ئەم هەواڵە بڵاوبكەوە
FaceBook  Twitter  

ئا: هێڤا هێرش

 زۆر كەسایەتی هەن ساڵانێكە لە بواری هونەریدا خزمەتێكی شایستەیان كردووە، بەڵام بەپێی پێویست زومی كامیراو یاخود راگەیاندنكاران لە نزیكەوە ئاگاداری كار‌و چالاكییەكانیان نەبوونە‌و هەشیانە بە پێچەوانەوە دیار‌و بەرچاوبوونە، پێمان باش بوو تەوەرێك بكەینەوە‌و چەند پرسیارێكی سادە‌و ساكار لەو هونەرمەندە ئازیزانە بكەین كە دەمێكە بوونەتە مۆمێك بۆ ئەوەی هونەر لەو وڵاتدا بە زیندووی بهێلنەوە، لێیان دەپرسین *جگە لە كاری هونەری بەچی سەرقاڵی؟ *بەرنامەی نوێتان چییە؟ *كێ‌ هونەرمەندە، ئایا ئەوەی دەرچووی پەیمانگای هونەرە جوانەكان بێت دەتوانین پێیان بڵێین هونەرمەند ؟ *بۆچی بەشێكی زۆری قوتابیانی پەیمانگاو كۆلێژی هونەرە جوانەكان دوای دەرچوونیان لەو پەیمانگایە ناتوانن درێژە بە كارە هونەرییەكانیان بدەن؟

 ساڵی ١٩٩٥ لە پەیمانگای هونەرە جوانەكان وەرگیرام، بەشی وێنەكێشان. لە ماوەی ئەو پێنج ساڵە چەندان گرفتی زانستی و ئەكادیمی مان هەبوو، بەڵام لەگەڵ ئەوەش بەردەوام بە دوای خەونە ونبووەكانمانەوە بووین ، توانیمان چەندان چالاكی هونەری و نووسین لە بواری شێوەكاری و هونەر بە گشتی بكەین و لە زۆر شت تێبگەین لە دەرەوەی پەیمانگا. دوای ساڵی دوو هەزار بووین بە مامۆستای هونەری. لە ساڵی ٢٠٠٣ بووم بە بەڕێوەبەری نووسین لە گۆڤاری شێوەكاری. 

لە ساڵی ٢٠٠٠ گروپێكی هونەری شێوەكاریمان دامەزراند بە ناوی گروپی نەو رەست كە لە پێنج ئەندام پێك هاتبوو، لە ساڵی ٢٠٠٥ تەنها خۆم و دەشتی جەنگی و ئارام خالید ماینەوە و هەر ئەم ساڵە پیشانگایەكمان كردەوە لە گەڵیشیدا مانفستێكمان بڵاو كردەوە كە لە شێوەی كەتەلۆگێك بە چاپ گەیەندرا! هەروەها لە ساڵی ٢٠١٦ كۆلێژی پەروەردەی بنەڕەتیم لە بەشی زمانی ئینگلیزی تەواوكرد.

- جگە لە كاری هونەری و نووسین لەم بوارە، سەرقاڵی چەند كارێكی ترم بۆ ژیان و گوزەران، چونكە ئەو بوارەی ئێمە ئیشی تیا دەكەین ناتوانین وەكوو سەرچاوەیەك بۆ بژێوی ژیان سوودی لێ وەر بگرین. ئەمەش لەبەر چەندین هۆكاری جیا جیا كە ڕەنگە تەوەرەكە بگوازێتەوە بۆ ئاستێكی تر. 

-سەبارەت بە كار و بەرنامەی ئایندە بە نیازم بەشداری پیشانگایەكی نێو دەوڵەتی بكەم لە وڵاتی پۆڵۆنیا، كە بە درێژایی ساڵانی ٢٠٠٩ تا ئێستا زۆربەی ساڵەكان تیایدا بەشدار بووم.

- ئەم پرسیارە بە چەندان جار كراوە و دووبارە دەبێتەوە، خۆدی دووبارە بوونەوەكەش بۆ ئەو گرفتە دەگەڕێتەوە، كە بۆچی ئەو هەموو دەرچووە مان هەیە بەڵام بە گوێرەی ئەوە نەك هونەرمەند بگرە بینەری هونەریشمان نییە!؟

-ئەم كێشەیە خۆی ئەوەندەی پەیوەستە بە كۆمەڵگا و لاوازی كلتوری هونەریمان ئەوەندە پەیوەست نییە بە خودی پەیمانگا یاخود كۆلێژەكە! گرفتی ئێمە لەوەدایە كە ژینگەی چاومان پیس بووە بە شتی ناشرین، جوانی بە ئاستەم لە نێو ئەو هەموو نەشازییە دەبینرێت! مەرج نییە ئەوەی لە پەیمانگای هونەرە جوانەكان بێت ببێتە هونەرمەند چونكە بە شێوەیەكی گشتی ئەوەی دێتە ئەوێ بۆ ئەوەیە ببێتە مامۆستایەكی پیشەیی و بە ئاسانی لەو قۆناغە تێپەڕێت! واتا خودی شوێنەكەش ئەوەندەی ئیش لە بە مامۆستاكردنی قوتابییەكانە ئەوەندە ئیش لەسەر زانیاری هونەری و هونەرمەند بوون ناكاتەوە. بەڵام خۆ دەكرێت ئەگەر نەبنە هونەرمەند هەر هیچ نەبێت ببنە كەسانێك كە هونەریان خۆش بوێت! ببنە بینەری هونەری!!! وەڵامەكە بە كورتی هەموو دەرچوێكی پەیمانگا هونەرمەند نییە! هونەرمەندەكان ئەوانەن كە پراوەی هونەر دەكەن و نەپچڕاون لە كاری هونەری.

-ئەم پرسیارەش تا ڕادەیەك پەیوەستە بە پرسیارەكەی پێشوو تر! بەڵام دەكرێ ئەوەی بیخینەسەر كە ئەگەر خودی قوتابییەكە ئامادەی ئەوەی تێدا نەبێت كە درێژە بە كاری هونەری بدات ئەوا هیچ هۆكار و كردارێك نییە ئەو قوتابییە بە خۆیەوە ببەستێتەوە و هیوایەكی لا دروست بكات بۆ كاری هونەری! نە مۆزەخانەی هونەری، نە گەلەری و فیستیڤاڵی هونەری، نە گرینگیدانی كۆمەڵگا بە هونەرمەندان!!! هیچ شتێك نییە كە قوتابی بەخۆیەوە ببەستێتەوە. جگە لە بارگرانی ئەو بوارە هونەرییەی بە تایبەتی هونەری شێوەكاری كە بڕێكی زۆری داهات پێویستە و لە بەرامبەریشدا هیچ شتێكتك لێ دەست ناكەوێت و بەرهەمەكان لە ژوورەكان بۆگەن دەبن و تۆش دەبێت ئەتێلەكەت ساڵ بە ساڵ لەو بەرهەمان پاك بكەیتەوە كە داهاتێكی باشت لێ سەرف كردوون.