ئەم هەواڵە بڵاوبكەوە
FaceBook  Twitter  

دیمانە /عومەر ئاوارە

لەم چاوپێكەوتنەی (ڕێگای كوردستان)، عەلی هاشم ئەلحسێنی وتەبێژی میحورەی باكوری حەشدی شەعبی باس لە سەر ڕووداوەكانی ڕۆژی 16/10/2017ی كەركوك وخورماتوو دەكات وئاماژەش بەوە دەكات كە ئەوان وەكو حەشدی شەعبی ڕێگە بە گەڕانەوەی ئەو كەسانە نادەن كە بەشدارییان لە ڕیفڕاندۆمدا كردووە بگەڕێنەوە خورماتوو ، بە تایبەت قایمقامی شارۆچكەی خورماتوو وپۆستەكەی لێوەردەگرنەوە وكەسێكی توركمان لەو پۆستە دادەنەن.

ڕێگای كوردستان:- ڕێككەوتن لە نێوان حكومەتی عێراق ولایەنی كوردیدا هەبووە سەبارەت بە كشانەوەی هێزی پێشمەرگە لە كەركوك وخورماتوو؟

عەلی هاشم:- ئێمە وەكو حەشدی شەعبی تەنها لایەنی سەربازین وفەرمان جێبەجێدەكەین،ئەگەر ڕێككەوتن بۆ كشانەوەی هێزی پێشمەرگە لە كەركوك وخورماتوو كرابێت ئاگاداری نین وهیچ زانیارییەكمان لەو ڕووەوە بە دەست نەگەیشتووە، ئەوەی لە چەند ڕۆژی ڕابردوودا لە خورماتوو كەركوك ڕوویدا قۆناغێك بو كۆتایی هات، لە خورماتوو وكەركوك سەرجەم نەتەوەكان وەكو بران ، لە ئێستادا ناوچەكە ئارامەو هێچ كێشەو گرفتێك نییە.

ڕێگای كوردستان :- دەوترێت كە چەكدارانی حەشدی شەعبی تەعدایان لە ژمارەیەك خانەوادەی كورد كردووە لە خورماتوو ، ئێووە چی دەڵێن؟

عەلی هاشم:- ئەگەر بەڵگە نامە هەبوو لە سەر ئەوەی كە باسی لێووە دەكەن ئەوا ئێمەش ئامادەین بەدوادا چوونی بۆ بكەین وئەگەریش ئەوە راست دەرچوو ئەوا ئێمەش سزای ئەو كەسانە دەدەین كە بەو كارە هەستاون وهەر خانەوادەیەكیش دەتوانێت لەو ڕووەوە لە دادگا سكاڵا تۆمار بكەن.

ڕێگای كوردستان:- ڕاتان لە سەر هێزی پێشمەرگە چییە؟

عەلی هاشم:- هێزی پێشمەرگە لە كەركوك وخورماتوو وناوچەكانی دیكە وەكو برای خۆمان تەماشایان دەكەین وبە بەشێك لە سیستەمی بەرگری وڵات هەژمار دەكرێن.

ڕێگای كوردستان:- چۆن دەڕواننە ئایندەی كەركوك وخورماتوو؟

عەلی هاشم:- هێشتا بۆمان ڕوون نییە، بڕیار لە لای حكومەتی ناوەندە، چونكە ئەمە كێشەیەك بو پەیوەست بو بە حكومەتی ناوەندەوە.

 ڕێگای كوردستان:- بۆچونتان لە سەر ڕووداوەكانی دوز خورماتوو چییە، پێتان وایە تۆڵە كردنەوەی توركمانی شیعەیە لە كورد وەك باسی لێوە دەكرێت ، یاخود كارێكی تێكدەرانەیە ئەنجام دەدرێت؟

عەلی هاشم:- ڕووداوەكانی دووز خورماتوو كەسانێك ئەنجامیانداوە كە لە یاسا دەرچوون ویاخیین،توركمان وتەنانەت هاوڵاتی كوردیش دەستییان هەبووە لە سوتاندن وتاڵانكردنی ماڵی هاوڵاتییان، ئەوەی لە خورماتوو ڕوویدا تۆڵە كردنەوەی هەندێك خێزانی توركمان بوون كە پێشوتر زەرەرمەند بوون.

ڕێگای كوردستان:- وەكو حەشدی شەعبی مەرجتان چییە بۆ گەڕانەوەی ئەو خێزانە كوردانەی كە ئاوارە بوون؟

عەلی هاشم:- ئەوانەی كە خۆبەخشیان وەكو چەكدار نییە، ئاساییە بگەڕێنەوە خورماتوو، تەنها ئەوانە نابێت بگەڕێنەوە خورماتوو كە چەكیان دژی ئێمە هەڵگرتووە ، یاخود تەقەیان لێمان كردووە، لە گەڵ ئەوەشدا ئەوانەی لە ڕیفڕاندۆم بەشدارییان كردووە ، بە تایبەت بەرپرسەكان ولە سەروی هەموویان قایمقامی خورماتوو نابێت لە پۆستەكەی بمێنێت، لە ئێستادا پۆستی قایمقامی ئامرلی دراوەتە بەڕێوەبەری شارەدێی ئامرلی كە شارەدییەكە سەر بە خورماتووە، ئەو كەسە بە وەكالەت پۆستی قایمقامی خورماتوو بە ڕێووە دەبات.

ڕێگای كوردستان:- سوپای عێراق وحەشدی شەعبی لە دژی ڕیفڕاندۆم هێرشیان كردە سەر كەركوك وخورماتوو؟

عەلی هاشم:- بەڵی بە هۆكاری ڕیفڕاندۆم بو، چونكە ئەو ڕیفڕاندۆمە بۆ جیابونەوەی كورد بو لە عێراق ، كورد لە دوای ڕوخاندنی ڕژێمی بەعس بە مافی خۆی گەیشت وبووە خاوەن وڵاتێكی بچوك، ڕیفڕاندۆم زەرەری هەردوو لای تێدابوو لە ڕوانگەی ئێمەوە بۆیە بەو هەنگاوە سەربازییە ڕێگریمان لەو دابەشبوونە كرد .

ڕێگای كوردستان:- مەترسی ئەوەتان نییە كە كورد لە داهاتوودا تۆڵەی ئەو كارانەتان لێبكاتەوە كە لە دوای 16/11/2017 لە خورماتوو ئەنجامتاندا؟

عەلی هاشم:- بەڵی، بۆ هەر ئەگەر وپێشهاتێك خۆمانمان ئامادە كردووە، بەڵام بە ڕای ئێمە توانای كورد ڕووی لە دابەزین كردووە وئەوە بۆ سێ‌ جارە شەڕو ڕووبەڕووبونەوە لە گەڵ توركمانەكاندا ئەنجام دەدەن كە ئەمەش ئەنجامەكەی بو كە هاتە كایەوە.