ئەمە بڵاوبكەوە
FaceBook  Twitter  

 

وەرە تۆ وەرە

شۆڕە سوار!

پێش ئەوەی ببم بە چیرۆکی بەر ئاگردان

وەرە

سەرێک لە کوچە و کۆڵانەکانی

میرەبانی پەری ژنیەتیم بدەوە

وەکو جاران

پەنجە قەڵەمیەکانت لە پەنجەکانم

بئاڵێنە ..

هەر هیچ نەبێ

بەمبەوە بۆ یەکەم وێستگەی ژوان

با وێنەی یەکەم ماچمان

لە سەر دەفتەری کۆنە یادگاریەکانم بکێشم

با بۆنی تێکەڵبوونی یەکەم هەناسەمان

لە نێو شوشەی یەکەم عەتری وەرزی

گەنجیەتیم هەڵگرم ..

با دوا ڕستک لە تاڵەکانی قژی ئاوریشمیت

بهۆنمەوە بۆ گەردەنم ..

دوا ئاواز لە مرواری ترپەکانی دڵت بکەم

بە ستران بە لاوک بە حەیران

بۆ شەوانی شەونخونیم ..

پێش ئەوەی ببم به خۆڵەمێش

لە دوا وێستگەی چاوەڕوانیت ..!