە (رزگاری فلوت) ئەنجام دەدەین.

دیمانە: هێرش مەغدید

-سەرەتای كاری هونەریت دەگەڕێتەوە بۆ كەی؟

+دەستپێكی كاری هونەریم ساڵی 2004 لەبەرنامەیەكی پێشبركێی كەناڵی ئاسمانی كوردسات كە تایبەت بوو بە دەنگ خۆشی، توانیم ببمە یەكەمی بەرنامەكەو لەو ساتەوە وەك یەكەم ئەزموونی خۆم دەكەوتم.

-یەكەمین بەرهەمت بەناوی چی بوو؟

+یەكەم بەرهەمم ساڵی 2006 بەناوی كۆچی زەمەن كە تایبەت بوو بە هاتنی سەری ساڵ، ئەم بەرهەمەم لەهۆنراوەی {هاوكاری هاوڕێ ئاسۆ} میلۆدییەكەش هی خۆمە.

-هونەر لای تۆ چی دەگەیەنێت؟

+هونەر پەیامێكی خۆشەوستییە بۆ تەواوی مروڤایەتی پەیوەندی گرنكی بەژیانەوە هەیە‌و لەگەڵا روح تێكەڵا بووە‌و ئەستەمە لێكیان جیابكەینەوە.

-تاوەكو ئێستا چەند بەرهەمت هەیەو چەند دانەت كلیپ كردووە و بەرهەمی تازەت هەیە ؟

+خاوەنی 13تراك گۆرانیم ، سیدییەكەم هەیە بەناو {هەنسكێك بۆ ئێوە} یەك تراك میوزیكیشم هەیە، هەروەها خاوەنی دوو كلیپم بەناوەكانی (سۆمای چاوەكانم ) و كلیپێكیش بۆ {پێشمەرگە}. بەرهەمێكی نوێم هەیە بەناوی من لەودڵەی تۆ تێناگەم .

-هیچ ئالەتێكی میوزك دەژەنی، تاچەند گرنگە گۆرانی بێژ بیزانێت؟

+بەڵێ خۆم ژەنیاری ئامێری {نەی}ئێرانی ئەژەنم كەمێكیش ئامێری زەربو پیانۆ عەزف دەكەم، پێم وایە زەڕوڕە هونەرمەند ژەنیاربێ بۆ ئەوەی تۆنی خۆی بزانێت هەروەها زانیاری زیاتر دەبێت لەسەر ئاداكردن‌و ناسینەوەی مەقامات..

-كاریگەری چ هونەرمەندێكت لەسەرەو لاسایی كەسێك دەكەیتەوە یان رێچكەیەكی تایبەت بەخۆت هەیە؟

+ من زۆر سەرسامی دەنگی هونەرمەند كاك زیاد ئەسعەدو مامۆستا مەزهەری خالقیم، سەرەتای كاری هونەریم بەڕێچكەی ئەوان دەستی پێكرد، بەڵام ئێستا خاوەنی ستایلی خۆمم.

-حەز دەكەی هۆنراوەو ئاوازەكانت چۆن بێت؟

+حەزناكەم لەهی هیچ هونەرمەندێك بچێ چونكی تۆ لەبوارێكدا كاردەكەی كە داهێنانەكە لەهی كەسێكی تربێت نەی كەی باشترە چونكی تۆ ئەبیتە بە گەرم كەرەوە.

-ئێستا زۆربەی خەڵك لەكارەكانی هونەرمەندە تازەكان رازی نین و بە ھونەرمەندی كاتی ئەزانن هۆكار چییە؟

+هۆكارەكە ئەوەیە ئەمڕۆ كۆمەلێك بەناو گۆرانی بێژ بوونەتە ڤایرۆسێك لەهونەری كوردی، هەركەسەو بەشێوازیك خۆی پێدادەكات، هەیە تا حەدێك باشە هەیە مایك بە مەساسە ئەزانێ‌!

-تا چەند لەگەڵ ئەوەیت گۆرانییە بیانییەكان بكرێنەوە كوردی بەھەمان ئاوازو ریتم؟

+هیچ پێویست ناكات هونەری نەتەوەیكیتر بێنیت بەزمانێكی تر بیڵێیتەوە، چونكە فەرهەنگو كلتوری كوردی قودسیەتێكی جوانی هەیە زەڕوڕە ئەمانە نوێ بكرێنەوە.

پرۆفایل: ڕزگار حسێن ناسراو بە ڕزگاری فلوت، خەڵكی ناحیەی سەنگەسەرە دانیشتوی شاری دەروازەی ڕاپەرینە.