ئەمە بڵاوبكەوە
FaceBook  Twitter  

لەوحەشمەتەی بێ دەنگیەدا ،

لەو سەرابە بێ ئامانــەی وون بوونەدا، 

نیشتمانێکین لە ئەوینی بێ نەوایی ،

قاقایەکین لە حەسرەتی نائومێدی، 

لەمــ ووڵاتە بچکۆلەیە،

لە ژوورێکی تاریک دەچین، 

نامەی نزامان بەکەس ناگات،

لە خۆرەتاوێکی سیس دەچین،

تنۆکەی شەونمـی لەزەت، 

پەلکە زێرینەی غەفڵەتی ڕوحمان تەڕ ناکات،،

وامان زانی گەر بچینەوە،

سەر کانی یە کوڵم یاقوتی یەکەی جاران،

بچینەوە ژێر بەزەیی سێبەڕی ساباتە قژ ( بەڕوو)ەکەی درەختی مناڵی،

گەر بچینەوە...

بەردەم ئاگردانە بەسۆز جۆش دراوەکەی دایکمان

ئەوا ئیتر....

بووکە شووشەی حەزەکانمان،بە هێمنی چاو لێک دەنێـن،

وامان دەزانی

جارێکی تر لەسەر گوێسەبانەی بێداریدا،

جریوەی چۆلەکە سرکەکانی عەشق

هیواش هێواش خامۆش دەبن..،

شوێنێک نەما بۆت نەگەڕێین،

دڵی زەویمان هەمووی کێڵا،

شینیی ئاسمانمان هەمووی شەن کرد،

تۆ هەر نەبووی و هەر تۆ نەبوویت، 

لەم جەنجاڵە بێ تۆیەدا،

لەم پێ دەشتەی غەریبی یەدا،

لە هەوری خەمێکی چڵکن دەچین،

لە خورپەی کەسەری شەپۆلێکی لیخن دەچـــین

نەماندۆزیەوە

شوێنێک نەما بۆت نەگەڕێین

ئاژانس نەما بۆت نەخەفتێین

لەسەر پشتی ئەسپە شێ ی شەپۆلەکانی زەمەن گیرساینەوە،

تاڵە شەوقیی کەزی یەکانی مانگمان کردنە دەلاقە،

لە پەنجەرەی سوبحی هەموو خۆرهەڵاتێکا بۆتمان ڕوانـــــــــــی،

لەدەرەوە بۆت دەگەڕڕاین،

نەمانزانی لەناخماندای

بـــــەختــــــــــەوەری.