ئەمە بڵاوبكەوە
FaceBook  Twitter  

 هەمزە گوڵانی/ بمگێڕەوە بۆخۆت

بەناومدا بگەڕێ

پاکم بکەوە لەژەنگی دڵ

کەڕوی هێناوە ڕوخساری بەدم

تۆ بەتیشک وێنەی منت کێشا

بەڕوناکی زمانت پژاندم

خاکت نیشادام و 

ئاوت پێناساندم

کەچی 

بێگوێدان 

بەیاسای هەڵاتن و ئاوابوونی ڕۆژ 

ئەو پردی پەوەندیەم پچڕاند

کە لەسەرپایە بەهێزەکانی عیشق 

ڕاوەستا بوو!

................

بەناو مندا بگەڕێ

توانای گەڕانی من سنوردارە

لەمێرولەیەک زیاتر نیە

بمکەوە بەخۆم ئەو باندە لەناو بەرە

کەتاریکاییان تێدا ڕواندم

ئاخر من لەو ساوە

هەر بەڕێگای گوماندا هەتڵەم و

نەمتوانیوە ؛

دەخیلەیەک دابنێم بۆ پاشەکەوتی یەقین!

.................

تۆ من دەبینیەوە

چاوی تۆ چاوی دیتنی

هەموو گیان لەبەرەکانە

ئەگەرچی؛

من زۆر گۆڕاووم....

پەلەوەڕ نەما دەستی بۆ نەبەم

دەرخت نەما لەکۆرپەکانی دا نەبڕم

کانیاو نەما هەڵینەگێڕمەوە

وەفای سەگم کوشت و سەرم بڕی

هێلانەی هەرچی باڵندەیە تێکمدا

چەقۆی من سورە بەگەردنی شیردەرەکان

بازمداسەر پەپولە 

هەرچەند بەڕەنگە واڵاکانی پاڕایەوە

خاڵخاڵۆکەم لەجوانی ڕفاند.

....................

تۆ من دەبینیەوە

هەستی تۆ بەناو زەریاکاندا دەگەڕێ

بوونی من لەئەختەبووتیشدا دەزانی

بیری تیژی تۆ لەجەنگەڵستانیشدا بڕدەکا

من دەعبایەکی دڕەندەم

خۆ ڕەنگە لەبەرازێکدا بمناسیەوە!

.....................

چدەبێ جگە لەنزا ، لەپاڕانەوەیەکی سپی 

لەڕێکردن بەناو ئاگری باوەڕێکی پشتگوێخراودا..

بەندە یەک فەرمان بکا بڵێ ئەی پەروەردیگار؛

بمکەوە بەمرۆف بمگێڕەوە بۆخۆت؟!