ئەم هەواڵە بڵاوبكەوە
FaceBook  Twitter  

نزیكایەتی دەوڵەتی عوسمانی و ئەلمانیا دەگەڕێتەوە بۆ ماوەی فەرمانڕەوایی سوڵتان عبدالحمیدی 2 بەتایبەتی لەلایەنی سەربازی و ئابووری،دواتریش ئیتحادیەكان بەردەوام بوون لەنزیك بوونەوە لەئەلمانیا تاوەكو لەم ڕێگەیەوە بتوانن بەشێك لەفشاری بەریتانیا و ڕوسیاو فەرەنسا كەم بكەنەوە،لەبەرامبەردا ئەلمانیا دەیویست لە ڕێگای دەوڵەتی عوسمانی دەسەڵاتەكانی لەڕۆژهەڵات فراوان بكات،دوای ئەوەی سوپای عوسمانی لەشەڕەكانی بەڵقان شكستی زۆری خوارد دووبارە بۆ ڕێكخستنەوەی سوپا پشتی بەشارەزایانی ئەلمانی بەست،چونكە ئیتحادیەكان سەرسام بوون بەسیستەمی بەڕێوەبردن وسوپای ئەلمانی .

ئەم نزیك بوونەوەیە پەرەی سەند تا لە2/اب/1914 ڕێكەوتنێكی نهێنی لەنێوان دەوڵەتی عوسمانی و ئەلمانیا مۆر كرا،بەگوێرەی ئەم ڕێكەوتنامەیە ئەگەر ئەلمانیا شەڕی دژی ڕوسیا ڕاگەیاند دەبێت دەوڵەتی عوسمانی هاوكاربێت.

كاتێك شەڕی یەكەمی جیهانی هەڵگیرسا لەسەرەتادا دەوڵەتی عوسمانی بێلایەنی وڵاتەكەی ڕاگەیاند،سەدرلئەعزەم ئەم هەڵوێستەی بەسەفیری بەریتانیا ڕاگەیاند،پێش هەڵگیرساندنی شەڕ ووڵاتانی ئەوروپا لەنێوان خۆیان دا لەڕێكەوتن دابوون بۆ دابەش كردنی خاكی دەوڵەتی عوسمانی كەبەپیاوە نەخۆشەكە ناودەبرا .

لە14/تشرینی2/1914 دەوڵەتی عوسمانی لەپاڵ ئەلمانیا چووە ناو شەڕ،ڕاگەیاندنی شەڕ كاتێك بوو كە دەوڵەتی عوسمانی لاوازو هەڵوەشاوەبوو،توانای بەرگەگرتنی ئەم شەڕەی نەبوو هەربۆیەش ڕای گشتی دەوڵەتی عوسمانی لەگەڵ بەشداری كردنی شەڕدا نەبوو،وەكو ناڕەزاییەك ژمارەیەك لەوەزیرەكان دەستیان لەكاركێشایەوە .