ئەمە بڵاوبكەوە
FaceBook  Twitter  

راگەیاندنكار زریان كەمال پەیامنێرو پێشكەشكاری كەناڵی تەلەفزیۆنی سلێمانییە، لە كۆڕەوەكەی ساڵی ١٩٩١ هاتۆتە دنیاو لە خێزانێكی مامناوەندی پڕ لە سۆزو خۆشەویستییدا گەورە بووەو لە ئێستاشدا خێزاندارە و خاوەنی دوو كوڕە، بەیەكێك لە رگەیاندنكارە سەركەوتووەكان هەژمار دەكرێت، بۆ ئەم بەمەبەستەش ماڵپەری رێگای كوردستان دیمانەیەكی لەگەڵ ئەنجامداوە.

دیمانە / رابەر مەغدید

-لە كەیەوە دەستت بەكاری راگەیاندن كردووە؟

+لە ساڵی ٢٠١٣وە دەستمكردوە بە كاركردن لە ناو راگەیاندندا و سەرەتا بە هاوبەشی كارم بۆ كەناڵی ئاسمانی زاگرۆس و كەناڵی تەلەفزیۆنی سلێمانی دەكرد، بەڵام لە ئێستادا تەنها لە كەناڵی سلێمانی وەك پەیامنێر و پێشكەشكار بەردەوامم.

-راگەیاندن خولیاتە، یان پیشەیە؟

+ بەبۆچوونی من پیشەی راگەیاندن جیاوازە لە هەر كارێكی تر، چونكە ئەگەر حەزو خولیات بۆی نەبێ ناتوانی تیایدا سەركەوتووبی، بۆیە من بەو خولیایەی منداڵیم گەشتووم كە ئاواتم بوو، بۆیەش ئەو كارەم هەڵبژاردووە كە حەزو ئارەزووم بۆی هەبووە، بۆیە دەكرێ بڵێم سەرەتا حەزو خولیایە پاشان پیشەیە.

-تا چەند پێویستە راگەیاندن كار ئەكادیمی بێت؟

+لە هەر بوارێكی كاركردندا پێویستە بیر لەوە بكەیتەوە دەبێت كەسێكی ئەكادیمی بیت، بەڵام بە ڕای من لە ڕاگەیاندندا هێندەی ئەكادیمی بوون ئەزموون و خولیا گرنگە كەسانێكمان هەیە لە ڕاگەیاندندا كە ئەكادیمی نین، بەڵام زۆر سەركەوتوون، بەداخەوە هەشمانە ئەكادیمییە بەڵام ئەلف و بێی ڕاگەیاندن نازانێ، بەو هیوایەم هەموومان بە پیرۆزییەوە سەری ئەم كارە بكەین.

-كاری راگەیاندن لە ئێستا بەشێوەیەكی گشتی چۆن دەبینی؟

لە كاری ڕاگەیاند لە ئێستادا ئەگەر چی كرانەوەیەكی باشی هەیە، تا رادەیەكی باش جێگەی دڵخۆشی هەموومانە، بەڵام ماوە بۆ ئەوەی بڵێین گەیشتۆتە لوتكە.

-ئەم بوارەی راگەیاندنەی خۆت تێدا دۆزیوەتەوە؟

+ڕاستە بەو حەزو خولیایە گەشتووم كە ئامانجی منداڵیم بووە، بەڵام هێشتا ماومە بە ئەوە بگەم كە ئامانجمە و هێشتا وەك دڵۆپێك ئاو لە دەریادا شەپۆل ئەدەم تا بگەمە ئەو ئاستەی دەمەوێت بۆیە ڕاگەیاندن تەنها دەركەوتن نیە لای من

-وەكو ئافرەتێكی راگەیاندن كار، كۆمەڵگا نەبۆتە رێگر بۆت؟

+لە كۆمەڵگای ئێمەدا كاركردن لە میدیادا قورسایی خۆی هەیە، بە تایبەتر بۆ ئافرەتان، بۆیە منیش بەدەر نیم لە هەر ڕاگەیاندنكارێكی دیكە كە توشی توانج و كۆسپ دەبێت بەڵام، بە هەموو توانامەوە هەوڵ ئەدەم جێ دەستم دیار بێ و سەربكەوم بەسەر رێگڕیەكان.

-خانەوادەكەت تا چەند هاوكارتن؟

+بە دڵنیاییەوە ئەگەر هەوڵ و هاوكاری خانەوادەكەم نەبوایا نەمدەتوانی بە ئامانجەكانم بگەم، چونكە من خاوەنی دوو منداڵم و ئەركی ماڵ و منداڵم لەسەرە و ڕاگەیاندنیش واتا بەخشینی كاتێكی زۆر هەر بۆیە هاوسەرەكەم و دایكم یەكێكن لە قەڵا بەرزەكانی پشتی من و سەركەوتنەكانم بۆ ئەوان دەگەڕێنمەوە.

-دەنگ و سیما هۆكارن بۆ سەركەوتنی راگەیاندنكار؟

+ بەڕای من هێندەی تواناو لێهاتوویی گرنگە سیما گرنگ نیە، بەڵام دەنگیش یەكێكە لە هۆكارەكانی سەركەوتن و ناساندنی ڕاگەیاندنكار، بەڵام بەداخەوە لە كوردستاندا هێندەی چاو لەسەر سیمایە تواناو لێهاتووی بەهەند وەرناگیرێ‌.

-زۆری و بۆری راگەیاندنەكان هۆكار نین بۆ ونكردنی ئەستێرەكان؟

+ ڕاستە لە ئێستادا میدیا گەلێك هەن و كار دەكەن، بەڵام سەركەوتنی خودی ڕاگەیاندنكارێك پەیوەستە بە تواناو لێهاتووی خۆیەوە، بۆیە بەرای من ئەگەر تۆ بە رێگا راستەكەدا رۆیشتیت و پەرەت بەتوانای خۆتدا هیچ شتێك ناتوانێت وونت بكات.