ئەمە بڵاوبكەوە
FaceBook  Twitter  

من باسی باكوورت بۆ ئەكەم باكوور

ئەچمەوە باكوور، دوورترین مەملەكەتی گیا

مەملەكەتی تەمتوومان

برادەرەكانی مناڵیم هەموو لەوێن

لەوێ‌ لە ژێر تاوێرە بەردێ‌

نامەی یەكەمین ئەوینی خۆم شاردۆتەوە

لەوێ‌ زمان بەشی ئەو مەلەكووتە ناكات

بە ستیلی خەون دروستم ئەكاتەوە

لەوێ‌ كتێبی بۆنی مناڵیی ئەدۆزمەوە

لەوێ‌ زەمان ئەبەدییە

زمان ڕستەیەكی خورافیە

لەوێ‌ لە ناو ڕووباری گانگا

كە خوڵەمێشەكەی تاگووری تیا ڕژاوە

قسەم لە گەڵ كریشنا كردووە ئەچینەوە ئایندە

لە كاتدرائیەی سامباستا

گومانم لەگەڵ شێكسبیر ژەنیوە

لە ناو گۆڕستانی خاك و خۆڵ

نامەی نالیم خوێندۆتەوە

درودە پیرۆزەكانی بەلاغەتم لە دڵمدا هەڵگرتووە

من باسی باكوورت بۆ دەكەم باكوور

ئاخ باكوور چەند دوورە بە ئاستەم لە زەینم ماوە

وەك منی لكە گیا لە تۆی ئاو

وەك نارام سین لە سەرچاوە دوورەكانی

دەزانی باكوور چەند دوورە

وەك نەی لە مەملەكەتی قامیش

وەك سامۆرا لە شمشێر

باكوور پڕە لە سێو ، سێوی ئەوین

سێوەكان ڕەنگاو ڕەنگن

ڕەنگەكان پر باق و بریق

بریقەكان هەمووی وێنەی تۆن شازادەی كاستالیا

وێنەی تۆ هەزار هەزارە لە ئاوێنەی نارسیسیم

بە دوای كام وێنەت بكەوم كوردیلیای من

دەرمانی لە هەزار ژەهر گیراوەی نادیار

كە ئەزانم بۆ هەر وێنەیەكت بچم

هەزاران هەزار جار ئەكەوم

ئاخ باكوور چەند دوورە شازاده‌ی ئاوی كاستیلیا

باكوور وەك كتێبی ئاسۆ كە ئەگاتە بنی ئاسمان

تا ئەیگەمێ‌ ئاوا ئەبێ‌

باكوور وەك قەڵەمی دەستی مناڵ

ئەوەندەی نووك ئەشكێنێ‌ و هەمدیس ئەیتاشێتەوە

تا ئەگاتەوە ده‌ستی من تەواو ئەبێ‌

باكوور پڕە لە ئاشق

ئاشقەكان هەمیشە نامە ئەنووسن

نامەكان هەمیشە ناگەن

ئەبن بە مەلی ده‌ریاچەی وان

ئەزانی مردن لە باكوور چەند خۆشە

وەرە ده‌ستت بده‌ ده‌ستم

بە یەكەوە ئەچین بۆ باكوور

ئەچینەوە سەر رووباری ئارنۆ

دانتی لەوێ‌ چاوەڕوانی بیاتریس ئەكا

بەسەر گەسگەكە باز ئەدەین و

هەرگیز لە یەك نابینەوە

لە باكوور هیچ كەسێ‌

لەبەر تای ئەشق چاوی نابینێ‌

چاویان پڕ بووە لە وێنەی مەعشووقەكانیان

لە باكوور كەس لەسەر زەوی دیار نییە

هەموویان بە ئاسمانەوەن

ئاخر هەموویان

بە دوای مەعشووقەكانی خۆیان لە فڕیندان

من باسی باكوورت بۆ ئەكەم باكوور ئەنتیگۆنا

باكوور وەكو ئاگر وایە لە بەر هەناسەی داغی ئاشقان

وەك ئاو وایە لەبەر فرمێسكی ڕوونی ئاشقان

وەك ئاهەنگ وایە لەبەر گۆرانی شازی ئاشقان

وەك باخی سێو وایە لەبەر دڵی ڕژاوی ئاشقان

مەملەكەتێكە لە سازو نەی

هەموو ئاشقەكان خەریكی چاندنی قامیشن

لە بەیانییەوە ده‌نگی نەیە تا بەیانی

لە باكوور كەس كاتی نییە بۆ قسە

هه‌موو دەمیان لە ناو دەمی یەكتر ناوە

لە باكوور تاكێ‌ نابینی

جووت جووت لەیەكتر ئاڵاون

سەریان لە بنگوێی یەكناوە

باكوور پڕە لە گۆزە، گۆزەی شەراب

بەینی خۆمان بێ‌ باكوور ئاوە ئاوی سەراب

هەموو ئێوارەیەك قازو قوڵینگ ئەگەنەوە باكوور

باكوور سپیی سپیی ئەچێتەوە

سەراو سەر خۆیان داوێن

وائەزانن گەیشتوونەتە ئاو

چەند گوناحن نازانن باكوور ئاو نییە

فرمێسكی چاوە، چاو

من باسی باكوورت بۆ ئەكەم باكوور