ئەمە بڵاوبكەوە
FaceBook  Twitter  

شارەكانی رۆژهەڵاتی كوردستان خاوێنترین ناوچەی ئێران بوون لەڕووی بەكارهێنانی ماددەی هۆشبەرەوە، بەڵام ئێستا رۆژ لە دوای رۆژ ئاماری ئاڵوودەبووان و بەكارهێنەرانی ماددەی هۆشبەر بەرەو هەڵكشان دەچێ‌. 

بەپێی ئاماری فەرمیی دەوڵەت، ژمارەی بەكارهێنەرانی ماددەی هۆشبەر لە ئێران گەیشتووەتە 2 ملیۆن و 808 هەزار كەس، بەڵام كارناسان و پسپۆڕانی ئەو بوارە دەڵێن ئەوەی حكومەت ئاشكرای كردووە تەنیا 30%ی بەكارهێنەران دەبێ‌.

بەپێی ئامارەكان 50%ی تووشبووان تەمەنیان لە 29 ساڵ كەمترە. 11%ی بەكارهێنەرانیش لە رەگەزی مێن.

رۆژهەڵاتی كوردستان كە تاوەكو سەرەتاكانی شۆڕشی ئیسلامیی ئێران لە ساڵی 1979 بە دەگمەن بەكارهێنەری ماددەی هۆشبەری تێدابووە، ئێستا لە هەر چوار پارێزگاكە (سنە، ورمێ‌، ئیلام و كرماشان) زیاتر لە 184 هەزار ئاڵوودەبووی ماددەی هۆشبەر هەن كە 10%یان لە رەگەزی مێن، بەڵام ئەم ئامارانە ئاماری دەزگا فەرمییەكانی ئێرانن و لەبەر زۆر هۆكار قەت ئاماری راستەقینە راناگەیەنرێ.

كۆتایی مانگی رابردوو، كەناڵی فەرمیی هەواڵی ئێران بڵاوی كردەوە، پێنج كێڵگەی چاندنی ماریوانا لە ناوچەی كەڵاتەرزانی سەر بە شاری سنە لەناوبراوە كە بەهاكەی بە 500 هەزار دۆلار خەمڵێنراوە.