ئەم هەواڵە بڵاوبكەوە
FaceBook  Twitter  

واقیعی ئێستای خورماتوو وەكو شارێك كە نازانم ناوی جی لێی بنێم بە دەست ناحەزان ونەیارانەوە ، بە تایبەت ئەوانەی كە ڕۆژ بە ڕۆژ هەڵپەیان دێت مۆركی كوردایەتی لە سەر ئەم شارۆچكە خێر لە خۆ نەدیووە بسڕنەوە ، واقیعەكە كە بەتەنها دانیشتوانەكەی نەبێت هیچ كەسێكی دیكە پێی ڕازی نەبێت ، ئەویش دانیشتوانەكەی چۆن پێی ڕازی بووە كە هیچ ڕێگاچارەیەكیان بە دەستەوە نەماوە بۆ دەربازبونیان لەو واقیعە تاڵە بۆیە پێی رازیبوون ئەگینا گەر ڕێگا چارەیەك لە بەردەمیاندا هەبوایە ئەوا زوتر لەو واقیعە خۆیانیان ڕزگار دەكرد.

زۆر قسە لە سەر خورماتوو دەكرێت ولە میدیاكانیش زۆرباس دەكرێت، بەڵام چۆن قسە كردن وباسكردنێك ، خۆ كەسێك نییە دانی خێری پیادا بنێت ، كەسێك نییە خەمی بخوات ، دەمی هەر كەسێك دەكەیتەوە دەڵێت شارێكی كێشە لە سەر وجێناكۆكە ودەبێت لە ڕێگای یاساوە دۆزەكەی یەكلا بكرێتەوە ، بەڵام كام یاسا ، عێراق یاسای تێدا نەماوە كەچی تازە بە تازە كورد دەیەوێت دۆزی ناوچە جێناكۆكەكان لە ڕێگای ماددەی 140 ویاساو دەستورەوە كە تەنها ئەم سێ‌ دەستەواژەیە لە لایەنیانەوە ناوی دەهێنرێت ولە حەمرین بەو لاوە كەس ئیعترافی پیادا ناكات دۆزی خورماتوو یەكلا بكاتەوە كە هەر خۆشی بو وەكو پارویەكی چەور شارۆچكەكەی لە سەر مێز ولە بەردەم ناحەزان دانا.

گەورەترین هەڵە كە كورد لە ئێستادا دەیكات هێمنی نواندنە بەرامبەر بە نەیارانی ، گەر ئەو هێمنی نواندنە لە نێوان خۆیاندا بە كاریان بهێنیایە ئێستا نەك نەیاران چۆكیان بۆی لە ئەرز دەنا بگرە خۆیان پێیان دەگوتن وەرن هەرێمی كوردستان بە ناوچە جێناكۆكانیشەوە بۆ خۆتان بەرن ولە كۆڵمان ببنەوە . بەڵام نەیاران تەماشا دەكەن كە كورد نەرم ونیانن لە بەرامبەریان وتەبا نین لە ناو خۆیاندا بۆیە ئەو هەلەیان قۆستۆتەوەو ڕۆژ لە دوای ڕۆژ خۆیان بە هێزتر دەكەن بۆ ئەوەی لە بەرامبەر كورد بە یەك دەنگ وبە یەك ڕەنگ ببنە نەخێرێكی گەرم بۆ ئەوەی نەهێڵن بگاتە ئاواتی خۆی بە تایبەت كە لە چەند ڕۆژی رابردوودا بینیمان بەرامبەر هەڵكردنی ئاڵای كوردستان لە كەركوك چییان كرد، ئەوە گەر لە خورماتوو بوایە ئەوا ئێستا گێمی سییەمی شەر لەو شارۆچكەیە دەستی پێكردبوو. 

بە فێڕۆدانی كات لە بەرامبەر دۆزی ئەم شارۆچكەیە كورد لە ناوچەكە ئەمڕۆش نەبێت سبەینێ‌ تووشی كێشمەكێشێكی گەورە دەكاتەوە ، چونكە لە ئێستا 30% ی سەنتەری خورماتوو بە دەست كوردەوەیە وئەودوایشی بە دەست نەیارەكانی كوردەوەیە كە بە داخەوە ئەوان تاكو ئێستاش وەكو دوژمنێكی سەرسەخت تەماشای كورد دەكەن وكوردیش بێدەنگە لە بەرامبەر ئەو تەماشاكردنە وهیچ هەڵوێستێكی نییە بۆ نەك چارەسەركردن بەڵكو یەكلاییكردنەوەی دۆزی شارۆچكەكە ، بە تایبەت لە كاتی ئەنجامدانی هەڵبژاردنی داهاتووی هەردوو ئەنجومەنی پارێزگاكان ونوێنەرانی عێراق كە زۆرینەی دەنگدەرە كوردەكان ناویان لەو ویستگانەدایە كە لە ژێر دەسەڵاتی نەیارەكانمانن ودەنگدەری كوردیش لە ترسی گیانی خۆی ڕوو لەو ناوچانە ناكات كەواتە لە ئێستاوە نیوەی دەنگی كورد ڕۆیشت ، كە كوردیش كەمترین دەنگ بێنێت لە خورماتوو واتا ناتوانێت داوای هیچ بكات بە هۆی ئەوەی ڕەنگە ببێتە كەمینەو كە بووە كەمینەش ئەوا مافی نابێت لە بەرامبەر زۆرینە داوای مافی خۆی بكات ، كەر مافیشی پێنەدرێ‌ لە خورماتوو وەكو ناوچەكی كوردستانی دەرەوەی هەرێمی كوردستان واتا ئەوەی كە كرا هەمووی فت وبە فیڕو چوو.

إنها‌و الدردشە

اكتب رسالە...