ئەم هەواڵە بڵاوبكەوە
FaceBook  Twitter  

بۆ هاوڕێیان لە حزبە شیوعى و پێشکەوتوخواز و کرێکارییە جیهانییەکان گەلەکەمان لە کوردستانى عێراق لە (25) ى ئەیلولى ئەمساڵ بۆ دەڕبڕنی مافی چارەنوسی خۆی پڕۆسەى گشتپرسی (ڕیفراندۆم) ى ئەنجامدا، پاش ئەوەى حکومەتى ناوەندى دەستبەردارى سەرجەم بەڵگەنامەء ئەو ڕێکەوتنانە بوو کە پێشتر لەگەڵ حکومەتى هەرێمى کوردستاندا ئەنجامیدابوو. لەکاتێکدا پێشتر گەلى کوردستان لە پاکتاوکردنى دیکتاتۆریەت و  هەنگاونان بۆ سەرلەنوێ بونیاتنانى عێراق پاش ڕوخاندانى ڕژێمى دیکتاتۆرى لە ساڵى 2003، بەشداریکرد، بەڵام پاش تێپەڕبوونى زیاتر لە (13) ساڵ بەسەر دەستورى عێراقدا کە گەلى کوردستان بەشداری لەسەرخستنیدا کرد، زیاتر لە (55) ماددە لە دەستور کە پەیوەستە بە بونیادى دەوڵەت و سیستەمە سیاسییەکەى جێبەجێ نەکراوە، ئەمەش لە کاتێکدایە لە دەقى دەستوردا هاتووە کە مانەوەى عێراق بە یەکگرتووى گەل و خاک و سەروەرییەکەى پەیوەستە بە جێبەجێ کردنى ئەم دەستوورە، و ئەمەش هاوکات بوو لەگەڵ پێشێلکردنى سەرجەم ئەو ڕێکەوتنانەى لەنێوان حکومەتى هەرێمى کوردستان و حکومەتى ناوەندى دا واژۆکراوەو ئێستاش حکومەتى ناوەندی بەشێوەیەکى بەرنامە داڕێژراو سەرجەم ئەو دەسکەوت و مافانەى پێشێلکرد کە بە تێکۆشانى گەلى کوردستان لەساڵانى ڕابردوودا بەدەستهاتووە. حکومەتى ناوەندى لە ساڵى (2014) ەوە، بودجەى هەرێمی کوردستانی بڕی و موچەى فەرمانبەرانى نەدا، هەروەها بەردەوام بوو لە سەرف نەکردنى موچەى هێزە چەکدارەکانى کوردستان (پێشمەرگە) کە لەساڵى (2005) بەپێی دەستورى عێراق دانى پێدانرا، لە کاتێکدا کە حکومەتى ناوەندى موچەی دەنارت ودەنێرێت بۆ ئەو ناوچانەى کە لەژێر دەسەڵاتى دەوڵەتى خەلافەتى ئیسلامى (داعش) دایە. وێڕاى بەشدارى هێزەکانى پێشمەرگە لە هەرێمى کوردستان لە ڕوبەڕووبونەوەى تیرۆر و لەناوبردنى و بەشداریکردنى لە هەوڵى نێودەوڵەتى بۆ قەڵاچۆکردنى تیرۆر و بەهاوکارى لەگەڵ حکومەتى ناوەندى و داڵدەدانى نزیکەى دوو ملیون لە هاوڵاتیانى ئاوارەی ناوچەکانى تیرۆر، ئەمە جگە لە ئاوارەکانى جەنگی تایەفەگەرى کە لەچەند ناوچەیەکى ناوەڕاست و باشورى عێراق، لە ئارادایە، لەگەڵ ئەمانەشدا حکومەتى ناوەندى خۆى دزییەوە لە سەرجەم ڕێکەوتنەکانو ئێستا دەستى بەسەپاندنى گەمارۆیەک بەسەر هەرێمى کوردستانء بە پاڵپشتى لە ووڵاتانى هەرێمایەتى، کردوە. حزبی شیوعى کوردستان پاڵپشتى لە بڕیاری ڕیفراندۆم بەشێوەیەکى دیموکراسى مەدەنى ئاشتییانە لە روانگەی گەڕانەوە بۆ ئیرادەى گەلى کوردستان، کردوە، کە ئەمەش گوزارشتێکە لە مافی دیاریکردنى چارەنوسى خۆى، پاش ئەوەى سەرجەم هەوڵی کوردستان بۆ دەوڵەتی مەدەنى دەستورى لە عیراقدا سەرنەکەوت، لەکاتێکدا ڕوبەڕووى دەوڵەتێکی ئاینى مەزهەبى لە عیراقدا دەبینەوە. دەوڵەتێک هیچ خەمێکى نى یە جگە لە چڕکردنەوە و وروژاندنى گیانى ناکۆکى شۆڤێنى و تایەفەگەرى. گشتپرسى بەشێوەیەکى دیموکراسى لە کوردستانى عێراقدا ئەنجامدرا پاش ئەوەى گەلەکەمان ڕوبەڕووى فشارێکى گەورە لەلایەن ووڵاتە یەکگرتووەکانى ئەمەریکا و بەریتانیا و ووڵاتانى هەرێمایەتى بۆوە ، کە مەبەستیان ڕێگریگرتن لە ئەنجامدانى ڕیفراندۆم بە بیانوى جیاجیا بوو.لە سەرجەم ئەو بیانوانە تەنها بەرژەوەندى گەلى کوردستان و مافی دیاریکردنى چارەنوسى خۆى تێدا ونبوو. مافێک کە بەپێى بەڵگەنامە نێودەوڵەتییەکان و بەپێی پرەنسیپی نێونەتەوەى پەیوەست بە مافى دیاریکردنى چارەنوسى گەلان چەسپاوە، کەچی کۆمەڵگاى نێودەوڵەتى و هەوڵەکانى ئیمپریالیزمى جیهانى و بەرژەوەندییە زیندوەکانى لە ناوچەکەدا، هەوڵی سەپاندنی ئیرادەى خۆیان دەدا دژ بە ئیرادەى گەلى کوردستان کە خوازیارى دیاریکردنى چارەنوسیەتى لەچوارچێوەى دەوڵەتێکى کوردستانى سەربەخۆى دیموکراتى مەدەنى فیدڕاڵى بونیات نراو لەسەر بنەماى هاوڵاتیبونى کوردستانى. دەوڵەتێک کە سەرجەم هاوڵاتیانى کوردستان لە خۆ دەگرێت بە کوردو تورکمان و عەرەب و ئاشورى کلدان سریان و ئەرمەن، بەو شێوەیەى کە مافى ئایینى و ئازادى و بیروباوەڕ و ئایین و ویژدان و پیادەکردنى مەراسیمە ئایینییەکانی سەرجەم پێکهاتە ئایینییەکان پارێزراو بێت بە موسڵمان و مەسیحى و ئێزیدی و کاکەیى و سابیئەى مەندائی و جولەکە و زەردەشتییەکان. شایانی باسە سێ ملیۆن و سێ سەدو پێنج هەزار و نۆسەدء بیست و پێنج کەس بەشدارییان لە ڕیفراندۆمەکەدا کرد کە بەڕێژەى 72% ى ژمارەى ئەوانەیە کە مافی دەنگدانیان هەیە. ڕێژەى (92.73%) ى ژمارەى دەنگدەران لە بەرژەوەندى سەربەخۆى دەنگیانداو لە کاتێکدا لە (7.27%) بە نەخێر بۆ سەربەخۆى دەنگیاندا. حزبمان بەشداریکرد لە داڕشتنى بڕیارى ڕیفراندۆم کە پشت دەبەستێ بە بڕوامان بە مافى گەلەکەمان بۆ دیاریکردنى مافى چارەنوس و لەو قەناعەتەداین کە تێکۆشانى نیشتیمانى حزبمان پێچەوانە و دژنییە لەگەڵ تێکۆشانى بەردەوام و بێ پسانەوەمان بە هەموو شێوەکانى تێکۆشان پێش ڕیفراندۆم و دواى ئەو پرۆسەیەش لە پێناو بونیاتنانى دامەزراوە دیموکراسییەکان و ڕووبەڕووبونەوەى سیاسەتەکانى لیبڕالیزمى نوێ و داکۆکیکردن لە بەرژەوەندى زەحمەتکێشان کە تێکرای ئەمانەش گوزارشتێکە لە دروشمى سەرەکی حزبمان (نیشتیمانێکى ئازاد و گەلێکى بەختیار) کە زەمینە سازییە بۆ هەڵبژاردەى سۆسیالیستیمان. ئێمە چاوەڕێ لە پارتە شیوعىو  کرێکارییە جیهانییەکان و پارتە پێشکەوتوخوازەکانء هێزە چەپەکان دەکەین کە پاڵپشتى گەلەکەمان لە کوردستانى عێراق بکەن کە زۆر ئازادانە ڕاى خۆى دا بۆ ڕوبەڕووبونەوەى سیاسەتەکانى ئەمرى واقیع کە لەلایەن حکومەتى ناوەندىء ووڵاتانى هەرێمایەتى بەسەریدا سەپێنراوە. ئەمرۆش ئەو حکومەتانە باس لە گەمارۆی جۆراجۆر بەسەر گەلەکەمان و سزادانى ملیۆنەها لە ڕۆڵەکانى گەلەکەمان دەکەن کە هیچ تاوانێکیان نییە جگە لە وەى بەئازادانە گوزارشتیان لەڕاى خۆیان کرد، لەکاتێکدا گەلى کوردستان و هێزە سیاسییەکانى ئامادەى پیشانداوە بۆ گفتوگۆو  لێک تێگەیشتن لەگەڵ بەغداد لەسەر بنەماى ئیرادەى دەنگدەرانى کوردستانى. پەیامى گەلى کوردستان کە هەمیشە جەختى لێدەکاتەوە، ئاشتى و پێکەوە ژیانى هاوبەش و کوژاندنەوەى چاوگەکانی بارگرژی و کارى هاوبەشە لە پێناو گەشەپێدانو پێشکەوتنى کۆمەڵایەتى. چاوەڕێ لە هاوڕێیانمان لە پارتە براو دۆستەکانمان دەکەین کە پەیامى پاڵپشتى ئاڕاستەى ئێمە بکەن، بۆ ئەوەى بیسەلمێنین بۆ گەلى کوردستانمان کە پارتە شیوعى و کرێکارییە جیهانییەکانء پارتە پێشکەوتوخوازەکان پشتء پەناى هەمیشەیی بۆ تێکۆشانى گەلان لە پێناو مافى چارەى خۆنوسین، دەبن.

مەکتەبى سیاسى حزبی شیوعى کوردستان

کۆتایی ئەیلول/2017