ئەمە بڵاوبكەوە
FaceBook  Twitter  

دوای تەواوبوونی خولێكی تر لە یارییەكان لە زۆربەی كیشوەرەكان‌و، كردنەوەی بازاڕی كڕین‌و فرۆشتنی یاریزانان، یانە گەورە‌و بچووكەكان سەرقاڵی بازاڕكردنن چ بە كڕین یان فرۆشتن‌و رێكخستنەوەی تیپەكەیان، بۆ ئەم مەبەستە ماڵپەڕی رێگای كوردستان دیدارێكی كورتی لەگەڵ (مامۆستا سەلیم) شیكەرەوەی وەرزشی ئەنجامدا:

ئا: هێرش مەغدید

-ئەو بۆندانەی لەو هاوینە مۆركراون، چ كاریگەرییەكیان هەیە لەسەر خودی یانەكان؟

+ئەو بۆندانەی كە مۆركراون كاریگەرییان هەیە لەسەر هەندێك یانە بەتایبەتی یانە زلهێزەكان كە لە خولی وڵاتانی خۆیان بەناوبانگن وەكو یانەی بەرشەلۆنە‌و مان ستی‌و مان یونایتد‌و لیڤەرپوول‌و بایرن میونخ‌و كۆمەڵێكی تر بەڵێ‌ دەتوانم بڵێم كاریگەری دەبێ‌.

-ئەی ئەو یانە هەژارانە چی بكەن بۆ ئەوەی بەرگەی ئەو بۆندە گەورانە بگرن؟

+بە نیسبەت یانە هەژارەكان یاخود ئەو یانانەی بودجەیەكی كەمیان لەبەر دەستە‌و توانای داراییان كەمە، وەك خۆتان دەزانن وەرزش بووەتە بزنس‌و بازرگانی ئەو سەرۆك یانانەی یەكجار دەوڵەمەندن یاخود ئەو یانانەی كە داهاتیان هەیە ئەوانە زیاتر قازانج دەكەن، یانە هەژارەكانیش هەر دەبێ‌ بناڵێنن‌و هەوڵدەدەن كە دانەبەزن بۆ پلەیەكی خوارتر‌و ململانێ‌‌و كێبڕكێ‌ دەكەن كە لەو خولە بمێننەوە.

- رۆیشتنی رۆنالدۆ بۆ یوڤانتوس تام‌و چێژی لالیگا وەك خۆی دەهێلێت؟

+رۆیشتنی رۆنالدۆ بۆ یانەی یوڤانتوس خۆی لە خۆیدا سپرایزەكی گەورەبوو، قومبولەیەكی مەوقوتە بوو، كەس پێشبینی نەدەكرد، بە پێچەوانەوە زۆرێك پێیان وابوو دەچێتە خولی پریمەرلیگ، دیارە ئەوە پلانێكی داڕێژراوبووە پێشتر كاری لەسەر كراوە، بەڵێ‌ دەتوانم بڵێم تام‌و چێژی لالیگای ئیسپانی كەم دەكاتەوە، ئەو ئەستێرە ناودارە گۆلكارە، كە چەندەها ریكۆردی شكاندووە، چ لەسەر ئاستی خولی یانە پاڵەوانەكانی ئەوروپا، چ لەسەر ئاستی لالیگا‌و سوپەری ئیسپانی‌و جامی جیهانی یانەكان، چوار جاری بەدەستهێناوە‌و سێ‌ جار خولی یانە پاڵەوانی ئەوروپای لەسەر یەك بەدەستهێناوە. كەواتە میسی ئەستێرەی ناوداری یانەی بەرشەلۆنە‌و هەڵبژاردەی ئەرجەنتین، هەرچەندە لەگەڵا هەڵبژاردەكەی خۆی وەكو پێویست لە مۆندیالی وڵاتی روسیا ئاستی راستەقینەی خۆی پێشكەش نەكرد، بەڵام میسی لە گۆڕەپانەكە بە تەنها دەمێنێتەوە بەبێ‌ ركابەر، لەبەر ئەوەی هیچ ركابەرێكی وەك خۆی گەورە نییە لە لالیگای ئیسپانی ململانێی لەگەڵا بكات، تەنها ئەگەر گریزمانی یاریزانی یانەی ئەتلەتیكۆ مەدرید ئەگەر ئەو ركابەری بكات، بەڵام لە خولەكانی تر میسی ركابەری هەیە.

وە رۆیشتنی رۆنالدۆ بۆ یوڤانتوس قازانجێكی یەكجار زۆری بۆ یانەی یوڤانتوس هەبووە‌و دەشبێت، بەتایبەتیش لە 15 رۆژی سەرەتای فرۆشتنی درێسەكانی رۆنالدۆ یانەی یوڤانتوس پارەیەكی خەیاڵی دەستكەوتووە، جگە لەوە جۆش‌و خرۆشی هاندەران‌و كڕینی بلیتەكانی یارییەكان ئەوە خاڵێكی تری گرنگترە بۆ یانەی یوڤانتوس، هەروەها لە رووی بازرگانی بوژانەوەیەكی گرنگ لە بازاڕەكانی ئیتاڵیا دروست دەكات وەكو جاران بینیمان زێدان‌و مەرادۆنا‌و میشێل پلاتینی لە كالچیۆ یارییان دەكرد، چەند ساڵە كاڵچیۆ ئەستێرەیەكی گەورەی وەك رۆنالدۆی بەخۆوە نەدیوە، بەڵام چوونی رۆنالدۆ بۆ ئیتاڵیا گۆڕانكاری زۆر دروست دەكات.

-پێشبینی دەكەی ئەوساڵا خولی یانە پاڵەوانەكان گۆڕانكاری بەسەربێت، مەبەستمان یانەیەكی تر جگە لە ریال مەدرید ئەو خولە بەدەست بهێنێت؟

+بەڵێ‌ پێشبینی دەكەم خولی یانە پاڵەوانەكانی ئەوروپا گۆڕانكاری بەسەر دابێت بەتایبەتی لەسەر یانەی ریال مەدرید، من لەو باوەڕە نیم كە ریال مەدرید بتوانێ‌ ركابەری لەسەر ئەو نازناوە بكات، چونكە یانەكانی تر زۆر بە باشی خۆیان ئامادەكردووە، لە ئینگڵتەڕا مان ستی‌و لە ئیتاڵیا یوڤانتوس‌و لە فەرەنسا پاریس سانجێرمان‌و لە ئەڵمانیا بایرن میونخ‌و ئەو یانانە ئەوساڵا چانسیان زیاتر دەبێت بە پێچەوانەی یانەی ریال مەدرید چونكە تا ئێستا بۆندێكی گەورەی لەگەڵا یاریزانی ئەستێرە نەكردووە بەتایبەت لە هێڵی هێرشبردن.