ژمارەیەك چەكدار لەسەر رێگای (هەولێر-كەسنەزان) هێرش دەكەنە سەر ئۆتۆمبێلێك كەژن و منداڵ و پیاوی تێدابووە، سەرباری هەرەشە و سوكایەتی پێكردنیان، منداڵێك بەناوی (راسان) لەبەرچاوی دایكی دەرفێندرێت و دایكەكەش داوایەك ئاراستەی ئاسایش و پۆلیسی و رێكخراوەكانی كۆمەڵی مەدەنی دەكات.

دوای نیوەرۆی رۆژی چوار شەممە 29ی ئاداری 2017 ژمارەیەك چەكدار بەبیانووی هەبوونی كێشەی كۆمەڵایەتی لەنێوان ژن و مێردێك بەناوەكانی (ه.ج) و (ر.ر)، لەسەر رێگای (هەولێر-كەسنەزان) بەچەك هەڵدەكوتنە سەر ئۆتۆمبێلێك كە ژنەكە بەناوی (ه.ج) و باوكی ژنەكە و منداڵێك بەناوی (راسان) تێدابوو، سەرباری سوكایەتی و هەرەشەی كوشتن لە خانەوادەی ژنەكە، منداڵەكەش دەرفێنن.

لەبارەی چۆنیەتی رووداوەكەوە (رێگای كورستان) پەیوەندی بەباوكی ژنەكەوە كرد كەناوی (ج.ع) و وتی "ئەمرۆ كاتژمێر 4ی ئێوارە من و كچەكەم و نەوەكەم بەرەو هەولێر دەهاتین، دوو ئۆتۆمبێلی پڕ چەكدار لەسەر رێگای هەولێر - كەسنەزان پێشمان پێدەگرن و بەزەبەری چەك من و كچەكەم و نەوەكەم لەئۆتۆمبێل دەهێنەخوارێ، سوكایەتی و هەرەشەی كوشتن لەمن و كچەكەم كرا، تا ئەو رادەیەی لەمن و كچەكەشمیاندا، نەوەكەم بەناوی (راسان)یان ڕفاند، بەهەوڵ و كۆششی چەند كەسایەتیەك نەوەكەمان گەراوەتەوە لای دایكی", باوكی كچە باسی لەوەشكرد كە، "بۆماوەی دوو ساڵە كچەكەم لە مێردەكەی جیابۆتەوە منداڵێكیان هەبوو، دادگاش ئەو منداڵەی بەشێوەیەكی یاسایی بۆ كچەكەم گەراندەوە، لەئێستاشدا مێردی پێشوویی كچەكەم وەك چەندینجاریتر هەرەشە و سوكایەتی بەمن و كچەكەم و خانەوادەكەم كردووە، دوایین بەد رەفتاری گەیشتە ئەو رادەیەی هەرەشەی كوشتن و رفاندنی نەوەكەمی لێكەوتەوە، لەئێستاشدا سەرباری تۆماركردنی سكاڵا، داوا لە دادگا و ئاسایش و پۆلیسی هەولێری پایتەخت دەكەم، كەبەتوندترین شێوە ئەو پیاوە سزا بدەن".

لەلایەكی دیكەوە دایكی (راسان) سەرباری شۆكبوونی لە روودانی ئەو رووداوە، بە(رێگای كوردستان)ی راگەیاند، "داوا لە پۆلیس و ئاسایش و رێكخراوەكانی كۆمەڵی مەدەنی و ئافرەتان و منداڵان دەكەم، كە رێگا نەدەن هاوسەری پێشووم، زیان بەخۆم و منداڵەكەم و خانەوادەكەم بگەیەنێت و بەتوندترین شێوە سزای بدەن".

کوردستانی