ئەمە بڵاوبكەوە
FaceBook  Twitter  

ئەگەر بە شێوەیەكی سەرەكی پشت بە مەشقی وەرزشی دەبەستیت بۆ دابەزاندنی كێشی لەش، ئەوا پێویستە كە گرنگی زۆر بە بەرزبوونەوەی ژمارەی لێدانەكانی دڵ بدەیت، چونكە گرنگی زۆری هەیە بۆ بەدەست هێنانی ئەنجامی باش. ئەمە سەلمێنراوە كە بەرزكردنەوەی ژمارەی لێدانەكانی دڵ بە مەشقی وەرزشی هاندەرە بۆ رزگاربوون لە چەوریی زیاد یان كێشی زیادی لەش. بە شێوەیەكی سادە، ئەگەر دەتەوێت كێشی لەشت دابەزێنیت ئەوا پێویستە كالۆری زیاتر لەوەی كە وەریدەگرێت بسووتێنیت، بەڵام دەبێ ئەم راستییە زانستییەش بزانرێت كە ئەم مەسەلەیە پەیوەستە بە باری تەندروستیی كەسی، تەمەن، ئاستی لیاقەی بەدەنی، لەگەڵ جۆر و شیوازی مەشقی وەرزشیی خوازراو. بۆیە تێبینی ئەمە دەكرێت كە هەندێك كەس سەرەڕای ئەنجامدانی مەشقی فیزیكی وەكو راكردن یان لێخوڕینی بایسكل بە پێی خشتەی جوولە و سووتاندنی كالۆری دیاریكراو هێشتا بە شێوەیەكی بەرچاو كێش دانابەزێنن. هۆكارەكە دەگەڕێتەوە بۆ ئەوەی كە لەشی كەسانە كالۆری خەزنكراو لە چەوری Fat Calories زیاد ناسووتێنێت، بەڵكو زیاتر كالۆری خەنكراو لە ماسوڵكەكاندا Muscle Calories دەسووتێنێت كە ئەمەش هەرگیز نابێتە هۆی كەمبوونەوەی بەرچاوی رێژەی چەوری یان كێشی لەش، لێرەدا گرنگی چاودێریكردنی ژمارەی لێدانەكانی دڵ دێتە پێشەوە. بۆ زانینی پێوانەی دروستی لێدانەكانی دڵ بۆ دابەزاندنی كێش یان سووتاندنی چەوری، تەمەن لە ژمارە 220 دەربكە، ئینجا رێژەی 60%-70%ی ژمارەی نوێ دەبێتە ژمارەی لێدانەكانی دڵ بۆ دابەزاندنی كێش، بۆنموونە ئەگەر تەمەنت 30 ساڵ بێت، لە 220 دەربكە دەبێتە 190، رێژەی 60%-70%ی 190 دەكاتە 114-133 لێدانی دڵ لە خولەكێكدا بۆ دابەزاندنی كێش.