ئەمە بڵاوبكەوە
FaceBook  Twitter  

رەنگە خەڵكی بڵێن ئەم كابرایە كابرایەكی چاوچنۆك‌و هیچ نەدیتەو پیسكەیە, بەڵام بڕواتان بێت وانیم هەرخۆم بێ شانس‌و بەدبەختم, ئەگەڕ بڕواشم پێ ناكەن ئامادەم لەنووكەوە بۆتان بگێڕمەوە مەسەلەكە چۆن بوو.

خۆتان ئەزانن چلەی تەمموزەو دار‌و بەرد داخ بووە‌و پیاو لەگەرمانا نازانێ‌ روو لەكوێ‌ بكات, گەرماكەی لەوەیا نەماوە, ئەوەتانێ‌ حەزئەكەی بڕۆ سەیری گەرمی پێو بكە بزانە چۆن جیوەكەی ئوقرەی لێبراوە‌و سەری چەقاندوە بە بنی پەنجاوە..! (زۆروتن‌و قورئان خۆشە)

دوێنی نیوەڕۆ كەبەرەو ماڵەوە ئەگەڕامەوە تیشكی هەتاوەكە لەتەپڵی سەری ئەدام, مۆخی ناو سەرم ئەكوڵاو ئارەق چۆڕاوگەی بەستبوو، بەهەموو ئازای لەشما ئەهاتە خوارێ‌, وام لێ هاتبوو هەر ئەتوت چۆلەكەم‌و لەئاویان هەڵكێشاوم, لەتاوانا بەدەم رۆیشتنەوە ئەتوت وڕێنە ئەكەم لەبەر خۆمەوە ئەم وت.

ئەم مانگە بۆ من بوو بەنەگبەتی‌و نەهاتی‌و خۆی سەپاند بەسەرما, ئەمیش چوە ریزی رووداوە گرنگەكانی مێژووی ژیانمەوە, هەروەكو چۆن ئەڵێن, ساڵی گرانییەكە, یان ساڵی تاڵانییەكە .... هتد !

ئیتر ئەبێ منیش ناوی لێ بنێم ساڵی نەهاتی‌و نەگبەتی.

دەستەسڕەكەم لەگیرفانی پانتۆڵەكەم دەرهێناو دەم‌و چاو‌و پشتی مل‌و بن قورگ‌و سینگم پێ سرییەوە, پاشان دەستەسڕەكەم گوشی, باوەڕ بكەن ئاوی لێ ئەچۆڕا, لەگەرمانا هەر شەقاوێكم كردبوو بەدوو, ئەتوت لۆقە ئەكەم بەبێ‌ نەقیزە, تاگەیشتمە بەردەرگای ماڵەوە ئیتر ئاهێكم هاتەووە‌و بەپەلە پەنجەم نابەدوگمەی جەرەسەكەداو كەمێك راوەستام، لەتاوگەرما لەمن وابوو زەمانێكە وەستاوم, ژنەكەم بێ ئەوەی بڵێ ئەوە كێیە بەپەلە دەرگاكەی كردەوە‌و ئەتوت حیواری تەمسیلی لەبەركردووە زۆر بەسۆز‌و بەزەیی پیاهاتنەوە وتی:

پەلەكە خێراكە زوو وەرە ژوورەوە، وام زانی شتێك رووی داوە بەپەلە خۆم كرد بەو دیوی دەرگاكەیاو یەكسەر ملم نابەرەو پانكە شڕەكەی هەیوانەكە, چوومە ژێریەوە, ژنەكەم بەدوامەوە بوو لەبەر خۆیەوە ئەی وت: كوێربێتەوە یاخوا, توخوا ئەمە حاڵە خۆ ئەڵێی جەهەننمە جەهەنم؟ ئەم گەرمایە چی بوو وارووی تێكردین؟ قورئان بەهەقت هیچ ساڵێك وەكو ئەم ساڵ ئاوا گەرم نەبووە !

من هەر لەبەر پانكەكەبووم ئەویش هەروەكو لەكوڕە تاقانەكەی بپاڕێتەوە زۆر بەسۆزەوە وتی: ئێ ئاخر دەبەسە ئەوەندە لەبەر ئەو پانكەیە رامەوەستە هەی نەگبەتت نەكەن, ئاخر دوایی رەقیتە ئەبیت, دەبڕۆ ئەو دیو خۆت داكەنە، خۆتۆ بەجارێ‌ هەڵپڕوكاوی قوڕ بەسەر نەبوو, ئەڵێم ئەوە بۆناچیتە حەمامەكەوە‌و سەتڵی ئاو بكەی بەخۆتا, چاكترنییە؟ ئەو ئارەق‌و بۆن ئارەقەت لەكۆڵ ئەبێتەوە‌و فێنكیشت ئەبیتەوە.

من هەر لەوێدا دەستم كرد بەخۆ داكەنین‌و لەبەرخۆشمەوە ئەم وت:

لەزتانەوە بەتەمام دووسێ‌ عانە لادەمە لاوە بۆئەوەی بتوانم موبەڕیدەیەكی پێ بكڕم, كەچی خانم ئەوەندە ئەتەكێتی زۆرە نایەڵی هیچم بەدەستەوە بمێنێ‌.

ژنەكەم وتی ئەی باشە ئەمڕۆ سەری مانگ نەبوو؟!

منیش وتم: ئینجا با سەری مانگ بێت! خوا ئەیزانێ‌ حاڵ وابڕوا گوزەران ناكەین, هەردەرپێ‌ قوتەكەم لەپێیا بوو، كەمێك خۆم لەبەر پانكەكە لابرد, ئەو وتی: تۆهەر كردووتە بەعادەت ... لەسەری مانگا شەڕت لێ ئەبارێ‌!

منیش وتم كچێ شەڕی چیم لێ ئەبارێ‌ بۆ ناڵێت عارەقت لێ ئەبارێت ماندوویت لێ ئەبارێت, دەتۆ نەختێ ئاوی ساردم بۆبێنە باقوزەڵقوردی كەم، كونی لووت‌و ناودەم‌و قوڕگ‌و بۆڕییەكانی هەناسەم هەر هەموویان وشك بوونەتەوە, ژنەكەم جامێ‌ ئاوی بۆهێنام‌و خواردمەوە، پاشان خۆم كرد بەحەمامەكەیا, تامن ئاوێكم كرد بەخۆماو هاتمە دەرەوە ئەو نانەكەی بۆ حازر كردبووم, منیش چووم دانیشتم‌و دەستم كرد بەخواردنی.

بەدەم نان خواردنەوە پێم وت: ئەی تۆ نەت وت ئەچم بۆ ماڵی دایكم؟

ژنەكەم وتی: با دوێنێ پاش نیوەڕۆ چووم, ئەی بەتۆم نەوت وائەچم بۆ ماڵی دایكم؟

پاروویەك لەدەممابوو وتم با ... با راست ئەكەی.

ئەو وتی: ئەی چۆن؟ وابوو بەمانگێك گوڵەی پوورم مناڵی بووە..هێشتا من نەرۆیشتووم.

منیش وتم: ئینجا بۆ نەرۆیشتووی؟

ئەو وتی: ئەی خۆ بەدەستی بەتاڵی ناڕۆم.

منیش وتم: ئمم..ئێ‌ دەوا بڵێ ئینجا شتێكی هاكەزاییت بكڕییایە‌و لەگەڵ خۆتدا بتبردایە.

ئەو وتی: عەیب‌و شوورەیی, كەی باوی شتی هاكەزایی ماوە؟ نەخوازە كچی پوریشم بێت.

وتم: سابەخوا تۆ, یان كچی پوورتە یان كچی خاڵتە یان...

منیش هیچم نەوت, لەنان خواردن بوومەوە بەپشتی دەستم دەم‌و لچم سڕییەوە‌و ئینجا وتم: هیچت نەبردبوو بۆیە وا مات‌و خەفەتباری؟

ئەو وتی: بەرێ‌ وەڵا قەرزم كرد.

ئیتر من زۆر توورەبووم‌و گوتم: بەخوا لەداخی تۆ سەری خۆم هەڵگرم چاكترە.

ئەویش پشتی بەدیوارەكەوە دابوو هەردوو ئەژنۆی بەسنگییەوە نووساندبوو دەستێكیشی نابوو بەلاجانگییەوە‌و دەستەكەی تریشی خستبووە سەر ئەژنۆكانی, منیش وتم, بۆ وادەستەو ئەژنۆ دانیشتووی ئەڵێی منت مردووم ؟.

وتی خوا نەكا... بەڵام داخ لەبەختە رەشەكەی خۆم ئەخۆم, ئاخر كەئەمە حاڵت بوو بۆ ژنت هێنا؟

وتم: وەڵاهی هەرچی ئەمە حاڵی بێت‌و ژن نەهێنی ئەبێ‌ هەزارانی وەك‌و تۆ پرچی سپی بهۆنێتەوە.

وتی: دیارە كەس بەئێمە مامان رازی نەئەبوو؟!

منیش وتم: نەخێر من واناڵێم, بەڵام ئێمە مامان ژنیان بۆ نەئەهات.

ئەو....!

وتم: بەخوا دنیاهەروابووە‌و واش ئەبێ‌.

ئەو وتی: چۆن چۆنێ‌؟

منیش پێم وت: ئەزانی چی, پەیژەت دیوە؟

ئەو وتی, گاڵتەم پێ ئەكەی؟ منیش وتم نەبەخوا گاڵتەت پێ ناكەم, ئەڵێم پەیژەت دیوە؟

ئەو هیچی نەوت، هەر بێدەنگ بوو, ئینجا من وتم: هەرچی خەڵكی ئەم دونیایەی كەلەسەر زەوین, هەر هەموویان كۆمەڵ كۆمەڵی جیاجیان، واتە چین چینن, هەر كۆمەڵەو پلەو پایەكی تایبەتیان هەیە, وەك پلەكانی پەیژە؛ ئەمەش تەقسیمی خودایە .... دیوتە پەیژە پێكهاتووە لەدوو راستەداری درێژو ژمارەیەكی زۆری پلەكانی, پلەی یەكەم لەخوار خواری هەموویانەوەیە‌و ئینجا پلەی دووەم‌و سێیەم‌و ئاوها تادوا پلە كەلەسەروی هەموویانەوەیە...ئەی نەگبەت هەر هیچ نەبێت ئێمە سێ‌ چوار پلە لەخوارمانەوەیە!

ژنەكەم بەتووڕەییەوە وتی: وەڵا من سەرم لەم كۆمەڵ كۆمەڵ‌و پلەو پایەیە دەرناچێ‌, ئەی خوا ئەم كۆمەڵَ كۆمەڵ‌و پلەپلەیە ببڕێ‌, ئەگەر نەبێ‌ چاكتر نییە؟!

منیش وتم: كچێ‌ وس بە بۆخاتری خوا, دوایی ئەڵێن تۆش هەوی؟

ئەو وتی: هەوی یەعنی چی؟!

وتم یەعنی تۆش داوای یەكسانی بۆئۆمەتی سەرزەوی ئەكەی, ئەوەشی وابڵێ خاوەن پلە بەرزەكان بەشێتی لەقەڵەم ئەدەن.

ئەو وتی: ئاخر تۆ دایم ئەمە قسسەتە, ئەمەی تۆ باسی ئەكەی خەوی سواڵكەرەكانە, ئاخر تۆش سواڵكەری بۆیە بەدایم لەم قسانە زیاتر نازنیت, باسی كۆمەڵ‌و چین‌و پلە نەبێت...خۆ من دڵم شەقی برد, من ئەڕۆم‌و بۆتی بەجێ ئەهێڵم, ئەمەی وت‌و هەڵسایە سەرپێ‌و دەرپەڕییە دەرەوە.

منیش بەسەرسوورمانەوە پێم وت: ئەوە بۆ كوێ‌؟1

سەری سووڕان بەلای مناو وتی: (ئەچم بۆ ئەو شوێنەی سواڵكەری لێ ناژی!)

منیش بەپەلە پێم وت: (دەسا بەخوا ئایدۆزێتەوە)..

ئەم چیرۆكەم لە ساڵی 1984 نووسیوە, بەڵام بڵاونەكراوەتەوە.