ئەم هەواڵە بڵاوبكەوە
FaceBook  Twitter  

حەمە رەنجاو

چەند رەقن ئەوانەی شیعر ئازار دەدەن, ئاخر شیعر گوناحەو بۆ چ دەیخەنە ناو هەمەجیەتی ئەو دیدانەی بە ئاراستەكانی شیزۆفرینیادا رێ‌ دەكەن, پێناسەی هەرە دیاری شیعر ئیستاتیكایە لەناو فانتازیایەكی ژیاندۆستانەدا, چ غەدرێكی گەورە لە بەهاكانی شیعر دەكرێ‌, كاتێ‌ وێنەكانی قێزەوەن دەكرێن‌و رستەكانی سیناخ دەكرێن لە ئاودەست‌و تف‌و پێشاو.

وەرە خوێنەری ئازیز ئەم كۆپلە شیعرە بخوێنەرەوە:

دەی گۆڕی گورگە ستالین

هەڵدەنەوە

بیكەن بە ئاودەست‌و پێشاو

تفی پێداكەن بە لێشاو

ئەمە تازەترین ئیبتكاراتی ئازاد دڵزارە بۆ قسەكردن لەسەر دونیاو, هەڵوێست وەرگرتن بەرامبەر رووداوەكان, مرۆڤ ئازادە لەوەی چ بیروباوەڕو ئایدیاو سیمبولێك قبوڵا دەكا, یان رەتی دەكاتەوە, بەڵام سوكایەتی كردن بەوەی تۆ قبوڵت نییە, ئەو ئازادیەت دەخاتە ژێر پرسیارەوەو, جۆرە گومانێكیشت لە عاستدا قوت دەكاتەوە.

ستالین سەردەمانێك سونبولی ئازادی‌و پێشكەوتنخوازی زۆرینەی خەڵكی دونیا بووەو, ئومێدێك بووە بۆ رزگاركردنی گەلان لە فاشیەت‌و بۆتە ئیلهامی هەزاران شاعیرو هونەرمەند‌و, باوكی ئەو ئازاد دڵزارەش یەكێك بووە لەو هەزارانەو, كاتێ‌ ستالینیش دەمرێ‌ گۆرانی شاعیر بە غەمگینیەوە باس لەو فرمێسكانە دەكا كە بۆی هەڵڕشتوون.

ئازاد دڵزار مافی خۆیەتی رەگەڵا ئەو شاڵاوە كەوێ‌ كە ستالین بە دیكتاتۆر دەزانن‌و هاوشانی كات, لەگەڵا هیتلەر, بەڵام با بەو وشەو دەستەواژانە راكانی خۆی دەربڕێ‌ كە لایقی نووسین‌و پەیامەكانی نووسینن, ئەوە جگە لەوەی ئیشكالیەتی رووناكبیری كوردی لەوەدایە كە هەردوو چەمكی زەبرو زەنگی هیتلەرو ستالین تێكەڵا دەكەن, ئەوە لەكاتێكدایە ئەلف‌و بێی جیاوازیەكان لەوەدایە كە ئەو زەبرو زەنگەی كەسێكی شۆڕشگێڕ لە دەرئەنجامی داگیركاریدا بەرپای دەكا زۆر جیاوازە لەو زەبرو زەنگەی دیكتاتۆرو فاشیەك لە پێناو داگیركاری وڵاتان‌و قڕكردنی گەلاندا بەرپای دەكا, چونكە ئەوەی یەكەم لەپێناوی بنەبڕكردنی ملهوڕی‌و وەدەست هێنانی ئازادی گەلاندایەو ئەوەی تر لە پێناوی كۆنتڕۆڵا كردنی وڵاتان‌و زەوتكردنی ئازادی گەلاندایە.

لەدواییشدا هەرگیز ناشێ‌ دوو بەهای جیاوازی ناو دوو ئەركی جیاواز بخەینە ژێر فشاری ناسنامەیەك هەر ئەوەش بوو وای لە هونەرمەندی گەورەی جیهانی شارلی شاپلن كرد بۆ دزێونیشاندانی دیكتاتۆرو ملهوڕی لە فلیمە بەناوبانگەكەیدا (دیكتاتۆری مەزن) هیتلەر هەڵبژێرێ‌ نەك كەسێكی تر, مخابن هەتا ئێستاش هەندێ‌ لە ئاراستە رووناكبیرییەكانی ئێمە لەناو سەلەفیەتێكی موتڵەقدا میكانیزمی كاركردنی خۆی وەگەڕ دەخاو, وزە شاردراوەكانی دوێنێی ئەمڕۆ بەڕقەوە دەردەبڕێ‌.

ئازاد دڵزار لەو كۆمەڵە شیعرەیدا, شتی جوانی دەربڕیوەو لەزۆر شوێندا داكۆكی لەراستییەكان كردووەو كارەساتە جەرگبڕەكانی خستۆتە روو.

بەڵام بەو شیعرەی‌و بەكارهێنانی ئەو دەستەواژە قێزەوەنانە روخساری شیعری زامدار كردووە دەخوازم داوای لێبوردن لە شەڕەفی وشەو ئیستاتیكای هونەری شیعریو مێژووی تێكۆشانی خانەوادەكەی خۆیان‌و خەڵكی تریش بكاو لەكۆتاییدا ئەویش دەیتوانی بە ستالین بڵێ‌ دیكتاتۆرو هەر زاراوەیەكی تر بەكار بێنێ‌, بەڵام ئاودەست‌و تف‌و پێشاو لەكوێ‌‌و, بەهاكانی شیعرو جوانییەكانی دونیا لەكوێ‌.

ئەدەب وهونەر