ئەمە بڵاوبكەوە
FaceBook  Twitter  

 

ئەوەی ئەم رۆمانە دەكاتە جێگای بایەخ نە هێزی گێڕانەوە و ناوەرۆ‌كیەتی، نە ناوداربوونی نوسەر‌ەكەی، بەڵكو پەیوەست بوون و شوێن و كاتی كتێبەكەیە بە خاكی كوردانەوە. 

پییر بیكارد بەرلەوەی خۆی وەك رۆمانوسێك تاقی بكاتەوە، كەسێكی مەسیحایی پارێزگارە و بەشی زۆری ژیانی خۆی لە رۆژهەڵاتی ناویین بەسەر بردووە بە مەبەستی زیاتر بڵاوكردنەوەی ئاینی مەسیح. هەر بۆ ئەوەش لە ماوەی مانەوەی لەوێدا، ئەو تەواو بەسەر هەردوو زمانی توركی و عەرەبیدا زاڵ بووە و هەروەها خۆی ماندوو كردووە تا كەمێك لە كوردییش فێربێت‌.

ئەوەی لە یەكەمین بەرهەمی ئەدەبی پییر پیكارد دا هاوكێشەكە نەگونجاو و ناتەبا دەكات هەڵبژارنی كوردستانی توركیایە وەك شوێن بۆ گێڕانەوەی رۆمانی كافر و كوردبوونی زۆرینەی كارەكتەرەكانیشە. چونكە ئەگەر نوسەر بەر لە نوسینی ئەم رۆمانە ئەگەر یەك رستەی كوردی لە بەرژەوەندی كورداندا خوێندبێتەوە و تێیگەیشتبێ‌ ئەوا سەدان كتێبی نوسراوی بە توركی و عەرەبی دەست كەوتوە و بە چاكی هەرسی كردوون. بۆیە لە رۆمانی كافردا سادە و ئاسان قوربانیێكی دەستی مێژوو دەخاتە بەر شەقی قوربانیێكی تر، و نایەوێت نمەك حەرام بێت بەرامبەر ئەو ساڵە درێژانەی كە لە ئەستەمبۆل و عەمان بەسەری بردوون.  

 رۆمانی كافر دەقێكی مێژووی نییە كە خوێنەری كورد هەراسان بكات تا بە دوای راستیەكاندا بگەڕێت و بپرسێت كەوا كێ بەر پرسیاری یەكەمە لە قەڵاچۆكردنی كلدانیەكانی كوردستانی توركیا. بەڵام ئەدەب كە مێژوو دەنوسێتەوە لە مێژوو قوڵتر ئاسەواری خۆی لە ناخی خوێنەردا بەجێ دەهێڵێت، بۆیە میللەتان هەردەم ترس دایاندەگرێت كاتێك نوسەرێك بەشیك لە رابردوویان دەكاتە كەرەستەی رۆمانێكی. شتێك كە لە رۆمانی كافردا كەس ناتوانێت خۆێ لێ بدزێتەوە ‌هەڵوەستە نەكردن و ئەسەف نەگێڕانە بۆ عیسا، پاڵەوانی سەرەكی رۆمانەكە لەلایەك و لە لایێكی دیكەش ڕق بوونەیە لەو ئاغا كوردە زاڵمە كە بنەماڵەكەی ئەوان هەتك و قات و قڕ دەكات. بەڵام ئەوەش باوەڕهێنانێكی تەواو نادات بە رۆمانی كافر چونكە نوسەر لە دیدگایێكی مەسیحایی ئەدەبەكەی نوسیوە و پێناچێت كەسێكی ئازاد بێت‌. ئامانجی سەرەكی رۆمانەكە داكۆكی كردنە لە مافی بە هەدەرچووی مەسیحیە كلدانیەكانە كە بەشی زۆریان لە كوردستانی عیراق و توركیا دەژین. عیسا كە لەلایەن كوردەكانەوە بە كافر ناسراوە چیرۆكی خۆی بۆ رۆژنامەنوسێكی ئەستەمبۆلی بە رەچەلەك كورد دەگێڕێتەوە كە دواتر دەردە‌كەوێت كە هەم نەوەی خوشكە ڕفێندراوەكەی خۆیەتی و هەم هی ئاغا كوردە زاڵمەكە لە چەند فەسلێكی رۆمانەكە پییر بیكارد ژمارە و ووشەی كوردی بەكاردەبات دەڵێت ئەو بەر لەوەی كوردی وەك زمانێكی سەربەخۆ و جیا لە توركی و عەرەبی بناسێنێت، دەیەوێت توانای خۆشی نیشان بدات نەوەك لە كەنەدا رەخنەگران پێی بڵێت چۆن رۆمانت لەسەر شوێنێك نوسیوە كە زمانی میللەتەكەی نازانیت. لە كاتێكدا كە رۆژئاوا بە چاوی قوربانی دەستی مێژوو سەیری كوردان دەكات، رۆمانی كافر بە چاوێكی مەسیحیانە‌ كورد هەڵدەسەنگێنێت‌ و وا لە خوێنەرانی رۆژئاوا دەكات كە دەست بۆ ئەوانیش درێژبكەن لە رەشكردنەوەی ئاسەواری كلدانیەكان لە ناوچەكەدا. بەڵام لە كۆ دا رۆمانی كافر چەندە بەئاشكرا‌ دڵڕەقی و زوڵمی ئاغا كوردەكە ڕیسوا دەكات، دە ئەوندە كەسانی بەخشندە و دلسافی وەك عەبدولكەریم، ئایشە، مەمەد كورد، و هتد تێدایە. ئەوەش ئەگەر كەمێكیش خزمەتی بە كورد كردبێت، دەبێت لە دیوێكی تری دوور لە ناوەرۆكی ئەم رۆمانە كوردیش وەك هەر میللەتێكی زیندووی سەر ئەم زەمینە بە شێوەیەكی رەوانتر‌ تر لە مێژووی خۆی بڕوانێت وە ‌تا ئەو شوێنە شانازی بە مێژووی بكات كە بە هەڵە و خراپكارییەكانی خۆشی زانیبێت.