ئەمە بڵاوبكەوە
FaceBook  Twitter  

هاوژین سڵیوە ـ كۆیە 

1ـ لەسەرما پاڵتۆی

كەوڵی ورچی سپی پۆشی

چیا.

2ـ بەرگی بوكێنی پۆشی

دار سنەوبەرەكەی 

حەوشەمان.

3ـ لەسەر مێزی حەوشەمان

قاپێكی پڕ

لە دۆندڵمەی سپی.

4ـ جەرجەفێكی سپی

بەسەر مێزێكەوە

توێژێك بەفر.

5ـ ڕەش و سپی

پێكەوە دێنە خوارێ‌

ڕیشۆڵە و بەفر.

6ـ لەپ و ڕوو

خۆی بەزەوی دادا و

بەبێ‌ دەنگی دەگریێ‌ 

بەفر.

7ـ پایز بەتۆبزی

جلی دارستانی داكەند

بەفر پۆشاكی پاكیزەیی پێبەخشی.

8ـ ئاسمان بەئارامی هەناسەی دەدا

سروشت پڕپڕ بوو

لە وەنەوزی سپی.

9ـ پاڵتۆكەی داتەكاند

هەیوانەكە پڕ بوو

لە پوولەكەی سپی.

10ـ ڕۆحمان

ختووكە دەدا

شەڕە بەفر.

22/1/2019

ئەدەب وهونەر