ئەمە بڵاوبكەوە
FaceBook  Twitter  

 

شۆڕش - ڕێگای کوردستان

ئەبو کاروان ئەندامی مەكتەبی سیاسی حزبی شیوعی كوردستان بەڕێگای کوردستانی ڕاگەیاند: باردۆخی عێراق لە لیواری تەقینەوە و شەڕی نێوخۆیدایە بەهۆی ململانێکانی نێوان تەیاری سەدری و چوارچێوەی هەمە ئاهەنگی لەسەر دەسەڵات و نفوز و پارە.

ئەبو کاروان لەدرێژەی قسەکانیدا دەڵێت: ئەم بارودۆخە دوای پاشەکشێی سەدر لە ئەنجومەنی نوێنەران و سەرنەکەوتنی سەدر لە پێکهێنانی ئەوەی کە خۆی ناوی نابوو حکومەتی زۆرینەی نیشتیمانی کە بۆ ئەو مەبەستە هاوپەیمانی لەگەڵ پارتیی و حەلبووسی و خەنجەر پێکهێنابوو، پێیناوەتە قۆناغێکی ئێجگار ترسناک، مەترسی شەڕی هەردوو لایەنی دەست ڕۆیشتوی لەهەموو کاتێک زیاترە ، بەتایبەت هەردوولا جگە لە جەماوەرێکی گوێڕایەڵ، خاوەن چەک و جبەخانەیەکی زۆر و هێزیکی میلیشیان کە بەچەندان هەزار جەنگاوەر هەژمار دەکرێت.

سەبارەت بەم بارە نائاساییەی بەغدا هاوڕێ ئەبو کاروان وتى: ئەم شڵەژاوییەی هەیە نەخێر شەڕی چاكسازی نییە، شەڕی پارەو نفوزو دەسەڵاتە تادەگاتە شەڕی مەرجعیەتیش كە موقتەدا سەدر كاری بۆ دەكات، بە دڵنییایەوە وەڵاتانی ئیقلیمی و نێودەوڵەتی كاریگەریان ھەیە لەم شەڕەدا چونكە ھەردوو لایەن دابەشبوونە لە نێوان وەڵاتانی ئەقلیمی و ھەر ئەو دەوڵەتانە ئاراستەیان دەكەن و ھاوكاریشیان دەكەن بۆ دروستبوونی شەڕ لە نێوانیاندا و بۆ ئەوەی عێراق نەبێتە دەوڵەتێكی بەھێزو ئەوانیش فەرھودی نەوت و داھاتەكانی بكەن.

ئەندامەکەی مەکتەبی سیاسی حزبی شیوعی ئەوەشی خستەڕوو: دۆخی کوردستانیش زۆر لە دۆخی عێراق باشتر نییە، هێز و لایەنە کوردستانییەکان لەم کاتەدا نەک لەسەر ستراتیژێک ڕێکنەکەوتوون بەڵکو نێو ماڵی كوردستان بەهۆی بەرژەوەندی حزبی و شەخسی و عینادی سیاسیی لە پەرتەوازەیی ماوەتەوە و دابەشبوونە بەسەر دوومیحوەری دژ بەیەك ، ئەمە جگە لە قەیرانی حکومڕانی و باردۆخی خراپی ژیانی خەڵک وەک خۆیەتی.

لەکۆتایدا ئەبو کاروان ڕایدەگەیەنێت؛ عیراق سەد ساڵە دەوڵەتە، دەیان كێشەی تێدا دروست بووەو دواتریش لایەنێك یان چەند لایەنێك پێكەوە حوكمەتیان پێكھێناوەو وەڵاتەكەیان بەڕێوەبردوە، لێرەوە پێویستە ئەوە ڕوونبكەمەوە كە سەرجەم حیزب و لایەنەكان بەھەموو ناكۆكی و ململانییەكانیانەوە لەگەل ئەوەدان كە عیراق ببێتە عێراقێكی مەركەزی بەھێز و وەڵاتانی نێودەوڵەتی و ئەقلیمیش پشتگیری ئەو ئاراستەیە دەكەن و تەنھا لایەنی كوردستانی نەبێت.