ئەمە بڵاوبكەوە
FaceBook  Twitter  

 

 

نامەیشەست ویەک تا‌‌‌حەفتا)(٦١- ٧٠))

جەلال دەباغ کردوویە بەکوردی

 

(٦١)

ئاوها روویدا..

لە ئەنجامدا تۆ بوویتە خۆشەویستەکەم

چویتە ناوەند توێیەکانی گۆشتمەوە

بە شێوازی نینۆکی درێژ..

وەکو دوگمەی.. کونە قۆپچە

وەکو گوارەی.. 

گوێچکەی ژنێکی ئیسپانی..

*

لەمڕۆ بەدواوە ناتوانی..

پڕۆتێستکەی..

کە من پادشایەکی نا دیموکراسیم

من لەکاروباری..

ئەشقداری و خۆشەویستیدا..

دەستوری خۆم پێکدەهێنم

خۆم بە تەنیا فەرمانڕەوایی تیادەکەم..

ئایا گەڵا پێش دەرچوونی

ڕاوێژ بە درەخت دەکا..؟

کۆرپەڵە پێش لەدایکبوونی

ڕاوێژ بە دایکی خۆی دەکا..؟

مەمک پرسی سوتیان دەکا..

پێش هاتنەدەر؟

*

کەواتە تۆش 

ببە بە خۆشەویستی من

بێدەنگبەو هیچ..

لەسەر ڕەوایەتی ئەشقم

دەمەقاڵەم لەگەڵمەکە

ئەشقم بۆ تۆ

یاسایەکە من دەینووسم..

هەرخۆیشم جێبەجێیدەکەم..

ئەرکی تۆش هەر ئەوەدەبێت

وەکو گوڵی مارگەرێت

لەنێوانی 

بازوەکانی مندا بنوویت

لێمگەڕێ با حوکم بکەم..

ئەرکەکەی تۆش خۆشەویستم

هەر ئەوەیە ئاشقمبیت..

 

 

(٦٢)

تۆ ژنێکی پشوودەریت..

پشوودەریت وەکوهەموو

ئەو کورسییانەی بێ مەبەستن..

وەکو هەموو رۆژنامەکان

کە لە باخچە گشتییەکان

جێهێڵراون.

ئەشق لای تۆ.. وەک ئەسپێکە

نە بەرەوپێشەوە دەچێت..

نەبۆدواوە پاشگەزدەبێت

پۆستەچیبێت.. یاخود نەیەت

رۆژەکانی تۆ هەموویان..

لە هێڵەکانی ناو فنجانەکانی قاوەدا..

لە کاخەزی قوماردا..

یان لە مورووی بەختگرەوەکاندا

وێنەکانیان بۆ کێشراون

تۆ ژنێکی پشوودەریت..

وەکو پایەکانی مێزێک

گۆی مەمکۆڵەی لای راستی تۆ

هیچ نازانێ

لەگۆی مەمکی لای چەپی تۆ

لچ یان لێوی سەرەوەی زارت

ئاگاداری شتێک نییە

لە لێوی خوارەوەی زارت..

*

ویستم شۆڕش 

بگەیەنمە بەرزاییەکانی مەمکۆڵەت..

سەرنەکەوتم..

ویستم فێری توڕەییتکەم..

فێری کوفرو ، ئازادیتکەم

سەرنەکەوتم..

تووڕەبوون جگە لە تووڕەکان..کەس نایزانێ

کوفر جگە لە کافران.. کەس نایزانێ

ئازادیش خۆی شمشێرێکە..

بەدەست ئازادیخوازان نەبێ

هیچ نابڕێ

بەڵام تۆ پشوودەری

تا دەگاتە پلەی ئازار

گرەو لەسەر ئەسپە ڕاکردووەکان دەکەی

بەڵام بۆ خۆت سواریاننابیت..

بە پیاوانیش گەماندەکەی..

رێزی رێوشوێنەکانی گەمەش هیچ ناگریت..

تەزووی سەرکێشی نازانیت

بەیەکادان لەگەڵ نادیار

لەگەڵ چاوەڕوان نەکراوان.. نازانیت

تۆ چاوەڕێی.. چاوەروانکراویت..

وەک چۆن پەڕاو چاوەڕوانی..

یەکێکە بیخوێنێتەوە..

کورسیش چاوەڕوانە کەسێک..

بێت لەسەری دابنیشێت..

پەنجەش دیسان هەروادەکات

چاوەڕوانی ئەلقەی هاوسەرگیری دەکات

چاوەڕوانی پیاوێک دەکەی

بادام و بستەت بۆ پاکات

شیری چۆلەکەت دەرخواردات

کلیلی شارێکت پێبدات 

لە پێناویا نەجەنگاوی..

شایانی ئەو شەرەفەشنیت بچیە ناوی..

 

 

(٦٣)

هەندێجار وام بەبیردادێت..

لە گۆڕەپانێکی گشتیدا..

بکەومە جەڵدەلێدانت

تا رۆژنامەکان

لە لاپەڕەی یەکەمیاندا

وێنەی من و وێنەی تۆ پەخش بکەن..

تا ئەوانەی کەنازانن

با بزانن..

تۆ خۆشەویستەکەی منی.

*

بێزاربووم.. لە ئەنجامدانی خۆشەویەتی 

لەپشت پەردەوە

لە نماێشکردنی رۆڵی

ئاشقە کلاسیکییەکان..

دەمەوێ بێمە سەر تەختەی شانۆ..

بۆ دڕاندنی سیناریۆ..

لەپێش خەڵکا ئاشکرایکەم..

من ئاشقم .. لەسەر ئاستی سەردەم

تۆش خۆشەویستەکەی منی

وێڕای سەردەم..

*

من دەمەوێ..

رۆژنامەگەری بمناسێ

وەک یەکێک.. لە گەورەترین ئاژاوەگێڕانی مێژو

ئەمەش تاقە هەلێکمە..

لەگەڵ تۆدا

لەیەک وێنەدا

دەرکەوم

با هەموو ئەوانەی

لاپەڕەی تاوانی سۆزداری دەخوێننەوە

بزانن تۆ خۆشەویستەکەی منی..

 

 

(٦٤)

ناتوانم لە سنووری مرۆڤایەتیم دەرچم

لەسەرشێوازی شێتەکان..

لەسەرشێوازی وەلییەکان..

سەودا لەگەڵ تۆدا بکەم..

ئەگەر لای خۆم تۆمهێشتەوە

وەکو گوڵێکی کاخەزی..

ژنێتی تۆ ریسوا دەکەم..

*

ژنێتی تۆ لەبارەی منەوە چی دەڵێ؟

ئەگەر سەودام لەگەڵکردی..

وەککێلگەیەک کەس نەیەوێ..

موڵکایەی ئەوی هەبێ..

یان وەک خاکێکی بێلایەن..

جەنگاوەران ناچنە ناوی..

دوو مەمکۆڵەت لەبارەی منەوە چێدەڵێن؟

ئەگەر لەدوامەوە جێمهێشتن چەنەبازی بکەن..

خۆشم نووستم..

لێوەکانت..

لەبارەی منەوە چی دەڵێن؟

گەر جێمهێشتن یەکتربخۆن..

منیش رۆیشتم..

*

ناتوانم وا تەماشاتکەم

وەک چۆن مانگا تەمبەڵەکان..

سەیری هێڵی ئاسن دەکەن..

ناتوانم هەر ڕابووەستم

لەژێر شێتیی بارانی ئیستیوائیدا..

بەبێ چەتر..

 

 

(٦٥)

کاتێک کە تۆم لەگەڵدەبیت

حەزدەکەم بەسەر هەموو

نیشانە سوورەکانی هاتوچۆدا

تێپەڕببم

حەزێکی منداڵانەم هەیە

ملیۆنان سەرپێچی بکەم..

ملیۆنان گەمژەیی بکەم..

*

کاتێک دەستت لەناو دەسما

نوقومدەبێت..

حەزدەکەم گشت پارچە شوشەکان بشکێنم

کە لەدەوری خۆشەویستی چەسپیانکردووە..

هەروا هەموو ڕاگەیاندنە فەرمییەکان

کە دەسەڵات..

بۆ دەستگرتن بەسەر خۆشەویستیدا..

دەریکردووە..

کاتێک پارچە شوشە شکاوەکان

لەگەڵ پێچکەی ماشینەکەم

پێکدەکەون..

هەست بە خۆشییەکی بێ سنووردەکەم.

 

 

(٦٦)

جا ئەی کیژە بەیروتیەکە..

تۆ هیچ شایستەی دەریانیت..

تۆ شایانی بەیروتیشنیت.

لەو کاتەوە تۆمناسیوە..

تۆ نزیکی دەریا دەبیت..

وەک راهیبەیەکی لە گوناە ترساو..

ئاوت دەوێ بەبێتەڕبوون

دەریات دەوێ بێنوقومبوون

بێهودە..هەوڵمدا قایلتکەم

چاویلکە ڕەشەکەت داکەنیت..

گۆرەوییە ئەستورەکەت

لەگەڵ کاتژمێرەکەی دەستت.. 

تا وەک ماسییەکی جوانکیلە..

هەڵخزێیتە ناو ئاوەکە..

بەڵام من ژێرکەوتم.

بێ هودە هەوڵم دا بۆت ڕوونکەمەوە

ئەو سەرگێژییە

بەشێکە لە دەریا

لە ناو ئەشقا ، شتێک لە مردنی تیایە

ئەشق و دەریا..

نیوچارەسەر قەبوڵناکەن..

بەڵام من لە گۆڕینت بە ماسییەکی سەرچڵ

بێ هیوابووم

هەموو درەختەکانت کێوین

هەموو بیرو بۆچوونەکانت کێوین..

لەبەرئەوە خوشکەدەرم

بۆتۆ دەگریم

گشت بەیروتیش لەگەڵ مندا دەگری..

 

 

(٦٧)

لە پێش تۆدا.. خێڵێک لە ژنانم هەبوون

کێم ویستبا هەڵمدەبژارد..

ئازادبووم لە هەڵبژاردنیهەرشتێک کە دەمویست

ڕەشماڵەکەم..

باخێک لە گڵ و بازنگبوو

ویژدانیشم گۆڕستانێک بوو

بۆ مەمکە لێدراوەکان

بە چارەگرانی

وەک دەوڵەمەندێکی رۆژهەڵاتی

رەفتارمکرد..

بەبیرکردنەوەی سەرۆک باندێک..

خۆشەویستیم پیادەدەکرد

کاتێک خۆشەویستیی تۆ لێیدام..

بەبێ چاوەڕوانی کردن

ئاگر بەربووە ڕەشماڵم

نینۆکەکانم هەڵوەرین

ئەوژنانەی لام پەسندبوون

هەموویانم ئازادکردن..

چارەی خودام دۆزییەوە..

 

 

(٦٨)

چەندان مانگ تێپەڕبوون..

ژمارەی تەلەفونەکەت نازانم

تۆ گەمارۆت سەپاندووە..

تەنانەت بەسەر ژمارەی تەلەفۆنەکەتدا..

پەیڤین قەدەغەدەکەیت کە بپەیڤێت..

دۆستایەتی دەنگم..

سەردانی وشەکانم بۆلات

دەدەیتەدواوە..

*

ئەگەر نەتوانم سەردانت بکەم

رێگەبدە بەدەنگم..

بۆ ژووری دانیشتنت بێتەژوورێ

لەسەر فەرشە ئێرانییەکت بنوێ..

بۆ من قەدەغەکراوە..

بێمەناو شانشینە بچکۆلەکەت..

من نازانم لەکام گۆشە دادەنیشیت

کامە گۆڤار دەخوێنییەوە..

نە رەنگی سەرجێگەکەت دەزانم..

نە رەنگی پەردەکانت..

شتێک لەسەر دنیای ئەفسونەییت نازانم

بەڵام من خۆم دایدەهێنم..

سپی.. لەسەر سوور دادەنێم

شین.. لەسەر زەرد

تا سامانێک لە تابلۆم بوو..

کە مۆزەخانەی لۆڤەریش هێندەی نییە..

بەڵام..

هەتاکەی هەر تۆ دابێنم

وەک سۆفی خوای دادەهێنێ

هەتاکو کەی؟

هەتاکەی وا بمێنمەوە

تۆ لە جەوهەری گوڵان

دروست بکەم

وەک بۆنفرۆش ئاوادەکەن..

هەتاکەی من..

پارچە.. پارچە کۆتکەمەوە

لە کێڵگەکانی تۆلیب لە هۆڵەندا..

میوەی ترێ لە فەرەنسا

کزەبای پانکە لە ئیسپانیا

 

 

(٦٩)

ئەو شەوە کاتێک

لەگەڵ مندا سەمات دەکرد..

شتێکی زۆر سەیر روویدا.

هەستمکرد..ئەستێرەیەکی پرشنگدار

لە ژوورەکەی خۆی لە ئاسمان

هاتەدەرێ..

پەنای بردە بەر سنگی من..

من وام هەستکرد، وەک ئەوەی

دارستانێکی تەواو

لەژێر جلەکانم دەڕوێ..

هەستمکرد وەک ئەوەی..

منداڵێکی تەمەن سێ ساڵ

دەخوێنێتەوە..

ئەرکەکانی قوتابخانەی

لەسەر قوماشی کراسەکەم..

دەنووسێتەوە..

*

نەریتی من ئەوە نییە 

سەمابکەم..

بەڵام من.. لەو شەوەدا

نەک تەنیا هەر سەمام دەکرد..

بەڵکو من خۆم بوومە سەما..

 

 

 

(٧٠)

وا باران گەڕایەوە، ئەی خۆشەویستی باران..

وەکوشەیدا بۆ پێشوازیی دەچمە باڵکۆن

وەکو شەیدا، 

لێیدەگەڕێم دەم و چاوم..

جلم تەڕکا.

بمکاتە ئیسفەنجێکی دەریایی..

*

باران..

مانای گەڕانەوەی تەموتومان،

کاشیی تەڕو.. ژوانی تەڕ

مانای گەڕانەوەی تۆیە.. گەڕانەوەی شیعرە

ئەیلول.. مانای گەڕانەوەی..

پێکڕانوسانی دەستمانە

بەدرێژایی مانگی ئەیلول..

دەستەکانت لەسەفەربوون..

ئەیلول.. 

مانایگەڕانەوەی دەمت، قژت

پاڵتۆیەکانت، دستکێشەکانت.

بۆنەخۆشە هیندییەکەت

کەوەک شمشێر پێامدا دەچێت

*

بارانە ..

وەک گۆرانییەکی کێویلەیە.. دادەبارێ

بارانی تۆ..

لەناومدا دادەبارێ

وەک لێدانی تەپڵەکانی ئەفریقایی

دادەبارێ..

وەک تیری هیندییە سوورەکان..

خۆشەویستی منیش بۆ تۆ

لەسەر دەنگ و هاژەی باران

شێوازێکی دیکە دەگرێ..

دەبێتە سمۆرەیەک..

دەبێتە جوانوویەکی عەرەبی..

دەبێتە قوو..*

لەبەر روناکایی مانگدا..

مەلە دەکا..

هەرکە دەنگی باران زۆرتر توندبێ

-----------

* قوو- واتە بجعة، بجع

ڕەهێڵەبێ.. 

ئاسمان وەکوپەردەیەکی..

قەدیفەی خۆڵەمێشیبێ..

وەکو بەرخێک دەڕۆم بۆ ناو لەوەڕگاکان

وێڵم بەدوای گیای تازەدا

بەدوای بۆنە خۆشەکەتدا

کە لەگەڵ هاویندا..

کۆچی کرد..