ئەم هەواڵە بڵاوبكەوە
FaceBook  Twitter  

 

لەشاری مەهابادی رۆژهەڵاتی كوردستان ژمارەیەك چالاكوانی مەدەنی و كەسایەتی سیاسی مانگرتنی یەك رۆژەیان بەداخستنی دوكان و بازاڕەكان ڕاگەیاند.

ئامانج لەم مانگرتنە ناڕەزای دەربڕینە بەرامبەر بەسیاسەتەكانی ئێران كە لەدوو رۆژی ڕابردوودا ڕێگریكردوە لە گردبوونەوەی خەڵكی مەهاباد، بڕیارە رۆژی چوار شەممە دوكان و بازاڕەكانیان نەكەنەوە و كرێكاران و كارمەندەكانیش نەچنە سەر كارەكانیان.

لەبانگەوازیی ئەو چالاكوانانەدا هاتووە، پاش خۆپیشاندانەكانی بانە، سنە، كرماشان و مەهاباد، نەك تەنیا هیچ وەڵامێكی ئەرێنی بە داوكارییەكانی خەڵك نەداریەوە، بەڵكو بەڕەشبگیری و توندوتیژی هەوڵدرا دەنگی ناڕەزایی خەڵك كپ بكرێتەوە.

ئەو چالاكەوانانە داوا دەكەن حكومەتی ئێران كۆتایی بێنێت بەكوشتاری كۆڵبەرەكان و داوای لێبوردن و سەرەخۆشی بكات لە خێزانی هەموو كۆڵبەرانی قوربانی، هەروەها داواشكراوە كە هەموو دەستگیركراوانی خۆپیشاندانەكانی ئەم ڕۆژانەی رابردوو بەبێ مەرج ئازادبكرێن و كەشی سەربازیی سەپێندراو بەسەر شارەكانی رۆژهەڵاتی كوردستان لاببرێت.

لەڕاگەیەندراوەكەی ئەو چالاكوانانەدا هۆشداری داوەتە حكومەت، كە ئەگەر داواكارییەكانی خەڵك جێبەجێ نەكرێن، ناڕەزاییەكان بە شێوەی دیكە بەردەوامیان دەبێت.