ئەمە بڵاوبكەوە
FaceBook  Twitter  

خوێندنەوەی: شاخەوان عەلی حەمەد مامۆكی

لەم ماوانەی ڕابردوودا شاعیری لاو و هەست ناسك بەدونیای شیعر كاك(محەمەد ئەحمەد) ناسراو بە (گدرون) دووەم كتێبە شیعری خۆی لەژێر ناونیشانی(پەروانە و ئاگر)لەدوو توێی (160)و بە تیراژی (1000) دانە لە چاپخانەی ڕۆهەڵات بەچاپ گەیاندكە كاك (دلزار حەسەن) پێشەكی و پێداچوونەوەی بۆ كتێبەكە كردووەو سەرنج و تێبینی خۆی لەبارەوە خستوەتە ڕوو.

جا ئەوەی هەڵوێستەی پێكردم بۆ ئەوەی لێرەدا ئەگەر بەشێوەیەكی سەرپێییشبێ تاوەكو ڕانانێ بۆ هەندێ لە دەق و تێسكە شیعریەكانی ئەو گەنجە بكەم، ئەویش تامەزرۆ بوون و سەرسام بوونبوو بەو زمان و خولیا و تابلۆو دونیا بینی و ژیان جەنجاڵیەی لەو كتێبەدا وەك ئامرازو كەرەستەیەكی پڕ لەداهێنان، توانیویەتیجیهانێكی تەژی لە جوانی پێشكەش بە خوێنەران بكات و بە تێڕامان لێی خوێنە ئاوێتەی نێو دونیایەك دەكات كە حەز بە گەڕانەوەو دەرچوون لەو خۆشیە نەكات و حەزی مانەوەی لەوە زیاتربێ كە ئەوی نووسەرلەو گۆشە نیگایەدا وەك یەكەم نۆبەرە نمایشی كردوون.

(پەروانەو ئاگر) نۆزدە شیعری دوورو درێژی لەئامێز گرتووە، لەدەسپێكی شیعرەكانیدا بەناوی (عاشقی عەودال) دیمەنی ئەو دولبەرەمان بۆ وێنا دەكات كە چۆن لەیەكەم دەركەوتن و یەكەم نیگادا بەغەمزەی چاوەكانی مەستی دەكات و كۆمەڵێ یادگاری پڕلەخەم و خەفەتی لەلای بەجێ دێڵێ و تووشی گۆشەگیری و غوربەتی دەكات كە بەهۆی دووركەوتنەوەو دابڕان نەتوانێ بۆئەو رۆژانە بگەڕێتەوە.

تا بەغەمزەی چاوی ئەستەم، ئاشنام دەكەی

بەئاوڕی فیڕاقی ناكاو، جودام دەكەی

تا بەنێو نیگای مەستت، دێوانەم دەكەی

دوایش وەك عاشقی عەوداڵ، تەنیام دەكەی

گەرچی دووری لەبەر چاومدیار نەماوی

هێشتا بەنیگای جارانت شەیدام دەكەی

من كە داڵدەبەری سێبەری باڵای تۆم

بۆچی ئاوارەو وێڵ و بێ نەوام دەكەی

كاك محەمەد ئەحمەد لە شیعری(سیحری جوانی)هاتووە، دەیەوێ خەسڵەت و وەسفی ئەو ئەڤیندارەمانبۆ بكاتە چوارچێوەی تابلۆیەكی ڕەنگاو ڕەنگی ئەرخەوانی و هەر لەو رێیەوە مەعشوقەكەی دەشوبهێنێ بە ڤینۆس و خۆیشی بەفەرهادی عاشقی شیرین.

پەچەی زولفی بەری چاوی كێی ڕەش نەكرد

مەگەر كەسێ ئەو پەردەی ڤینۆش دادەكا

عاشقی ناڵەی پێوەری زامی نەبێ

وەكو فەرهاد هاواری بە غاردا دەكا

كە ناڵەی بیست برینی قوڵتر كردم

وتی(گدرون) چەشنی بولبول سەما دەكا

شاعیر لەو ڕێچكە شیعریەی هانای بۆ بردووەو شیعری لەسەر هەڵدەچنێ، سەرەتاكانی گەمەكردن بەوشەو هۆنینەوەی ملوانكەی شیعر لە رێبازە كلاسیكیەكەی دەریناكات كە بەهەمان هەناسەوە زامی دووری وای لێ دەكات شینی پەروانە بكات.

كە زولفی ڕەشی هەردەم بەسەر سیما چێ

تا عومری عاشق بەم شەوی یەڵدا چێ!

خۆ لەبەر شەمعت پتر پەی بەفەنای بەی

ئیزنی پەروانەت دەدەی بەو شەوقەتا چێ

شاعیر لەو ڕەچە رێیەدا هەر بەوە نەوەستێ، دەیەها تەڕشیعری پوخت و جوان و پیرۆز دەخاتە ملی عاشقان، ئەوەتا دەڵێت:

دڵم لە حەسرەت فیڕاقی بەكەسەر چوو

دیدەم بەهیوای دیداری بەهەدەر چوو

ڕۆحم لەڕێی سۆراخی دا بێ خەبەر چوو

عومرم لە ئینتیزاری ویساڵی بەسەرچوو

كەچی هێشتە بۆ دیدەنی تاسەبارم

شاعیر دوای خولانەوە لە رێبازی كلاسیكی، پەنا دەباتە بەر شیعری ئازاد و لەیەكەم كۆپلە شیعری دا دەیەوێ تەمەنی خۆی ڕوون بكاتەوە، تەمەنی خۆی بە دەفتری یادەوەری سەیر دەكا.

عومرم – پەڕاو

ڕۆژو شەویشم – لاپەڕە

گەرچی نازانم چەند پەڕم

بەڵام دڵنیام

دوا پەیڤی دەقم باوەڕە!

لەشیعرێكی دیكەیدا، بۆ لاوانەوەی كۆرپەكەی پەیامێكی هەست ناسكی بەگوێ دادەدا، پێی ڕادەگەیەنێ كە دەبێ بەرگەی ناخۆشیەكان بگرێ و سەرەڕای نەهامەتی و چەرمەسەرێی ڕۆژگار، ئەوە نابێ لەكاروانی ژیان داببڕێ.

كۆرپەلەكەم...

لەقەدەری ڕەش پەست مەبە

چەرخی زەمەن بەخوولی چاوت ناگەڕێ!

دەبێ چاوە گەڕۆكەكەت

بەڕێڕەوی ئەو بسووڕێ.

بۆ بەختی ونیش سست مەبە

خۆئەوەندەی چاوەڕوانی هەوری هاتی

هەتا پەڵەیەكی سپیت بێتە سەری!

خۆت بۆی چووبای

ئێستە سەری سەودا سەرت

ئەگەیشتە بەر سێبەری!

هەروەها لە شیعری (خۆڵەمێش)دا شیوەن و گریەو زاری بۆ دایكە جەرگ سووتاوەكانی شەڕی دژ بەداعش دونیا دادەپۆشێ كە گوزەر بەنێو دژواری ئەو بەسەرهاتانە دەكاتو دوای هۆنینەوەی ئەو زامە قووڵ و پڕ ئێشە، دواجار دەپرسێ و پرسیارمان ئاڕاستە دەكات.

من دەپرسم:

ئاخۆ كام شین،

لەشیوەنم درێژترو،

كام زام لەم زامەم قوڵترو،

كام ژان لەم ژانەم جیڕترە!

ئاخۆ كام غەم،

ئەچێتەوە سەر غەمی من،

كام گریەش لەگریەم دەچی!

دەپێم بڵێ

كام نیشتمان

هاودەردی تۆو

میراتگری غەمی تۆیە

شاعیر خۆی بەخەمخۆری مرۆڤایەتی دەزانێ، هەمیشە لەخەمی ئەوەدایە مرۆڤە بێ ئاگاكان بەئاگا بێنێ، بەتایبەت ئەوانەی بەئاگان بەڵام لەناخەوە خەوتوون و خەوی مرۆڤەكان لەئازادی بەرجەستە دەكات كە هیچ شت لەئازادی گەورەترو بەنرختر نیە بۆ ژیان.

لێم دەپرسن...

هێندەی لە ژیان دەخەوی

بۆ خەونەكەت هێندە ناژی!

چونكە خەونم،

هەردەم ئازادی ژیانە.

بۆیە لەژیان قەت خەونم نایەتە دی

بەڵكو لەخەو

ژیانێكی ئازاد دێتە دی!

لەكۆتاییدا دەڵێین: ئەم هەنگاوەی كاك (گدرون) سەرەتاییەكی جوانن بۆ ناسین و ئاشنابوون بە شیعرەكانی كە ئەگەر بەهەمان هەناسەوە درێژە بەو ڕەوتە شیعرییەی خۆی بدات، دڵنیام دەبێتە یەكێك لە ئەستێرە درەوشاوەكانی دونیای شیعر..هیوای بەردەوامی و بەرهەمی جوانتری بۆ دەخوازم.