ئەم هەواڵە بڵاوبكەوە
FaceBook  Twitter  

 

بەبۆنەی هاتنەوەی سەری ساڵی ئێزدییەكان، هەرسێ سەرۆكایەتییەكەی هەرێمی كوردستان پیرۆزبایی لە هاووڵاتیانی ئێزدی دەكەن و هیواخوازن كۆتایی بەئازار و مەینەتییەكانیان بێت.

سەرۆكایەتی هەرێمی كوردستان لەبەیاننامەیەكدا جەژنی چارشەمبا سۆر لەئێزدییەكان پیرۆز دەكات و كوردانی ئێزدی بە بەشێكی دانەبڕاوی گەلی كوردستان لەقەڵەم دەدات.

بەیاننامەكەی سەرۆكایەتی هەرێم راشیدەگەیەنێت، بە درێژایی مێژوو ئێزدییەكان بەهۆی ناسنامەی ئایینی و نەتەوەییان توشی كارەسات هاتوون، بەڵام پابەندبوونیان بەناسنامەی كوردایەتی و ئاینییان هەموو پیلان و ستەمێكی لە دژی ئەوان پووچەڵ كردووەتەوە.

ئەوە لەكاتێكدایە كە سەرۆكی پەرلەمانی كوردستانیش لەبەیاننامەیەكدا رایگەیاندووە، بەداخەوە بەهۆی ئەو بارودۆخەی شەڕی تیرۆریستان بەسەر ناوچەكەیان هێنا، ئەمساڵ چوارشەممەی سور، جەژنێكی غەمناك و تاریكە بۆ گەلەكەمان، بەهۆی ئەوەی سەدان كچ و ژنی ئێزدی تا ئێستا لەدەستی تیرۆریستانی داعش رزگار نەكراون و ناوچەكەشیان بەهۆی شەڕەوە وێران و بێ خزمەتگوزاری بووە، بەم هۆیەوە ئێزدییەكانیش ناتوانن بە ئارامی و دڵخۆشی جەژنەكەیان بكەنەوە.

لبۆ هەمان بۆنە، ئەنجومەنی وەزیرانی هەرێم لەبەیاننامەیەكدا سەرەڕای پیرۆزبایی هاوكات هیوا دەخوازێت كە ئاوارە ئێزدییەكان بگەڕێنەوە سەر ماڵ و حاڵی خۆیان، بەتایبەتی كە ئێستا ناوچەكانیان ئازادكراون.

ئەنجومەنی وەزیران بەڵێن بەئێزدییەكان دەدات كە هەتا یەك ئێزدی لەدەستی تیرۆریستانی داعشدا مابێت، ئەوان هەموو هەوڵەكانیان دەخەنەگەڕ بۆ ئازادكردنیان و هەوڵەكانیشیان درێژە پێدەدەن بۆ بەجینۆسایدناساندنی كەیسەكەیان لەسەر ئاستی جیهان.