ئەمە بڵاوبكەوە
FaceBook  Twitter  

به‌ڕێوبه‌رایه‌تی گشتی هێزه‌كانی دژه‌تیرۆر رایگه‌یاند، له‌ماوه‌ی 72 كاتژمێری رابردودا بۆ سێیه‌مجار هێرشیكرایه‌وه‌ سه‌ر كێڵگه‌ی غازی كۆرمۆر كه‌ له‌لایه‌ن كۆمپانیای دانه‌غازه‌وه‌ سه‌رپه‌رشتی ده‌كرێت.

به‌ڕێوبه‌رایه‌تی گشتی هێزه‌كانی دژه‌تیرۆر له‌ڕاگه‌یه‌ندراوێكدا بڵاویكرده‌وه‌، "ئه‌مڕۆ بۆ جاری سێیه‌م به‌ موشه‌ك هێرش كرایه‌وه‌ سه‌ر كێڵگه‌ی غازی كۆرمۆر له‌ ناحیه‌ی قادر كه‌ره‌می سه‌ر به‌ قه‌زای چه‌مچه‌ماڵ، ئه‌مه‌ش له‌ماوه‌ی 72 كاتژمێردا سێیه‌مجاره‌ به‌ موشه‌ك هێرشده‌كرێته‌سه‌ر كێڵگه‌ی غازی كۆرمۆر".

دژه‌ تیرۆر ئاماژه‌ی به‌وه‌شكردوه‌، "له‌ چه‌ند ڕۆژی ڕابردودا به‌ دو هێرشی جیاواز هێرشكرایه‌ سه‌ر كێڵگه‌كه‌ و 5 (پێنج) موشه‌ك له‌ كاتی جیاوازدا ئاڕاسته‌ی كۆرمۆر كرا له‌ سنوری قادركه‌ره‌می سه‌ر به‌ قه‌زای چه‌مچه‌ماڵ".

له‌ ماوه‌ی كه‌متر له‌ هه‌فته‌یه‌كه‌دا ئه‌وه‌ جاری سێیه‌مه‌ كه‌ موشه‌ك ئاڕاسته‌ی كێلگه‌ی غازی كۆرمۆر ده‌كرێت، به‌ڵام به‌رپرسانی كێڵگه‌كه‌ و حكومه‌تی هه‌رێمی كوردستان ده‌ڵێن، هێرشه‌كان زیانی گیانی و ماددیان نه‌بوه‌.