ئەمە بڵاوبكەوە
FaceBook  Twitter  

كۆچی دوایی مامۆستا میقداد محەمەد، مەرگی مرۆڤێكی ئاسایی نەبوو. مەقامخوێنێكی شارەزابوو، لەم بوارەدا ڕۆڵ وكاریگەری گەورەی لە سەرشانۆی ژیانی هونەرییدا هەبووە. ڕێچكەی قوتابخانەكەی مامۆستای گەورەی مەقامخوێن: عەلی مەردانی، چۆڵ نەكرد. لەمێژووی ژیانی هونەری خۆیدا، خزمەتێكی زۆری بواری مەقامی كوردی و عەرەبی و توركمانی كردووە، هەر بۆیە بەسومبولی پێكەوە ژیانی نەتەوەكان سەیردەكرا. مەقام لای مامۆستا میقداد پەیامێكی هونەریی مرۆڤدۆستانە بوو. ئەودەیزانی گۆرانی و مەقامات كاریگەرترن لەسیاسەت و زووتر ئاوێتەی ڕۆحی مرۆڤ دەبن وگیانی ئاشتەوایی دەخوڵقێنێت. مامۆستا میقداد بەهەموو زمانەكانی كەركوك مەقامی دەخوێند، مرۆڤ هەستی بەپاكی و جوانیەكانی دەكرد. چونكە بەهەمان ئیدراك و هەستی ئەو نەتەوەیەوە مەقامی دەچڕی. سەرجەم نەتەوەكان دەیانزانی، ئامانجی ماموستا میقداد پەیامی پێكەوە ژیان و مرۆڤدۆستانەیە، هەمولایەك بە موڵكی خۆیانیان دەزانی، هەر بۆیە لەڕاستیدا سامانیكی گەورەی كەركوك و نەتەوەكەی بوو. مەقامزان میقداد محەمەد بەئامانجی پێگەیاندن و پەروەردەكردنی فێرخوازان و ئارەزومەندانی مەقام لەگەڵ ژمارەیەك لەهونەرمەندانی شارەكەیدا ، ناوەندی عەلی مەردانیان دامەزراند، كەهەمویان پیكەوە توانیان خزمەتێكی گەورە بەبواری هونەری مەقام و گۆرانی و مۆسیقا لەشاری كەركوكدا بكەن ، هەرزوو ئارەزوومەندانی مەقام لەكوردو عەرەب و توركمان لەدەوریان كۆبونەوە. مامۆستا لەپاڵ هاوڕێكانیدا رۆڵ و كاریگەری باشی گێڕا ، چونكە شارەزا و ڕاهێنەرێكی باشی هونەرەكانی مەقامخوێندن بوو. بەلێهاتوویی خۆی، قوتابیەكانی گەیاندە ئاستێكی باش لەبواری مەقام خوێندندا. سەرجەم قوتابخانەو لقەكانی هونەری مەقامی رۆژهەڵاتی بەباشی دەناسی، مرۆڤ سەرسام دەبوو بەو هەموزانیارانەی لەوبارەیەوە هەیبوون و پیشكەش بە هونەردۆستان و قوتابیەكانی دەكرد. بۆئەم مەبەستە كەناڵەكانی ڕاگەیاندن و هونەرمەندانی گەورەو زانكۆكانی كوردستان، بەتایبەتی بەشی ئەكادیمیای هونەرەجوانەكان و پەیمانگا هونەرییەكان كەڵكیان لەتواناكانی وەردەگرت. تا لەژیاندابوو بۆساتیكیش لە خزمەنی مەقام وهونەردا نەوەستا، بەشداری دەیان كۆڕو فیستیڤاڵی گۆرانی و مەقامی لەسەرئاستی شارەكانی هەرێمی كوردستان و پارێزگانی عیراقدا كردووە. ماموستا میقداد كەڵكی لەگەورە مەقامخوێنەكانی وەك( محەمەد قوبانجی و یوسف عومەرو عەلی مەردان ) وچەندین هونەرمەندی تری گەورەی عێراقی وەرگرتوەو لەگەڵیان مەقامی چڕییوە. وەنابێت ڕۆڵی تەكیەی تاڵەبانی لەمێژوی شاری كەركوكدا فەرامۆش بكەین، خزمەتی گەورەیان پێشكەش كردوە. هەر لەبواری كۆمەڵایەتی وئاینی و سیاسی و مەقام خوێندندا . چەندین هونەرمەند لەتەكیەی تاڵەبانیدا پێگەیشتن. مامۆستا میقداد یەكیك بوو لەو قوتابیانەی لەو قوتابخانەیەدا فێری وانە كانی خوێندنی مەقام ببوو. دواتریش هەرلەوێ‌ لەگەَل خوێندنی مەقامە ئاینییەكاندا، قوتابخانەیەكی بۆئارەزوومەندانی مەقام خوێنان كردبووەو وانەی مەقامەكانی پێدەگوتنەوە و چەندین قوتابی لەم بوارەدا پێ گەیاند. هیشتا هەمومان پێوستمان بەو بوو، تا زیاتر لێوەی فێربین.