ئەمە بڵاوبكەوە
FaceBook  Twitter  

وشیار ئەحمەد ئەسوەد

چونكە پەروەردەی گەرمیان و كەركووكم، هاوكات شتێكی بچووكیش بێ لە گۆرانی و موزیك و مەقام دەزانم، بۆ من ئەستەم نابێ سۆزی دەنگ و تواناكان لە یەكتر جیا بكەمەوە.

كەم نین ئەوانەی خۆیان لە بواری مەقام لە دەڤەری گەرمیان دەدەن، هەریەكە و بەجۆرێك، نموونەیان شكور خەیات، شەوكەت كاكەیی، ئەحمەد فەرەج و زۆری تر، هەریەكەیان بەجۆرێك لە خزمەتی ئەو بوارەدا بوون و بەپێی تەمەن و كاركردنیان لە بوارەكە، دەهێنێ بە هونەرمەندی باشیان ناوزەد بكەین.

بۆ ئەم قۆناغەی ئێستە، وەك ژمارە زۆر كەمن ئەوانەی لە دوای ئەو نەوەیەی پێشتر توانیویانە خۆیان لە گوتنی مەقام بدەن یان ببنە قوتابیی نەوەی پێشتر. رەنگە هەندێكیان توانیبێتیان خۆ لە قەرەی بدەن، بەڵام وەك دەنگی مەقامیی و توانای باڵا كە هی ئەوەبێ بیخەینە بەر رۆشنایی، تەنیا یەك دەنگ هەیە بە تەمەنێكی كەمەوە، بتوانین وەك مامۆستای بوارەكە بیخەینە بەر ئاماژەوە.

هونەرمەند ئاگرین كە بەم ساڵانەی دوایی بۆ ئێمە وەك هونەرمەندی گۆرانیبێژ هاتە ناسین، پەروەردەی كەركووك و دەڤەری گەرمیانە، بەرپرسیارم لەوەی وەك هونەرمەندێكی بواری مەقام و دروست مەقامی رەسەنی كوردی، بە تەمەنێكی كەمەوە ناوی مامۆستای لێ بنێم. بێگومان لەبەر ئەوەنا كە دەنگی خۆش بێت، بەڵكو سۆزی دەنگی و یارییە دەنگییەكان و شارەزایی لەو بوارەدا كە خاوەنیەتی، وامان لێ دەكات سڵ نەكەینەوە لەوەی نازناوی "شا"ی لە بواری مەقامدا پێ ببەخشین.

مەقامەكانی دەڤەری گەرمیان زۆرن، گوتنیان ئاسان نییە، ئاسانترینیان "ئای ئای"یە كە لقێكە لە مەقامی "بەیات" كە هەموودەنگێك پێی ناوێرێ، یان ئەستەمە بتوانێ ئەو سۆزەی بداتێ كە خودی مەقامەكە دەیخوازێ. ئەستەمترینیان "ئەڵاوەیسی"یە كە سێ مەقام لەخۆ دەگرێ و ئاوێتەی یەكتر دەبن، بە "عەجەم" دەست پێ دەكات و و بە "راست رادەستی بەستە دەكرێ، بێگومان هەموو كۆكین لەوەی مەقامی "راست" لە ئەستەمترین مەقامەكانە. لەناو "ئەڵاوەیسی" گوێت لە مەقامی "نەهاوەند"یش دەبێ كە ئەویش بەهەمان شێوە لە ئەستەمەكانە. منیش كە باس لەو جۆرە مەقامە بۆ نەوەی ئێستە لەناو دەنگەگاندا دەكەم، دەتوانم ئاگرین بە سەرتۆپیان بزانم، واتە لەو بوارەدا "باشوەستا"یە.

ئەگەر تۆ بتەوێ، گوێبیستی یارییە دەنگییەكان "نبرات الصوتیە" بە هەموو جۆرەكانیەوە، لە دەنگی ئەو هونەرمەندە دەبیت كە بوێریی ئەوەمان هەبێ نەك وەكو گۆرانیبێژ، بەڵكو بە مەقامبێژی كارامەش ناوی بەرین.

تەنیا بۆ زانین، تا ئێستە نە دوور و نە نزیك، ئاگرینم نەبینیووە و نایناسم، ئەوەندە نەبێت، كە باوكی ئەو هونەرمەندە، یەكێك لە گۆرانیبێژەكانی كەركووكە و هاوڕێ كۆنی من بووە. بەڵام ئاگرین وەك هونەرمەند، هی ئەوەیە شانازیی پێوە بكەین كە بەردەوام ئاگربارانی مەقامی كوردیمان دەكات.