ئەمە بڵاوبكەوە
FaceBook  Twitter  

  

شیڤان شێرزاد

لە ڕۆژێکدا (هەولێر) بەشداربوو لە دوو چالاکیی جیاوازی هونەری، کە بەڕێوەبەرایەتی گشتی ڕۆشنبیری و هونەری هەولێری سازی کردبوو، لە چالاکی یەکەمدا پێشانگایەکی خەت و زەخرەفەی هونەرمەندی خۆشنووس (فەرید فەرێدون) لە هۆڵی شێوەکاری میدیادا کرایەوە، کە چەندین تابلۆی تایبەت بە هونەر و سەلیقەی ئەو هونەرمەندە نەخشێندرابوو بە ئامادەبوونی هەریەک لە بەڕێزان (حەمەی حەمەسەعید) وەزیری ڕۆشنبیری و لاوانی حکومەتی هەرێمی کوردستان و (فەرهەنگ غەفوور) بەڕێوەبەری گشتی ڕۆشنبیری و هونەری هەولێر و (سەلیم قادر) جێگری بەڕێوەبەری گشتی ڕۆشنبیری و هونەری هەولێر تێیدا ئامادەبوون و دێڕێکیان بۆ یادگار لە بارەی تابلۆ کارە ناوازەکانی ئەو هونەرمەندەوە نووسی.

هاوکات بە ئامادەبوونی (زەعیم عەلی) ئەندامی مەکتەبی سیاسی پارتی دیموکراتی کوردستان و (ئومێد خۆشناو) پارێزگاری هەولێر و ژمارەیەکی بەرچاو لە هونەرمەندان و ئەدیب و ڕۆشنبیران، پەردە لەسەر پەیکەری نووسەر و هونەرمەندی گەورە (تەڵعەت سامان) لادرا، کە لەلایەن بەشی سەنتەرە ڕۆشنبیری و تیپە هونەرییەکانی سەر بە بەڕێوەبەرایەتی گشتی ڕۆشنبیری و هونری هەولێر بۆی دروستکرابوو، ئامادەبووانیش پەیکەرەکەی هونەرمەند تەڵعەت سامانیان گوڵباران کرد.

پاشان چەند وتارێک دەربارەی خزمەتی بەرچاوی ئەو هونەرمەندە لە کۆڕی شانۆی کوردی خوێندرایەوە و تیشکیان خستە سەر ڕۆڵ و داهێنانی لە هونەر و نووسین و کاری دەرهێناندا.