ئەمە بڵاوبكەوە
FaceBook  Twitter  

رێباز حەملان، وەزیری دارایی و ئابووری حكومه‌تی هەرێمی کوردستان رایده‌گه‌یه‌نێت، هەموو مووچە خۆرانی هەرێمی کوردستان دڵنیادەکاته‌وه‌ کە مووچە بەردەوام دەبێت و بە تەواوی دەدرێت بە بێ پاشەکەوت و بێ دواكه‌وتن. دەشڵێت " لە ئێستادا هیچ بەرنامەیەکمان نیە پێشینەکان لەفەرمانبەران وەربگرینەوە".

رێباز محه‌مه‌د حه‌ملان، وه‌زیری دارایی و ئابووری حكومه‌تی هه‌رێمی كوردستان به‌ ده‌نگی ئه‌مریكای راگه‌یاند: "ئێمە چەند جاری پێشوو رامانگەیاندووە بڕیاری ژمارە64 بڕیاری پاشەکەوتی مووچە، بڕیارێکی ناچاری حکومەت بووە بۆ دانانی پاشەکەوت ئێستاش کە بڕیاری لادانی پاشەکەوتی مووچە دراوە بۆ ئەوە دەگەڕێتەوە حکومەتی عیراقی بڕیاری داوە مانگانە بڕی 522 ملیار دینار بنێرێت کە لەوە68 ملیاری بۆ هێزەکانی پێشمەرگەیە، بەڵام تا ئێستا ئەو بڕیارە وەک خۆی نەچوه‌تە جێ بەجێ کردنەوە تەنها مانگی 453 ملیار دینار دەنێرێت ئێستا ئێمە دەستمان کردووە بە پێدانی مووچەی مانگی یەک کە حکومەتی عیراقی ئەو پارەیەی بۆ مانگی چوار ناردووە، بەڵام هێشتا نەیناردووە لەچەند رۆژی داهاتوو دەینێرێت".

رێباز حەملان، وتیشی: "من هەموو مووچە خۆرانی هەرێمی کوردستان دڵنیادەکەمەوە کە مووچە بەردەوام دەبێت بە تەواوی دەدرێت بە بێ پاشەکەوت هیچ گرفتێک نایەتە پێش، چونکە لەسەرەتای دانانی یاسای بودجە بە شێوازێک داڕێژراوە کە ئێمە بتوانین مانگانە 30 رۆژ جارێک مووچەی فەرمانبەران بە تەواوی بێ پاشەکەوت بدەین لەو پارەیەی کە لەبەغداوە دێت هەروەها لەو داهاتەی لەبەردەست حکومەتی هەرێمە".

لەبارەی دەستپێکردنەوە بە وەرگرتنەوەی قەرزی پێشینەكان، وەزیری دارایی و ئابووری حکومەتی هەرێم دەڵێت: "ئێمە کاتی خۆی شتێکمان وت بەهەڵە تەفسیری بۆ کراوە، ئەویش وتمان، وەرنەگرتنەوەی پێشینەکان بەهۆی پەیڕەوکردنی سیستمی پاشەکەوت بوو، بەڵام کە ئێستا نەماوە دەبێت دەست بکرێتەوە بە وەرگرتنەوەیان بەڵام نەمانوتووە لە ئێستادا بۆیە هەموو ئەو هەواڵانە هی سۆشیاڵ میدیا و سەرچاوەی نادروستن، ئەگەرنا ئێمە لە ئێستادا هیچ بەرنامەیەکمان نیە پێشینەکان لەفەرمانبەران وەربگرینەوە، هیچ رێنماییەکیشمان لەوبارەیەوە دەرنەکردووە، وتومانە لەداهاتوو کە دۆخی مووچە خۆران و هەرێمی کوردستان چوەوە سەر سکەکەی خۆی، بەڵام لەم کاتەدا هیچ بەرنامەیەکمان نیە وەریبگرینەوە".