ئەمە بڵاوبكەوە
FaceBook  Twitter  

۱

پوونگی تەڕی دەم جۆگەلە

شەرم دادەگرێ

لە بینینی باڵای ڕێواست

لەبەهەشتیش، شایەتی دەدەم

تامی لە لێوم ماوە

ماچی لێوی گێلاست

۲

باخی دڵم کراوەیە،

وەرە بگەرێ بۆ خۆت

حەزت لە کام میوەیە

بە سێ پەنجە

ڕادەگرم بۆت!

۳

هەرچی هەیە،

لە بۆنی خونچە و کرووک

ناگات

بە بۆنی هەناسە و

باوەشی بێگەردی تۆی بووک

٤

لە ژوانی باخ

من و تۆ، بووین بەیەک

بووین بەئەسپیندارێکی پڕ شکۆ و ڕێک

ڕەشەبامان شەرمەزارکرد

بەو هەموو ڕقە،

نەیتوانی بمانکات لێک

٥

لە نێو باخی سێوان

من سێوێکم دا بەتۆ

تۆ دووان

بزە بوو بە پێک

چەند نۆشمان کرد

شەرابی شاتووی لێوان

٦

دارچنار، بۆ هاتنت

گەڵای بێگەردی خۆی

دەخاتە ژێر پێت

پەپوولە دێتە سەما

کەناریش،

ئاوازی ئەوین دەچڕێنێت.

۷

سیمای تۆ،

ڕەنگی سروشتی گرتووە

منیش، بۆنی تۆ

گەر بشنازی، 

وەک نازنازی بەر هەتاوێ

منیش، خاڵخالوکەم

لەسەر گوڵی تۆ.

٨

ئەو ئەوینە، چەند شیرینە

کانیاوی بزەو

ماچ و حەزە

سنەوبەری هەر چوار وەزە

جوان و 

پڕ شکۆ و بەرزە!