ئەمە بڵاوبكەوە
FaceBook  Twitter  

هانز فلیك، ڕاهێنەری هەڵبژاردەی ئەڵمانیا پێش یارییەكەی ئەمڕۆیان لە مۆندیالی قەتەر بەرامبەر ئیسپانیا لە كۆنگرەیەكی رۆژنامەوانی دا رایگەیاند كە ئاست و پێكهاتەی ئیسپانیا زۆر روون و ئاشكرایە، ئەوان تیپێكی سەرسوڕهێنەرن.

هانز فلیك راهێنەری مانشافتەكان ئاماژەی بۆ ئەوەش كرد كە بە تەواوی 26 یاریزانەوە بۆ رووبەڕووی ئیسپانیا ئامادەن و گوێ بەوە نادەین بەرامبەر كام هەڵبژاردە یاریی دەكەین، دەشڵێت: ئێمە پلانێكی خۆمان داڕشتووە و هیوادارین لە پلانەكانمان سەركەوتووبین.

هانز فلیك گوتیشی: رێزێكی زۆرم بۆ لویز ئێنریكی راهێنەری ئیسپانیا هەیە، ئەو تیپێكی گەنجی بە كوالیتییەكی باوەڕپێنەكراو و سەرسوڕهێنەر دروست كردووە، بەداخەوە یاریزانە دڵخوازەكەم تیاگۆ ئالكانتار لەگەڵیان نییە، بەڵام بۆسكێست دڵی ئیسپانیایە، ئێمە بەوپەڕی خۆشحاڵییەوە چاوەڕێی رووبەڕووبوونەوەی ئیسپانپا دەكەین.

راهێنەری مەكینەكانی ئەڵمانیا هێمای بۆ ئەوەش كرد كە ئیسپانیا خاوەنی چەند یاریزانێكی زۆر بەتوانان بەتایبەتی گاڤی و پێدری لەو تەمەنە بچووكەدا چێژت پێدەبەخشن، بەراستی سەرنجراكێشن، بەتایبەتی لە دوو ساڵی ڕابردوو لە لەگەڵ بارسێلۆنا زۆرباش گەشەیان كردووە، ئێستاش ئاستی خۆیان دۆزیوەتەوە جێگەی خۆیان لە پێكهاتەی هەڵبژاردەی نیشتمانیدا كردووەتەوە، ئەوان بوسكێتسیان لە پشتەوەیە و لێكتێگەیشتنێكی باش لە نێویاندا هەیە.