ئەمە بڵاوبكەوە
FaceBook  Twitter  


شۆڕش - ڕێگای کوردستان

ئاکۆ هۆمەربلی بەرپرسی مەڵبەندی گەرمیانی پارتی سۆسیال دیموکراتی کوردستان بە ماڵپەڕی ڕێگای کوردستانی ڕاگەیاند: لەکاتێکدا عێراق و هەرێمی کوردستان بە قۆناغێکی هەستیار تێدەپەڕێت، گۆڕانکاریەکان خێران هاوکات گرفتی کەمی خزمەتگوزاری و گەندەڵی و ناعەدالەتی و شەڕی مەرجەعیەت و ناکۆکی لایەنەکان لەعێراق وایکردوە چارەسەرکردنی گرفتەکان بەخێرایی ئەستەم بێت ئاسۆیی ئەم قۆناغە ناروونە، هەربۆیە پێویستە هەرێم بۆ ئەم قۆناغە هەستیارە ئامادە بێت، بەتایبەت لایەنەکانی هەرێم.

ئاکۆ هۆمەربلی دەڵێت: لەناوخۆی کوردستان کۆمەڵێک کێشەو گرفت بوونی هەیە وەکو گەندەڵی و کپ کردنی دەنگی ناڕەزایەتی و هەروەها نەبونی خزمەتگوزاری و وەستانی پڕۆژەکان و دانەمەزراندنی دەرچوانی زانکۆ و پەیمانگاکان ، هاوکات ناکۆکی نێوان لایەنەکان ئەمەیان زیاتر هەلی بەنەیاران و دوژمنانی ووڵاتەکەمان داوە زیاتر دەستوەردان بکەن لەناوخۆی هەرێمەکەماندا، بۆیە ئێمە وەکو پارتی سۆسیال دیموکرات بەلامانەوە گرنگە پاراستنی هەرێمەکەمان و ئەمنیەت و ئاسایشی هاوڵاتیانە.

بەرپرسەکەی مەڵبەندی گەرمیانی پارتی سۆسیال دیموکرات دەڵێت: ئێمە لەگەڵ هەڵبژاردنی پەرلەمانی کوردستانین لەکاتی دیاریکراوی خۆیدا، وەکو پارتی سۆسیال دیموکرات ئامادەی هەڵبژاردنین.

دواجار لەسەر نمایشە سەربازییەکەی حزبەکەیان دەڵێت: هەڵبەت ئەو نمایشە سەربازییە بەهۆی یادی دامەزراندنی حزبەکەمانەوە بوو، وویستمان بەهەمووان بڵێن پێشمەرگەیی سوسیال دیموکرات لەسەنگەری پێشەوەن بۆ بەرگریکردن لە خاک و نیشتیمان و خەڵکی کوردستان ، وە ئەم هەرێمە بەخوێنی هەزاران ڕۆڵەی شەهیدی ئەم نیشتیمانە دروست بووە.