ئەمە بڵاوبكەوە
FaceBook  Twitter  

عبدالرحمن بامەرنى

ئێک ژ مفایێن سوشیال میدیایێ و پێشکەفتنا ئەم تێدا دژین، پێکڤە گرێدانا مەیە ب ئێکڤە، کو ئەم زێدەتر هایدارى ئێک بین و هەر چنە بیت وەک نڤیسەر ئەز دێ بەحس کەم، دەما چاڤێ من ب ئێک ژ شعرێن دلزارێ شاعر کەفتین و شعرا وییا بناڤێ (تاکەى) من خواندى، یا راستى بیت، نە بتنێ وێ شعرێ ئەز کێشامە خوە، بەلکو بۆ چەند دەمژمێران ئەز مژوولى خوە کرم، ئەو پرسیارێن د مێشکێ مندا دروست کرین و ئەو بەرسڤێن من بۆ وان پرسیاران کەرکرین، دوو تشتێن گەلەک ژ ئێک دوویر بوون، د سەر وێ چەندێ را، کو پەیڤێن شعرێ د سادە بوون، مرۆڤ زوى تێدگەهیت و چ رامانێن ڤەشارتى و (تەلسەم) دپشت را نینن، لێ مالک مالکا شعرێ، هەمى ژ کویراتییا ئازارێن مللەتى دەرکەفتینە. شاعرەک کو تەمەنێ وى بۆ دەستپێکا چەرخێ بورى بزڤریت و دناڤ روودان و گوهورینێن دەڤەر دناڤدا دەرباز بووى ژیا بیت و پشتیێ وى گەلەک یێ گران بیت، خەمێن وى نە یێن دەردوورێن وى بن و نە یێن ئایندێ وى و خێزان و کەس و کارێن وى بن، نەیێن حزب حزبانێ و ئاین ئاینانێ بن و بتنێ خەمێن وى رابوونا مللەتەکى بن، پێگەهشتنا مللەتەکى بن، هشیارکرنا مللەتەکى بن، تە دڤێت ئەڤ کەسێن ژڤى رەنگى، چ بهایێ خوە هەبیت، تایبەت ئەگەر ئەو شعرا ئەوى نڤیسایى ل ئاستەکێ بلند بیت و رەهوانیەکا باش تێدا هەبیت و ریتما وێ هەستێن نەتەوایەتى لدەف مرۆڤى ب ئازرینیت، پێنەڤێت، کەسەکێ ژڤى رەنگى دێ جهێ لێزڤرینێ و دەست خوشیێ و ناڤ تێدانێ بیت، هەر چەند تو وى ناس نەکەى و بزانى ژ چ عەشیرە و ژ چ دەڤەرە و ل چ پارێزگەهـ دژیت، ئها، ئەڤ کەسێ من سالوخەت کرى، دلزارێ شاعرە، خودانێ ڤێ شعرا ئەز بۆ خوە راکێشایم، یا بناڤێ (تا کەى).

د پەرەگرافەکێ ڤێ شعرێدا هاتیە:

تاکەی تێناگــەن تاکەی پێـــناگــــەن

تاکەی بە پەندو بیژی کــەس ناکـەن

تاکەی فەســادی تاکەی کەســادی

تاکەی هەر تیژی لەسەر عیـنادی

ئەگەر ل سەر ڤان چار دێران راوەستین، دەما دبێژیت هەتا کەنگى تێناگەهن، یان هەتا کەنگى پێناگەهن، کو راستى بیت، ئەم ژ ڤان هەردوو سالوخەتان نە د بەرینە و نە چ جارەکێ ئەم خوە تێدگەهینین و هەر وەکو قەدەرا مە بڤى رەنگى یە، چەند شاعر و نڤیسەران گازى کوردان کریە، هەتا کەنگى؟ لێ پرسیار ئەوە، ئەم مللەتەکین، ئەم نە د تێگەهشتینە، یان ژى ئەم هەولنادەین خوە تێبگەهینین! نەخێر ئەم ڤان هەردوویان دکەین، لێ شاعرى بەرسڤا ڤێ چەندێ ژى دگەل هەیە و د دێرەکا ڤێ شعرێ دا دبێژیت: (تاکەی هەر تیژی لەسەر عینادی)، جارەکا دى دێ بێژم ئایا عیناد و رکوویا ب مە کوردانڤە هاتیە نیساندن، ژبێ مێشکییا مەیە یان ژى ئەم هند ژێ شە دکەین؟!! د هەردوو حالەتان ژى دا، مە گەلەک قوربانى ژ بۆ داینە و مە گەلەک دەستکەفتێن خوە بۆ ژ دەستداینە. شاعر لڤێ بەندێ بتنێ نا راوەستیت و هێشتا دەردەسەریێن مە بەرچاڤ دکەت، دەما دبێژیت: (تاکەی مەحکومی تەکیە و خانەقـان)، هەر وەکو دبێژیتە مە ل رابوریێ خوە بزڤرن، ئەگەرێن شکەستنێن مە چبووینە؟ خەلکى ئەم ب چ سەردابرینە و چەکێ ئەم پێ سەردا دچین و پێ دهێینە خاپاندن چ جورە چەکە؟  ئەگەر تەکیێن شێخا و ئاین ئەگەر بیت ئەم پێ ژناڤ بچین، ئەم د ئێکگرتى نەبین، پا هەمان تەکیە و خانەقا و هەمان ئاین یێ لناڤ وان وەلاتان ژى هەى، ئەڤێن کورد دناڤدا هاتینە دابەشکرن، لێ بوچى ئەو توشى شکەستنان نابن؟ راستى ئەڤ پرسە و باوەرناکەم هیچ شاعرەکێ کورد ژێ دەرباز ببیت، ئەگەر باس ژێ نەکربیت و هەر ئێکى ژى لدویڤ دارشتنا خوە یا تایبەت، هیچ سیاسیەکى و هیچ شروڤەکارەک و هیچ مێژوونڤیسەک ژى ژێ دەرباز نابیت، ئەگەر نە گەهشتبیتە ئەنجامەکى، کو پرانییا شەکستن و ژناڤ چوونێن مە، سەر هشکییا مەیە و بناڤێ ئاینى ئەم هاتینە سەردابرن و خەلکى ئاین بۆ خوە کرینە داڤەرست و مللەتێن خوە ل سەر ئاڤاکرینە و بتنێ کورد نەبن، پشتا خوە کرینە داڤەرست و ئاین ل سەر قایمکریە و د نزیکترین هنگافتن ژیدا، چاوان مە دیت، مللەتێن ئاینێ مە پەیرەو دکەن، چاوان ئەم ب سەرداچووى و کرێگرتی ل قەلەم داین. تشتێ گەلەک ئەز ل سەر ڤێ شعرێ راوەستاندیم و نەهێلایى ئەز ژێ دەرباز ببم، دەما دبێژیت: (تاکەی لە دەقنی مەینە چەقــیون.. لەناو میللەتان هەروەک هەتیون).

 لدووماهیێ ژى یا من ڤیایى دڤێ نڤیسینێدا بێژم، ئەو دەمە هات ئەم ل رابوریێ خوە ڤەگەرین و هەلسەنگاندنەکێ بکەین، شکەستنێن مە و رابوونێن مە ئەگەرن، ئەم دەستێن خوە بکەینە دناڤ ئێکدا و دلزارێ شاعر، ئەگەر کەسەک بیت و شیابیت هنگافتنێن مە یێن دەهان سالێن رابورى وێنە بکەت، دڤێت ئەم ل سەر شعرا وى راوەستین و دەهان شاعرێن وەک وى، ئەم هەلسەنگاندنێ بکەین و خوە رەخنە بکەین، نە بتنێ ئەم ببینە خواندەڤایێن شعرێ و لاپەێن پەرتوکێ و مێژوویێ پێکدادەین.

تێبینى: شعرا (تاکەى)، یا دلزارى شاعر من ژ پەیچێ وى AhmdDlzar) ) ژ فیسبووکێ وەرگرتى یە.