ئەمە بڵاوبكەوە
FaceBook  Twitter  

چیاو دۆڵا‌و شاخ لەهەر شوێنێك بێت، وێنەكێشێكیش لەوێ‌ لە دایك دەبێت، ئەوەتا لە خانوویەكی سادە‌و ماڵەكەی هونەرمەندە دەستگڕەنینەكەی عومەر سەرابیدا، لەنێو گوڵا‌و گوڵزارو نەغمەی بولبول‌و بۆنی جیاوازی رەنگەكان ئەو تابلۆیانە خۆیان نمایش دەكەن كە جیاوازییەكی ئەوتۆیان لە وێنە واقیعەكەوە دوورترنین.

No description available.

گەلەرییەك بەناوی وشە پڕاوپڕ لە داهێنان‌و چێژی هونەر، لەوێ‌ دەزانی تواناو سەلیقەی هونەرمەند لە چ ئاستێكی بەرزدایە، ئەو هەمیشە ویستوویەتی لەگەڵا واقیعی ژیان خۆی بگونجێنێ‌، بەو پێیەی هونەرەكەی هیچی كەمترنییە لە شاكاری هونەرمەندە جیهانییەكان. گەلەریەكەی سەرابی بۆتە قوتابخانەیەك بۆ هەموو ئەو فێرخوازانەی كەخولیای وێنەكێشانیان هەیەو ساڵانە چەندین خول بۆ فێرخوازان بێبەرامبەر دەكاتەوە.

No description available.

ئەو لەو گەلەرییە ناوازەیەدا جگە لە بڵاوكردنەوە‌و نمایشكردنی تابلۆكانی، هەوڵی فرۆشتنیشیان دەدا، وەك خۆی لەو دیمانەیەدا دەڵێ‌، ئێستا بەداخەوە هونەر لەوڵاتی ئێمە نەبۆتە پیشەو سەرچاوەی داهات بۆ خاوەنەكەی، ئەمەش وادەكات كەهونەرمەند بۆ پەیداكردنی بژێوی ژیانی دوری لەهونەرەكەی هەڵبژێرێ، بەڵام ئەو كار بۆ ئەوەدەكات كەوەك پیشە كاری لەگەڵدا بكرێت و لەو ڕێگایەشەوە سەرچاوەی داهات دەستەبەربكات.

No description available.

لە درێژەی قسەكانیدا سەرابی دەڵێ‌: خەڵكی سەردانم دەكەن و بەگوێرەی داخوازی ئەوان وێنەكان دەكێشم بەڵام لەبەر ئەو بارودۆخە خراپە ئابوریەی ئێستا كاریگەری هەبووە لەسەر هونەری ئێمەو خەڵك كەمتر لەجاران داوای كێشانی وێنە دەكەن.

هەروەها دەڵێ‌: «زۆربەی وێنەكانی من هی سروشتی كوردستانە زۆرجار من حەزم كردوەو پێویست بووە بچمە نزیك چیاكان یاخود چیاكان بۆ ئەوەی چەندین وێنەی راستەوخۆ بكێشم، بەڵام كەمئەندامی من ڕێگربووە و نەمتوانیوە بچم.

No description available.

ئەو تەنها یەك خولیای نییە، ئارەزووی بۆ فێربوونی زمانەكان یەكجار زۆرە، زمانەكانی كوردی‌و عەرەبی‌و ئینگلیزی‌و فارسی بەباشی دەزانێ‌‌و هەوڵی فێربوونی زمانی فەرەنسیش دەدات. سەرابی لە دوای ماندووبوون بەهۆی دروستكردنی تابلۆكان لەگەڵ باڵندەكانی كە حەزێكی لەبن نەهاتووی بۆیان هەیە ئەو (نەی) ژەنێكی باشیشە، هەر ئاوازێكی ئەو هەڵیدەبژێرێ‌ یەكسانە بەو ئاوازەی كە لە سروشتدا بوونی هەیە.

No description available.

لە كۆتایی قسەكانی سەرابیدا ویستی هاوسۆزی‌و یارمەتیدانی هاوژینەكەی بیرنەچێت كە ساڵانێكە وەك شاخێكی لەبن نەهاتوو پشتی پێوەناوە‌و لێنەگەڕانەوە بڕوخێت: ئەو دەڵێ‌ لەپشت هەر هونەرێك پاڵنەرێكی شاراوە هەیە، هەر ئەو پاڵنەرەش هونەرمەند بەهونەرەكە دەبەستێتەوەو هێزی بەردەوامی و گەیشتن بەلوتكەی تێدا ترۆپ دەكات، ئافرەتێك ساڵانێك بەر لەئێستا دەستی گرتم و وانەی ژیانی فێركردم، ئەو عەشقەش بۆتە هۆی بەردەوامی و هەوێنی نیگارەكانم.

ژیاننامەی هونەرمەند

عومەر سەرابی، ناوی تەواوی (عومەر عەبدوڵا عەزیز)ە لەساڵی 1971 لەشاری قەڵادزێ لەدایكبووە هەرلەوێش نیشتەجێیە، ئەو خاوەن پێداویستی تایبەتە و هەردوو قاچەكانی بەهۆی ڕووداوێكەوە لە ساڵی 2000 لەڕێگای هەندەران لەدەستداوە.

ئاستی خوێندنی سەرابی هەتا پۆلی نۆی بنەڕەتی خوێندووە، هەر لەمنداڵیەوە خولیای وێنەكێشانی هەبووە، بەڵام كاتێ قاچەكانی لەدەستداوە دوای دوو ساڵ لەسەر جێگا هەڵسایەوەو دووبارە فڵچەو قەڵەم و بۆیەكانی كردە نزیكترین هاوڕێی و دڵۆپ دڵۆپ ئازارەكانی گەلەكەی و سروشتە جوانەكەیان پێدەكێشێ.

No description available.