ئەم هەواڵە بڵاوبكەوە
FaceBook  Twitter  

شاندێكی حزبی شیوعی كوردستان كه‌ پێكهاتبوون له‌ هه‌ریه‌ك له‌ هاوڕێ ئاسۆ گه‌رمیانی و هاوڕێ هێمن به‌شداریان كرد له‌ هه‌ژده‌هه‌مین جڤاتی گشتی كۆنگره‌ی نه‌ته‌وه‌یی كوردستان ( ك ‌ن ‌ك‌) كه‌ له‌ ڕۆژانی 26 هه‌تا 28 ی ئۆكتۆبه‌ر 2018 له‌ ووڵاتی هۆڵه‌ندا به‌ڕێوه‌ چوو.

كۆنگره‌كه‌ له‌ژێر دروشمی ( به‌ ئامانجی گه‌شه‌پێدانی دیالۆگ و ئاشتی ناوخۆیی)، به‌ ئاماده‌بوونی زۆرێك له‌ ئه‌ندامانی كه‌ نه‌كه‌ و نوێنه‌ری زۆربه‌ی لایه‌نه‌ سیاسییه‌كانی هه‌ر چوار پارچه‌ی كوردستان و زۆرێك له‌ ڕۆشه‌نبیران و چالاكوانانی كۆمه‌ڵگای مه‌ده‌نی ‌ نیشته‌جێی كوردستان و ئه‌وروپا ده‌ستی به‌ كاره‌كانی كرد.

ووتاری حزبی شیوعی كوردستان له‌لایه‌ن هاوڕێ هێمن به‌ شێوه‌زاری كرمانجی خوێندرایه‌وه‌ كه‌ ئه‌مه‌ ده‌قه‌كه‌یه‌تی:

هەڤالێن هێژا یێن کۆنسەیا رێڤەبەر یا (ك ن ك)ێ

رێزداران، ئەندامێن کۆمبینا بەرفرە یا ڕاوێژا نەتەوەیی

بەرێزان نوێنەرێن پارتێن سیاسی

گەورەترین و سلاڤ و پیرۆزباهیێت سەرکردایەتیا پارتی یا مە (کۆمۆنیستا کوردستانێ) لوە بن و دەست خوەشیێ لوە دکەین بۆ ڕێخستنا ڤێ جڤینێ وەك سەکۆیەك بۆ رەخساندنا دیالۆگێ دناڤبەرا هێزێن سیاسی یێن جودا جودا یێن گەلێ مە دا، وەك چەپ و نیشتمانی و لیبرال و هەمی ئەوێت مایی. هیڤیدارین ب دانوستاندنەکا بەرپرسانە بشێین ڕێ چارەسەران پەیدا بکەین بۆ نەهێلانا وێ شەپرزەیا ئەڤرۆ یا بزاڤا نیشتمانی یا کوردستانی لاواز کری. هەتا ئەم بشێین چارچوڤەکێ سەرکەفتی یێ کار و هەماهەنگیێ ناڤبەرا هەمی پارتێن کوردستانی دا پەیدا بکەین،هەر چ نەبیت لسەر ئاستێ کارێ دیپلۆماسی ل ئەوروپا. هەتا ئەم بشێن ل شیانێت گەلێ مە ل ئەوروپا وهەمو کەنالێن سیاسی و دیپلۆماسی و میدیایی بۆ دۆزا گەلێ مە مفای ژێ وەر گرین.

ئامادەبۆیێن هێژا

ئەڤرۆ کوردستان و تەڤایا ڕۆژهەلاتا ناڤێن بگۆهرینێت سیاسی و جڤاکی یێن کویر ڕا دەرباز دبیت ودەرئەنجامێ نەرازی بونێن جڤاکی هێشتا دیارنین و دیسا ئەم دبێژین ئەڤ ڕەوشە یا گرێدایی سیستەما سەرمایەداریا لیبرالیزما نوی یە، کۆ دناڤا خوەدا یا پڕە ژ ناکۆکی و بێ عەدالەتی یا جڤاکی و چێکرنا قادا شەران. دڤێ ڕەوشێ دا پرسا ڕەوا یا گەلێ کوردستانێ تێتە ئاستەنگ کرن و هێشتا بێ چارەسەر هێشتنە.

وەڵاتێن کوردستان له‌ سه‌ریاندا دابه‌ش بویه‌، ژبەر قەیرانێن خوە یێن بنیادی، نەشێن نوینەراتیا گەلێ کوردستانێ بکەن. ژبەر هندێ داخوازا سەرخوەبوون و دامەزراندنا دەولەتا نیشتمانی یا سەربخوە هەر یێ مای وەك پرۆسەیەکا بابەتی و دیرووکی.

ل تورکیا هەڤپەیمانا ناتۆ، عیلمانی یەت و دیمۆکاسی و مافێ مرۆڤان هەر ل داکشانێ دایە و داخوازێت گەلێ کورد ل باکوورێ کوردستانێ، ل شوینا گرتنە بەرا ڕێیا ئاشتی یێ، هێشتا هەر بسەرکۆتکرن و زیندانی کرن و کوشتنێ بەرسڤ ددەت.

ڕژێما دیکتاتوری یا ئیرانێ ژی داخوازێت گەلێ مە ل ڕۆژهەلاتێ کوردستانێ و دیسان تەڤایا گەلێن دی یێن ئیرانی، هەر ب سەرکۆتکرنێ و سێدارەدانێ و برسی کرنێ بەرسڤ ددەت.

ل ئیراقێ ژی سەرەڕای گۆهرینێت ٢٠٠٣ ێ و دانانا دەستورەکێ نوی ل سالا ٢٠٠٥ێ و بەشداری کرنا ئەکتیڤانەیا هەمی لایەنێت کوردستانی یێن باشوور د دامەزراندن و ڕاگرتن و پاراستنا دەولەتا تازە یا ئیراقێ دا ، هزرا شۆفینی یا عەرەبی و تایفەگەریا ئیسلامی هەر بالادەست ما و ب هەمان مێتۆدێن حکمەتێن بەرێ ئینکارا مافێن نەتەوەیی و نیشتمانی یێن گەلێ مە ل باشوور کرن و هەر پشتی خلاس بینا شەرێ دژی (داعش) و ئەنجامدانا ڕیفراندۆما سەخوەبونا کوردستانێ ئێکسەر ب هەماهەنگی دگەل ئەنقەرە و تەهران، ب دژواری ئێریش کرە سەر خاك و دامەزراوەێێت گەلێ باشوورێ کوردستانێ.

بۆیە کارێ مەیێ هەنوکەیی پاراستنا قەوارەیا هەرێما مەیا باشوورێ کوردستانێ یە و خۆرتکرنادەسەلاتا دیمۆکرات و رەتکرنا گەندەلیێ و سیستەما ئابوری یا لدەست دەرکەفتی و بازارێ بێ چاڤدێری و بەر بلاڤ.

هەروەسابۆ پاراستنا ئەزمۆنا رۆژئاڤایێ کوردستانێ پێتڤی پتر ب دیمۆکراتیزەکرنێ و سود وەرگرتن لدەرسێن ئەزمونا باشورێ کوردستانێ دگەل وەلاتێن زلهێزێن جیهانێ دا هەیە کو هەردەم بەرژەوەندی یێن وان دسەر سۆز و پەیمانێت وان دا نە.

ل دوماهیێ دا ئەم تەکەز دکەین کۆ کارێ هەنۆکەیی یێ هێزێن کوردستانی، پتر نێزیك بونە ل هەڤدو ژ بۆ گەلالە کرنا تێگەهەکا هەڤبەش بۆ سیستەما جیهانی وگۆرانکاری یێن دەڤەرێ و داڕشتنا ستراتیژەکا تێکوشانێ بۆ دۆزا گەلێ مە د تاکتیکێ دا و بەرچاڤگرتنا تایبەتمەندی یا هەر پارچەکا کوردستانێ.

سەرکەفتن بۆ دوزا گەلێ مە وهزاران سلاڤ ل گیانێ پاکێ شە هیدێن گەل و نیشتمان ، سەرکەفتنێ ژکۆمبینا وەرا دخوازین.