ئەمە بڵاوبكەوە
FaceBook  Twitter  

 

گوتەبێژی وەزارەتی ناوخۆی عێراق و فەرماندەیی ئۆپەراسیۆنەكانی بەغدا، لیوا سەعد مەعن لە كۆنگرەیەكی رۆژنامەوانییدا چەند ئامارێكی پەیوەست بە خۆپیشاندانەكانی سەرەتای ئەم مانگەی خستە روو كە هێشتا بەردەوامییان هەیە.

سەعد مەعن لەمبارەیەوە رایگەیاند "لەخۆپیشاندانەكانی سەرەتای ئەم مانگەوە تاوەكو ئێستا 104 كەس كوژراون و شەش هەزارو 107 ی دیكە برینداربوون، هەشت لە كوژراوەكانیش سەر بە هێزەكانی ئەمنیین".

گوتیشی "51 باڵەخانەی گشتی و تایبەتی و هەشت بارەگای حزبی سیاسی لە لایەن خۆپیشاندەرانەوە سووتێنراون".

سەعد مەعن ئەوەشی گوت كە "دەستی بۆگەن هەن لەپشتەوەی كردنە ئامانجی خۆپیشاندەراندان، بۆ ئەم مەبەستەش لێكۆڵینەوەمان دەستپێكردووە بەمەبەستی زانینی ئەو لایەنەی كە خۆپیشاندەران دەكاتە ئامانج، ئێمە لەنزیكەوە لێكۆڵینەوەی ورد دەكەین بۆ ئەم بابەتە و چووینەتە سەر تەرمەكانیش و تێبینی ئەوەمان كردووە پێكرانی ئەو كەسانە لە ناوچەی سەر و سك بووە و ئەوانەشی ئەو كەسانەیان كردووەتە ئامانج لە ناوچەی نزیك لە بوونی هێزە ئەمنییەكانەوە نەبوون".

ئەوەشی گوت كە هیچ رووبەڕووبونەوەیەك لەنێوان هێزەكانی ئاسایش و خۆپیشاندەران رووینەداوە، ئەوەی دەركەوتووە لە كوشتنی خۆپیشاندەران و هێزە ئەمنییەكان ئەوەیە كە دەبێت لێكۆڵینەوەی تیادا بكەین و ئەوەشمان دەست پێكردووە.

هەروەها روونیشی كردەوە كە لێكۆڵینەوەشیان دەست پێكردووە بۆ زانینی ئەو لایەنانەی كە لەپشت هێرشكردنە سەر دەزگاكانی راگەیاندنەوەن.

سەعد مەعن لەدرێژەی قسەكانیدا لەو كۆنگرە رۆژنامەوانییەیدا راشیگەیاند "تاوەكو ئێستا دوو بازگەی هێزە ئەمنییەكان و 52 ئۆتۆمبێلی سەربازی و مەدەنی و 7 كەرەڤانە و 51 باڵەخانە سووتێنراون".

لەدرێژەی قسەكانیدا باسی لەوەشكرد كە سەرجەم ئەو كەسانەی لە خۆپیشاندانەكاندا كوژراون هەموویان بە شەهید هەژماردەكرێن و هەموو ماف و ئیمتیازاتی شەهیدانەیان دەبێت.

سەعد مەعن گوتیشی بچڕانی هێڵەكانی ئینتەرنێت بۆ ماوەیەكی كاتی دەبێت و هۆكارەكەشی بۆ پاراستنی هاووڵاتییان و لەپێناو پاراستنی ئاسایشی گشتییە.