ئەمە بڵاوبكەوە
FaceBook  Twitter  

بەفرێكی ئەستوور ببارێت

ناهڵێت گەرمی نیگای قاتلەكان ماڵی ڕەنگەكان بشكێنێت

ئارەزووی سەفەرێكم 

تروسكەو بەربوونەوەی ئاسمان ببینم

ببینم

چ دەنگێك دوای كەوتنەخوارەوەی ڕەنگەكان دروستم دەكاتەوە دەمكاتەوە لە باران

شوشەی شەڕاب بداتەوە پێم

شەڕابی ئاسمانەكان لەخەمی ئەو نیشتیمانە تێدەگات

لە دڵی گریانەكان حاڵیە

ئارەزووی سەفەرێكم بۆ لای ئاوێزە

دەمباتەوە ناو گوڵێكی شین

سەرابی ڕەنگ نابینم لەماڵی خوا

چریكەی بردنەوەم باڵ دەگرێت

خەنی بوونم دەبێتەوە بەڕۆح

تەماشام لەكەناری جۆگەكان دەڕوێت

ڕاچڵەكینی دڵم دەدرەوشێتەوە 

نامەوێت بێمەوە 

لایتێكی سكوت جێدەهێڵم ونیگایەكی ڕێژنە لە نیشتیمانی ئاسمان وەردەگرم

حەزم لەسەفەرێكە مردنی تێدا نەبێت

خەونی دڵ شكانی تێدا نەبێت

درەنگ دەچین بۆ سەر هەواڵەكانی جەنگ

ناڕۆینە تەوقەكانی پەشیمانی

زەحمەتەكانم دەكەم بە نوسینێكی سور

لە كەڵەگەتی سنورەكانی دوور دەخەمەوە

باڵای نیشتیمان پەمەیی تر دەبێت

لە ماڵی گریان ناخەوم

لە سەربانی برینەكان ڕادەوەستم و جەنگەكانی دەدەمەوە

حەزم لەسەفەرێكی ئاڵتوونی بوو

لەگەڵ هەموو ڕەنگەكانم بكات

نازانم چۆن دەبمەوە بە باران

چۆن دەبمەوە بەفر

ئەو خوایەم خۆش دەوێت دەچم لەماڵی ئەودا دەخەوم

دەست وەبەر ڕۆیشتنم نانێت

پێكەنینم لێ ناسوتێنێت

بەنیگایەكی چكۆلەی باران دەڕۆم 

بە كۆلكە زێڕینە دەرسەكانم دەخوێنم

سپاس بۆ نیعمەتەكانی ئاسمان 

___

بەكرئاڵەیی

10/1/2020