ئەمە بڵاوبكەوە
FaceBook  Twitter  

 

ئەو ڕێیەی دەمانگەیەنێتە

تەنیشت سەرکەوتن

بەپۆستاڵی عەسکەرو

چەکمەی جەندرمەو

دزمەی چریکەکان

بۆتە چڵپاو.

٭٭٭

ئەو ڕێیەی دەمانباتە

نێو رەشبەڵەکەکانی هیوا

بە پاتەی حیزبیەکان و

کەوشی کادیرەکان و

کەڵاشی بەرپرسەکان

دەبێتە چڵپاو.

٭٭٭

چڵپاو

رژاوەتە نێو دێراوەکانی ژین و

میوەکانی ئومێدی

بۆگەن کردووە

چۆڕاوەتە سەر شەقامەکان و

دەلینگمانی پیس و

هەموانیشی بێدەنگ کردووە.

٭٭٭

خەریکە

دەتکێتە نێو هزرمان و

کانیاوەکانی نیشتمان

خەریکە

تا کەمەرمان دەبێتە چڵپاو

دەبێتە سیاناو.