ئەمە بڵاوبكەوە
FaceBook  Twitter  

 

بەرێز سەرۆکی پەرلەمان

تێروانینی فراکسیۆنی ئازادی بۆ خولی بەهارەی ساڵی سێیەم لە خولی پێنجەمی پەرلەمانی کوردستان

بەرێزان گەلی کوردستان لە مێژووی کۆن و نوێ و هاوچەرخیدا بەردەوام لە ژێر فشار و بەرەنگاربوونەوە و تێکۆشانی بێ وچانیدایە بۆ بەدەست هێنانی مافەرەواکانی خۆی ئەم قۆناغەی ئێستاشمان بەدەر نیە لەم راستیە مێژووییە تاڵە

هەرێمی کوردستان بەسەرجەم دامەزراوە فەرمیەکانی مافێکی سروشتی و ئێستاش قەوارەیەکی دەستوریە لە چوارچێوەی دەوڵەتی عێراقدا کە ئەمساڵ 100 ساڵی تەمەنی دامەزراندێنتی لە ماوەی ئەم سەدەیە تەمەنی ئەم دەوڵەتە گەلی کوردستان بە هەموو پێکهاتەکانییەوە لەژێر باری چەوساندنەوە و پشتگوێخستن و نادادپەروەری و کوشتن و هەرەشەی لەناوبردن بەسەر بردووە ، لە کاتێکیشدا هەلی بۆ گونجابێت هەوڵی خۆی لەگەل هەموو ئەوانەی بانگەشەی دیموکراسی و دادپەروەری کۆمەڵایەتی و داننان بە مافەکان یەکیانگرتووە بۆ گەیشتن بە رۆژگارێکی باشتر بۆ سەرجەم هاوڵاتیان

ئەمرۆش گەلی کوردستان و قەوارەی سیاسی هەرێم و دامەزراوەکانی لە ژێر فشاری ناوەخۆیی و هەرێمایەتی و نێودەوڵەتی دایە. لە کاتێکدا ئەگەر حالەتی سروشتیی لە فەزای سیاسیدا ئەم بارودۆخە چاوەروانکراوبێت بەڵام بۆ ئێمە تەحدیاتی گەورەترمان رووبەڕوو دەکاتەوە کە بەرپرسیارێتی گشتی دەهێنێتەوە پێشەوە بۆ ئەمەش ئێمە لە پەرلەمانی کوردستان وەکو دەسەڵاتی یاسادانان و داکۆکیکار لە ماف و داخوازی و بژێو و گوزەرانی هاولاتیانمان وەکوو دەسەلاتی چاودێری ئەرکی بنیادنانی داهاتوومان دەخاتە سەرشانمان ئەم بونیادنانەش پێویستی بە پشو درێژی و لێکتێگەیشتن و قبولکردنی ڕا و ڕای جیاواز و چەسپاندنی پایەکانی دیموکراسی هەیە

بەرێزان فراکسیۆنی ئازادی هیواخوازە و کاردەکات و چاوەروانی ئەوەیە ئەندامانی بەرێزی پەرلەمانی کوردستان هەموو بە یەکەوە کاربکەین و پایەکانی ئەم پەرلەمانە بەهێز بکەین چونکە پەراوێز خستن و لاوازبوونی هەر دەسەلاتێکی حوکمرانی لەم هەرێمە لاوازبوونی پێگە و قەوارەی هەرێمی کوردستان دەبێت پێچەوانەکەشی راستە لە هەمانکاتدا ئیتیلافی حکومڕان چۆن بۆی هەیە بانگێشە بۆ هەنگاوەکانی خۆی بکات لە بەرامبەردا ئێمە لە فراکسیۆنی ئازادی وەکو ئۆپۆزسیۆن و فراکسیۆنەکانی دیکەش لەگەلماندا بە پێی بیروبۆچوون و بەرنامەی حزبەکەمان بۆ بەرژەوەندی گشتی و ئایندەی نەوەکانی داهاتوومان و سەربڵندی گەلەکەمان مافی تەواومان هەیە بە چاوی رەخنە و بە هەلسەنگاندنی واقیعی کاروباری حکومەت و دامەزراوەکانی و سیاسیەتەکانی ئابووری پەیرەوکراو بخەینە ڕوو هەروەها داکۆکیکاری راستەقینەش بین لە ماف و گوزەران و بژێو و دەستەبەرکردنی ئازادیەکانی هاوڵاتیان

ئێمە لەم راستیەش دەگەین کە حکومەتی هەرێمی کوردستان بە جیاواز هەر حکومەتێکی دیکە سەرباری ئەرکی حوکمرانێتیەکی باش بەرامبەر بە گەلەکەی هاوکات دەبێت ئەرکی رزگاری نیشتیمانی بەرێوە ببات و لەگەلیشدا پەیوەندی لەگەل حکومەتی عێراقی و دبلۆماسی لەگەل وڵاتانی دیکەی هەرێمایەتی و نێودەوڵەتیش پەیرەو بکات بە هەماهەنگی لەگەل دەسەلاتەکانی دیکە ئەم بەرپرسیارەتیە ئەرکێکی گەورەیە بەڵام بنەمای سەرەکی سەرکەوتنی ئەم حوکمرانێتیە لە هێنانە دی دادپەروەری کۆمەڵایەتی و. بەدەستێنانەوەی متمانەی هاوڵاتیاندا دێتە دی

لە بەرامبەر کەمتەرخەمی لە وەڵامدانەوەی پێداویستیەکانی خەلکی کوردستان. مەترسی و تەحەدیاتەکان گەورەتر دەکات لێرەش ئاماژە بە پێویستی پاراستنی قەوارە و یەکپارچەیی هەرێمی کوردستان دەکەین کە لەسەروەی گشت بەرژەوەندیەکانی دیکەوە دێت

هەرێمی کوردستان شانازی بە سەقامگیری و پانتایی ئازادی ڕادەربرین و دیموکراسی و بوونی حزب و کۆمەلەکانی فشاری چین و توێژەکانەوە دەکات. نابێت ئێمە لە پەرلەمانی کوردستان بە هیچ شێوەیەک رێگا بدەین ئەم دەستکەوتانە لە ژێر هەر بیانوێکدا بێت پاشەکشەی تێدا بکرێت هاوکات لەم خولەی یاساداناندا پێویستە ئەم پرۆژە یاسا و بڕیارانەی کە خزمەت بە لێک جیاکردنەوەی دەسەڵاتەکان و باشترکردنی ئەدای دەسەلاتی دادوەری و پاراستنی سەربەخۆیەکەی و بەهێزکردنی دامەزراوەکانی دیکە کاری جدیان لەسەر بکرێت

دوا خاڵ کە وەک پێویستی ئاماژەی پێدەدەین ئەویش ئەگەر یاسای بودجە دێتە پەرلەمان پێویستە سەرچاوەکانی داهات وخەرجی بەوپەری شەفافیەت لە پرۆژە یاسای بودجەدا روونکراوبێتەوە و ببێتە هەنگاوێک لە هەنگاوەکانی پرۆسەی چاکسازی و بەرەنگاربوونەوەی گەندەڵی و هەوڵێکی جدیش بێت بۆ جێبەجێکردنی پرۆسەی دابەشکردن و شۆرکردنەوەی دەسەڵاتەکان بۆ پارێزگا و دەستە کارگێریەکان بەباشترین شێوازی لەمەرکەزیەت و رێچکەی ئاسایی و یاسایی خۆی وەربگرێت

لە کۆتاییدا جەخت لەم پرس و بابەتەکانی دەکەینەوە

1- جەختکردنەوە لە دەرکردنی ئەو یاسایانە دەکەینەوە کە پەیوەندی بە رێکخستن و ژیان و گوزەرانی هاوڵاتیان هەیە

2- پەرلەمانی کوردستان رۆڵێ زێدەتر بگێرێت بە هەماهەنگی لەگەل دەسەڵاتەکانی دیکە بۆ پاراستنی دیمۆگرافیای دانیشتوانی ناوچە کوردستانیەکانی دەرەوەی ئیدارەی هەرێم و رووبەرووبوەنەوەی پرۆسەی داگیرکردن و بەعەرەبکردنەوەیان جارێکی دیکە

3- پەرلەمان رێگربێت بە یاسای گونجاو بەرامبەر بە سیاسەتی بە تایبەتکردنی ئەو کەرتە خزمەتگوزاریانەی کە راستەوخۆ پەیوەندیان بە ژیانی رۆژانەی هاوڵاتیانەوە هەیە وەکو کەرتی پەروەردە و تەندروستی و ئاو و کارەبا و نەهێشتنی هەموو جۆرە قۆرخکاریەک

4- پێشنیار دەکەین پەرلەمان بەبریارێک یان پرۆژە یاسایەک هێزەکانی پێشمەرگە و ناوەخۆ یەکبخات لەباری شکلیدا بیگۆرێت بۆ باری کرداری و دامەزراوەیەکی نیشتیمانی سەرتاسەری

د.محی الدین حەسەن

سەرۆکی فراکسیۆنی ئازادی